Jérémie 7:31 - Mbeti ti Nzapa - Tënë so amu fini

³¹ Na popo-hoto ti Hinom, ala leke ndo na li ti hoto so ala di iri ni Tofet. Kâ, ala yeke gbi na wâ amolenge ti ala ti koli na ti wali ti mu na *sandaga. Andaa, so ayeke mbeni ye so mbi mu yanga laoko pepe titene ala sara ni; mbeni tënë tongaso aga na li ti mbi laoko pepe.

Jérémie 7:31 ပူးပေါင်းရင်းမြစ်များ

2 Agbia 17:17

Ala gbi amolenge ti ala ti koli na amolenge ti ala ti wali na wâ ti mu na *sandaga. Ala gi nda ti aye, ala sara aye ti mazi nde nde. Ala mu tere ti ala ti sara ye so ayeke sioni na le ti KOTA GBIA ti zia ngonzo na be ti lo.

2 Agbia 23:10

Yosias asara si Tofet so ayeke na popo-hoto ti Hinom aga *sioni, tongaso si azo akiri agbi amolenge ti ala ti koli na ti wali na wâ pepe ti mu na *sandaga na nzapa Molek.

2 Agbia 23:20

Na ndö ti agbalaka ni, lo fâ go ti awayango-sandaga so kue ayeke sara kua na ando so azo aleke na ndö ti ahoto ti voro anzapa nde daa; lo gbi na ndö ti agbalaka ni abio ti azo. Na pekoni, lo kiri na Jérusalem.

2 Mbai 28:3

Lo wani, lo zö dukani na popo-hoto ti Molenge ti Hinom si lo gbi amolenge ti lo ti koli na wâ ti mu na *sandaga. Lo mu peko ti asioni sarango ye ti amara nde, asioni ye so zo alingbi ti baa na le ti lo fani use pepe. Ando KOTA GBIA atumba amara ni na ndö ti sese ni si lo mu na azo ti Israel.

2 Mbai 33:6

Lo gbi amolenge ti lo ti koli na wâ ti mu na *sandaga na ndo so ayeke na popo-hoto ti Hinom; lo gi nda ti aye, lo sara mazi, lo sara yoro; lo zia azo titene ala hunda yingo ti akuâ si ala fa nda ti aye so ayeke na hondengo ni. Lo kiri lo sara sioni so ague guengo na nduzu ti ke KOTA GBIA, ye so azia ngonzo na be ti lo.

Ésaïe 30:33

A leke gba ti keke ti wâ kozoni awe; keke ni ayeke nga ndali ti gbia. Na ya ti du so akono si alinda mingi, a zia gba ti akeke angoro na ni ti tingo na wâ. Tongaso, pupu ti yanga ti KOTA GBIA so ayeke tongana *sufre so ayeke sua ayeke bi wâ daa.

Ésaïe 57:5

Nzara ti tere ti ala ayeke gbi ala tongana wâ nduru na tere ti akota keke, na gbe ti afini keke so kue kugbe ni ayeke gbani gbani. Ala yeke fâ amolenge ti mu na *sandaga na tere ti ngu nga na popo ti atêne so asuru.

Jérémie 19:2

Na pekoni, mo sigigi na yanga ti gbagba ti gbata so iri ni ti Fango-ta. Yanga ti gbagba ni ayeke baa ndo na mbage ti popo-hoto ti Hinom. Kâ, fade mo yeke to mbela na tënë so mbi yeke tene na mo.

Jérémie 2:23

Ye ni asara tongana nyen laa mo tene: ‘Mbeni sioni ye andu tere ti mbi oko pepe; mbi voro anzapa *Baal pepe’ so? Gue mo baa gi peko ti agere ti mo kâ na popo-hoto! Ayeke nzoni mo hinga ye so mo sara. Mo yeke tongana mama ti *zambala so akpe ge, akpe kâ.

Jérémie 32:34

Ala zia afungo yanda ti ala na ya ti kota da so a zia nde ndali ti mbi; ala sara si da ni aga *sioni.

