Josué 24:7 - Mbeti ti Nzapa - Tënë so amu fini

⁷ Tongaso akotara ti ala adekongo na mbi KOTA GBIA si mbi zia mbeni ngbongboro mbinda na popo ti ala na azo ti Ezipte. Na pekoni, mbi sara si ngu ti kota ngu-ingo ni akiri na ndö ti azo ti Ezipte si amene ala. Ala azo ti Israel, ala baa na le ti ala ye so mbi sara na azo ti Ezipte so! Ala azo ti Israel, ala ninga mingi na benyama.

Josué 24:7 ပူးပေါင်းရင်းမြစ်များ

Sigingo 14:10

So gbia Faraon aga nduru awe, azo ti Israel ayo le ti ala na nduzu si ala baa so azo ti Ezipte ayeke ga na peko ti ala. Kota mbeto agbu azo ti Israel si ala dema tere ti ala na KOTA GBIA.

Sigingo 14:20

Ngbongboro mbinda ni aga aluti na popo ti bâbâ ti azo ti Ezipte na ti azo ti Israel. Na mbeni mbage, mbinda ni avuko vukongo si na mbeni mbage ni, mbinda ni ayeke za zango. Tongaso na bi ni kue, azo ti Ezipte na azo ti Israel alingbi ti ga nduru na tere ti mba pepe.

Sigingo 14:31

Azo ti Israel abaa so, na lege ti ngangu ti maboko ti lo, KOTA GBIA ahon ndö ti azo ti Ezipte. Nilaa ala kpe mbeto ti KOTA GBIA si ala zia be ti ala na ndö ti KOTA GBIA nga na ndö ti Moïse, zo ti kua ti lo.

Ndia ti fani use ni 1:46

Nilaa ala ngba na Kades-Barnea aninga, ala duti kâ lango mingi.

Ndia ti fani use ni 2:14

Ti londo na Kades-Barnea ngbii ti si na lango so e fâ ngu ti Zered, e sara ngu baleota na miombe na lege. Na ngoi ni so, andaa azo so kue ngu ti ala alingbi ti sara bira na ndembe so e londo na Kades-Barnea, ala kue akui, alingbi na dengo ba so KOTA GBIA ade ando na ala.

Ndia ti fani use ni 29:2

Ala baa akota pasi so lo tokua na ndö ti ala, aye ti kpene na akota ye ti dongo be so lo sara.

Ndia ti fani use ni 4:34

Mbeni nzapa nde atara laoko ti gue ti zi azo ti lo na gbe ti mbeni mara nde awe? Oko pepe, me KOTA GBIA Nzapa ti ala, azo ti Israel, ague, azi ala na sese ti Ezipte; ala wani abaa na le ti ala. Lo zi ala na lege ti ngangu ti maboko ti lo nga na lege ti maboko ti lo so lo yoro; na lege ti akota pasi, aye ti kpene na aye ti dongo be, akota ye ti ngangu nga na aye so ayeke zia mbeto na be ti zo.

Ahebro 3:17

Be ti lo aso na ya ti ngu baleosio na azo wa? Be ti lo aso na azo so asara siokpari si ala kui na ya ti benyama.

Josué 5:6

Azo ti Israel atambula na benyama ngu baleosio. So ngu baleosio ni ahunzi awe, akoli ti tiringo bira so alondo na Ezipte asigigi, ala kue akui. Ala kui, ngbanga ti so ala ma yanga ti KOTA GBIA pepe; KOTA GBIA adeba yanga ti lo lani atene, ni yeke zia ala titene ala li na ya ti kodro ni so pepe, kodro so lo deba yanga ti mu na akotara ti ala; *kodro so ngu ti me ti bagara na mafuta ti wotoro asi singo daa.