Josué 5:6 - Mbeti ti Nzapa - Tënë so amu fini

⁶ Azo ti Israel atambula na benyama ngu baleosio. So ngu baleosio ni ahunzi awe, akoli ti tiringo bira so alondo na Ezipte asigigi, ala kue akui. Ala kui, ngbanga ti so ala ma yanga ti KOTA GBIA pepe; KOTA GBIA adeba yanga ti lo lani atene, ni yeke zia ala titene ala li na ya ti kodro ni so pepe, kodro so lo deba yanga ti mu na akotara ti ala; *kodro so ngu ti me ti bagara na mafuta ti wotoro asi singo daa.

Josué 5:6 ပူးပေါင်းရင်းမြစ်များ

Abia (Psaumes) 107:4

Ambeni ahon kirikiri na ya ti benyama, na ndo so ngu ayeke daa pepe, ala ye ti si na mbeni gbata so azo ayeke daa, me ala wara lege ni pepe.

Sigingo 3:17

Nilaa mbi tene: Mbi yeke zi ala na sese ti Ezipte, ndo so ala yeke baa pasi daa mingi so, ti sigigi na ala. Mbi yeke gue na ala na sese ti azo ti Kanaan, azo ti mara ti Het, ti Amori, ti Perizi, ti Hivi na ti Yebus, *sese so ngu ti me ti bagara na mafuta ti wotoro asi singo daa.’

Sigingo 3:8

Nilaa mbi zu ti zi ala na maboko ti azo ti Ezipte, ti mu ala na sese so ala yeke daa, ti gue na ala na mbeni nzoni sese so akono, so *ngu ti me ti bagara na mafuta ti wotoro asi singo daa. Sese ni ayeke sese ti azo ti Kanaan, ti azo ti mara ti Het, ti Amori, ti Perizi, ti Hivi na ti Yebus.

Jérémie 2:2

“Gue mo to mbela na tënë so na mê ti azo ti Jérusalem, mo tene: Tënë so KOTA GBIA atene ayeke so: ‘Mbi dabe ti mbi na be ti mo so mo mu na mbi na ndembe so mo de maseka. Mo ye mbi ando tongana wali so amu koli fini fini. Mo yeke mu peko ti mbi na benyama, ndo so kâ zo alingbi ti lu ye daa pepe.

Ezekiel 20:15

Na benyama, mbi yoro lani maboko ti mbi na nduzu, mbi deba yanga ti mbi, mbi tene: kodro so mbi mu na ala si ayeke pendere ahon akodro kue, kodro so ngu ti me ti bagara na mafuta ti wotoro asi singo daa so, mbi yeke gue na ala na ya ni pepe.

Ezekiel 20:6

Na lango ni so, mbi yoro maboko ti mbi na nduzu, mbi deba yanga ti mbi na ala, mbi tene: fade mbi yeke sara si ala sigigi na sese ti Ezipte ti gue na mbeni kodro so mbi *bembe ni ando ndali ti ala; kodro ni ayeke pendere ahon akodro kue, *kodro so ngu ti me ti bagara na mafuta ti wotoro asi singo daa.

Wungo ti azo 14:23

Nilaa, fade zo oko na popo ti ala ayeke baa pepe kodro so mbi deba yanga ti mbi ti mu na akotara ti ala. Azo so kue abaa mbi tongana mbumbuse zo so, mbeni oko ayeke baa kodro ni pepe.

Wungo ti azo 26:63

So ayeke peko ti dikongo wungo ti azo ti Israel so Moïse na wayango-sandaga Elazar adiko laa. Ala diko azo ni na ya ti lando ti Moab, na tere ti ngu ti Jourdain, na ndo so abaa le na gbata ti Jéricho.

Ndia ti fani use ni 1:3

Na kozo lango ti nze baleoko na oko ti ngu baleosio ni, na peko ti so azo ti Israel alondo na sese ti Ezipte asigigi, Moïse atene atënë so kue *KOTA GBIA amu yanga na lo ti tene na ala.

Ndia ti fani use ni 2:14

Ti londo na Kades-Barnea ngbii ti si na lango so e fâ ngu ti Zered, e sara ngu baleota na miombe na lege. Na ngoi ni so, andaa azo so kue ngu ti ala alingbi ti sara bira na ndembe so e londo na Kades-Barnea, ala kue akui, alingbi na dengo ba so KOTA GBIA ade ando na ala.

Ndia ti fani use ni 2:7

– Biani, ala azo ti Israel, KOTA GBIA asara tufa na ndö ti ala na ya ti aye so kue ala sara. Lo baa ndo na ndö ti ala na ndembe so ala hon na ya ti kota benyama so. Na ya ti ngu baleosio kue, KOTA GBIA Nzapa ti ala ayeke na ala, ye oko atia ala pepe. –

Ndia ti fani use ni 8:4

Na ya ti ngu baleosio so kue, bongo ti ala aga gbagba ni pepe, gere ti ala asuku pepe.

Ahebro 3:11

Na ya ti ngonzo ti mbi, mbi deba yanga, mbi tene: kodro so mbi leke titene ala wu tere ti ala daa so, fade ala yeke li na ya ni oko pepe!”

Josué 1:6

Gbu ngangu, mo sara ye ti koli, ngbanga ti so mo laa mo yeke sara ande titene kodro so mbi deba yanga ti mbi ti mu na akotara ti ala, aga ye ti ala.

Josué 24:7

Tongaso akotara ti ala adekongo na mbi KOTA GBIA si mbi zia mbeni ngbongboro mbinda na popo ti ala na azo ti Ezipte. Na pekoni, mbi sara si ngu ti kota ngu-ingo ni akiri na ndö ti azo ti Ezipte si amene ala. Ala azo ti Israel, ala baa na le ti ala ye so mbi sara na azo ti Ezipte so! Ala azo ti Israel, ala ninga mingi na benyama.

Josué 5:5

Azo so kue alondo na Ezipte si asigigi, ala fâ ganza awe; me ala so a du ala na benyama, na lege, na ndembe ti sigingo ti ala na Ezipte, ade ala fâ ganza pepe.

Josué 5:7

Amolenge ti ala laa lo zia ala li na ya ti kodro ni na peko ti ala. Amolenge ni so laa Josué afâ ala na ganza, ngbanga ti so ala de ti fâ ganza pepe. Biani, na ndembe so ala yeke na lege ti gango ni, ade a fâ ala na ganza pepe.