Nzoni Tënë so Luc asu na mbeti 10:15 - Mbeti ti Nzapa - Tënë so amu fini

¹⁵ Ti mo, gbata ti Kapernaum, mo baa ti mo, mo tene, fade mo yeke gue ngbii ti kpo le ti nduzu? Fade mo yeke kiri ngbii ti si na ndo ti akuâ!”

Nzoni Tënë so Luc asu na mbeti 10:15 ပူးပေါင်းရင်းမြစ်များ

Tongo nda ti aye 11:4

Na pekoni, ala tene na popo ti ala, atene: “E londo, e leke mbeni gbata; e leke mbeni kota da so li ni ayo, akpo le ti nduzu. Tongaso si iri ti e awu si e kangbi na ndö ti sese kue pepe.”

Ésaïe 5:14

Tongaso, fade ndo ti akuâ ayeke zi yanga ti lo kota, lo yeke zi ni akono ahon ndoni. Akota zo ti kodro na asenge zo ti gbata ni ayeke li na ya ni, ala na aye ti wusuwusu ti ala, na ngia ti ala kue.

Jérémie 51:53

Ataa Babilone ama na nduzu ngbii lo si na le ti nduzu, ataa lo honde tere ti lo na peko ti mbeni ngangu gbagba so zo alingbi ti si daa pepe, mbi yeke mu yanga na azo so kua ti ala ayeke ti bubango aye titene ala gue ngbii asi na tere ti lo kâ”; so tënë ti yanga ti KOTA GBIA laa.

Ezekiel 26:20

Fade mbi yeke sara titene mo zu na ndo ti akuâ, na mbage ti azo so akui ando awe so, ti duti na gbe ti sese kâ. Mo yeke ga tongana angbene kodro so ati awe, mo yeke duti na popo ti azo so ayeke na ya ti du ti kuâ. Tongaso si mbeni zo ayeke kiri ti lango na ndo ti mo pepe; mbi yeke sara titene sese ti azo so angba na fini aduti pendere.

Ezekiel 31:18

“Na popo ti akeke ti Eden, keke wa laa pendere ti lo alingbi na ti mo? Konongo ti lo alingbi na ti mo? Fade a yeke sara si mo na akeke ti Eden ni azu na gbe ti sese. Kâ, mo yeke lango na popo ti azo so afâ *ganza pepe, mo na azo so akui na ya ti bira. Baa, ye so ayeke si ande na Faraon na azo ti lo so ayeke gbani gbani laa! So tënë ti yanga ti Kota Gbia NZAPA laa.”

Ezekiel 32:18

“*Molenge ti zo, toto na ndö ti azo ti Ezipte so ayeke gbani gbani so. Ayeke nzoni bia ti mo ni asara si ala na azo ti amara nde azu na gbe ti sese, ala na ambeni so ayeke zu na ndo ti akuâ.

Ezekiel 32:20

Biani, fade azo ti Ezipte ayeke kui na ya ti bira. Fadeso, a gboto ayongoro zeme na ya ti bozo ni awe: ayeke fâ Ezipte na azo ti lo so ayeke gbani gbani.

Ezekiel 32:27

A lu ala legeoko pepe na angangu zo ti bira so akui giriri, ala so afâ ganza pepe si ala kui so. Angangu zo ti bira ni azu na ndo ti akuâ na aye ti bira ti ala na tere ti ala si a zia ayongoro zeme ti ala na gbe ti li ti ala. Me sioni ti ala ayeke na ndö ti abio ti ala, ngbanga ti so ala yeke zia ando kota mbeto na be ti azo so angba na fini na ndö ti dunia so.

Abdias 1:4

Ataa mo huru na nduzu tongana *ngoalo, ataa mo sara da ti mo kâ na popo ti atongoro, fade mbi yeke mu mo kâ ti bi mo na sese”; so tënë ti yanga ti KOTA GBIA laa.

Matthieu 10:28

Azo so ayeke fâ tere ti zo, ala sara mbeto ti ala pepe; azo ni alingbi ti fâ yingo ti zo pepe. Me ayeke nzoni ala kpe mbeto ti Nzapa so alingbi ti sara si tere ti zo na yingo ti lo kue abuba na ndo so wâ ayeke gbi daa lakue.

Matthieu 11:23

Ti mo gbata ti Kapernaum, mo baa ti mo, mo tene, fade mo yeke gue ngbii ti kpo le ti nduzu? Fade mo yeke kiri ngbii ti si na ndo ti akuâ! Tongana aye ti kpene so asi na ndo ti mo so asi ando na Sodome, ka gbata ni angba ngbii asi laso!

Matthieu 4:13

Lo zia gbata ti Nazaret si lo gue, lo duti na gbata ti Kapernaum, so ayeke na tere ti kota ngu ti Galile, na sese ti Zabulon na ti Neftali.

Nzoni Tënë so Luc asu na mbeti 13:28

Kâ, gi toto na tengo pembe: ala yeke baa Abraham, Isaac na Jacob, na awayanga-Nzapa kue so aduti na *Kodro-gbia ti Nzapa, me ti ala, a bi ala na gigi.

Nzoni Tënë so Luc asu na mbeti 16:23

Na ndo ti akuâ, zo ti mosoro ni ayeke baa pasi mingi. Lo yo le ti lo na nduzu si lo baa Abraham yongoro kâ; Lazare ayeke na tere ti lo.

Ndia ti fani use ni 1:28

E yeke gue ti gi nyen kâ? A-ita ti e asara si be ti e afun kue, ngbanga ti so ala tene: ‘Azo ti sese ni ayeke ngangu ahon e, ala yeke ayongoro zo mingi ahon e. Agbata ti ala akono mingi, angangu gbagba ayeke na tere ni si ayo akpo le ti nduzu.’ Ala baa nga azo ti mara ti Anak kâ!”

2 Pierre 2:4

Biani, *a-ange so asara siokpari ando so, Nzapa azia ala senge tongaso pepe, me lo bi ala na ya ti kota wâ, lo kanga ala na zingiri na ya ti vukongo ndo ti bata ala, ti ku na lango ti fango ngbanga.