Jérémie 32:35

Na popo-hoto ti Hinom, ala leke ndo na li ti ahoto ndali ti Baal. Kâ, ala yeke gbi amolenge ti ala ti koli na ti wali na wâ ti mu na sandaga na nzapa Molek. Mbi mu yanga na ala laoko pepe ti sara ye tongaso! Mara ti ye tongaso aga na li ti mbi laoko pepe. Na sarango mara ti sioni ye tongaso, so zo alingbi ti baa na le ti lo fani use pepe so, ala pusu azo ti Juda ti sara sioni.

Ezekiel 16:20

Jérusalem, amolenge-koli na amolenge-wali so mo du ala na mbi, mo ya ala na sandaga na ayanda ni titene ala ga kobe ti ala! Sarango ye ti ndumba ti mo alingbi lani na mo pepe?

Ezekiel 20:26

Mbi zia ala titene ala ga *sioni na lege ti akozo molenge ti ala so ala yeke gbi na wâ ti mu na *sandaga. Mbi sara tongaso titene ala baa pasi si ala hinga atene, mbi laa mbi yeke KOTA GBIA.”

Ezekiel 20:31

Ti fadeso, ala ngba ti ga *sioni na lege ti amatabisi ti ala, na lege ti amolenge ti ala so ala yeke gbi na wâ ti mu na sandaga na ayanda. Ala azo ti Israel, na sarango ye tongaso, fade mbi yeke yeda titene ala ga ti hunda mbi na mbeni tënë? Fini ti mbi! So tënë ti yanga ti mbi, Kota Gbia NZAPA laa. Fade mbi yeke yeda pepe titene ala hunda mbi na mbeni tënë!

Awayango-sandaga 18:21

“Alingbi mo mu mbeni molenge ti mo oko pepe titene a gbi lo na wâ na *sandaga na nzapa Molek. So fade ayeke sara si iri ti mbi, Nzapa ti mo abuba: mbi laa mbi yeke KOTA GBIA.

Mishe 6:7

Akoli-taba gbani gbani laa KOTA GBIA ayeke ye tënë ni? Gba ti mafuta so ayeke sua tongana kota ngu? Fade mbi mu kozo molenge ti mbi na sandaga ndali ti sarango ye ti kirikiri ti mbi? Mbi mu molenge ti ya ti mbi wani ndali ti siokpari ti mbi?”

Ndia ti fani use ni 12:31

Ala azo ti Israel, tongana ala yeke voro KOTA GBIA Nzapa ti ala, alingbi ala sara ye tongana ti amara ni so pepe. Biani, amara ni so ayeke sara asioni ye nde nde na nzapa ti ala, asioni ye so zo alingbi ti baa na le ti lo fani use pepe, aye so be ti KOTA GBIA ake ni: azo ni amu amolenge ti ala ti koli na ti wali ti gbi ala na wâ ti mu na *sandaga na anzapa ti ala nga!

Ndia ti fani use ni 17:3

lo mu peko ti ambeni nzapa nde, lo kuku na gbe ti ala ti voro ala. Ataa lâ, wala nze na aye so ayeke mingi mingi na le ti nduzu, zo ni akuku na gbe ti ala ti voro ala. Laoko KOTA GBIA amu yanga na ala ti sara ye tongaso pepe!

Ndia ti fani use ni 18:10

Ala azo ti Israel, alingbi a wara na popo ti ala pepe mbeni zo oko so ayeke gbi molenge ti lo ti koli wala molenge ti lo ti wali ti mu na *sandaga. Alingbi a wara na popo ti ala pepe azo ti sarango mazi, azo ti bango nda ti aye, azo ti bingo zeke, azo ti yoro,

Josué 15:8

Katikati ni akiri ahon na popo-hoto ti Hinom, na tere ti hoto ti mbage ti Mbongo ti azo ti mara ti Yebus, so ti tene Jérusalem. Na pekoni, katikati ni ague ngbii asi na li ti hoto so ayeke na Do ti popo-hoto ti Hinom, akiri ague ngbii asi na popo-hoto ti azo ti mara ti Refa, na mbage ti Banga.