Jérémie 7:28 - Mbeti ti Nzapa - Tënë so amu fini

²⁸ Tongaso, fade mo yeke tene na ala, mo tene: Ala yeke azo ti mara so ama yanga ti KOTA GBIA, Nzapa ti ala pepe; ala ke ti ma wango. Taa-tënë ayeke mbeni pepe; zo ti tenengo taa-tënë ayeke daa mbeni pepe.”

Jérémie 7:28 ပူးပေါင်းရင်းမြစ်များ

Abia (Psaumes) 12:2

*KOTA GBIA, soo mbi maa! Azo so angba na lege ti mo ayeke daa mbeni pepe; azo ti mbirimbiri ayeke daa fadeso pepe.

Abia (Psaumes) 50:17

Andaa mo ke atënë ti gbotongo mê ti mo so mbi gboto si mo do na gere atënë ti yanga ti mbi.

Amato 1:7

Kpengo mbeto ti KOTA GBIA ayeke tongo nda ti hingango ye. Gi azo ti buba laa abaa ndara na anzoni wango na le ti ala tongana mbumbuse ye.

Ésaïe 30:9

Biani, azo so ayeke azo ti ngangu li, ala yeke amolenge ti handango zo, ye so KOTA GBIA afa na ala, ala ye ti ma pepe.

Jérémie 11:10

Sioni so akotara ti ala asara ando so, gi ni laa ala kiri daa. Akotara ti ala ni ake ti ma atënë ti mbi; ala kpe na peko ti anzapa nde ti voro ala. Azo ti Israel na azo ti Juda abuba ya ti mbuki so mbi na akotara ti ala, e sara ni.

Jérémie 17:23

Ti akotara ti ala ni, ala ma mbi pepe, ala dingi mê ti ala ti ma mbi pepe. Ala sara ngangu li, ala ke ti ma tënë si ala ke awango ti mbi.

Jérémie 2:30

Mbi pika ala gbaa; li ti ala aga daa oko pepe. Ala wani afâ awayanga-Nzapa ti ala na yongoro zeme tongana ti so bamara ayeke suru ya ti nyama.

Jérémie 32:33

Titene ala zia le ti ala na mbage ti mbi, ala zia gi peko ti ala na mbi. Ataa so mbi mu ngoi ti mbi kue ti fa ye na ala, ala ma pepe; ala ke ti ma wango ti mbi.

Jérémie 5:1

“Ala tambula na ndö ti alege ti Jérusalem mbage na mbage kue, ala baa ndo, ala hunda ndo, ala gi ndo na ndö ti abalabala ti wara mbeni zo, zo so ayeke sara ye mbirimbiri, zo so ayeke sara ye na legeni. Tongana ala wara mbeni zo oko tongaso, fade mbi yeke zi siokpari na li ti azo ti Jérusalem.”

Jérémie 5:3

KOTA GBIA, ye so anzere na mo ayeke titene zo asara lakue ye so ayeke na legeni; ni laa ape? Mo pika ala, me pika ni aso ala pepe. Mo ye ti nika ala biani biani, me ala ke ti ma ye so mo fa na ala. Li ti ala akpengba ahon têne, ala ke ti kiri na mbage ti mo.

Jérémie 6:17

Mbi zia asanziri na ndö ti ala ti tene na ala ti sara hange; asanziri ni atene: ‘Ala dingi mê ti ala ti ma toto ti didi!’ Me ala kiri tënë: ‘Ngbanga ti e ayeke daa ape!’

Jérémie 6:28

Ala kue ayeke azo ti ngangu li, li ti ala akpengba ahon ndoni; li ti ala akpengba tongana bengba wen nga na wen. Ala yeke du mvene na li ti azo, ala kue ayeke azo ti bubango ye.

Jérémie 6:8

“Jérusalem, zia a fa nzoni lege na mo. Tongaso pepe, mbi yeke zi maboko ti mbi na tere ti mo si ndo ti mo ayeke ga ande ngonda, sese so zo oko alingbi ti duti daa pepe.”

Osée 4:1

Azo ti Israel, ala ma tënë ti *KOTA GBIA: KOTA GBIA ayeke na ngbanga na azo ti kodro, ngbanga ti so na ya ti kodro ni, tenengo taa-tënë ayeke daa pepe, ndoye ayeke daa pepe, hingango Nzapa ayeke daa pepe.

Sofonii 3:2

Gbata ni ama iringo ndo pepe, lo ma wango pepe, lo zia be ti lo na ndö ti *KOTA GBIA pepe, lo ga nduru na Nzapa ti lo pepe.

Sofonii 3:7

Mbi tene na be ti mbi, mbi tene: ‘Mo gbata so, tongana mo kpe fade mbeto ti mbi, tongana mo ma fade wango ti mbi, ka a yeke buba mo pepe.’ Me lakue so mbi yeke ga ti pika mo, azo ti mo ayeke kpe hio ti sara sioni ahon ndoni.