Jérémie 7:20 - Mbeti ti Nzapa - Tënë so amu fini

²⁰ Ndani laa, tënë so Kota Gbia NZAPA atene ayeke so: “Fade mbi yeke tuku ngonzo ti mbi ti wâ na ndö ti gbata so, na ndö ti azo na anyama, na ndö ti akeke nde nde ti yaka na ale ti kobe so asigigi na sese. Ngonzo ti mbi ayeke duti tongana wâ so ayeke mingo pepe.”

Jérémie 7:20 ပူးပေါင်းရင်းမြစ်များ

2 Agbia 22:17

Azo ti gbata ni azia mbi awe si ala zö dukani na anzapa nde; anzapa nde so ala leke so azia ngonzo na be ti mbi. Ndani laa ngonzo ti mbi ayeke londo tongana wâ na tere ti gbata so; ngonzo ni ayeke kai ande pepe.

Ésaïe 10:17

Fade lumiere ti Israel ayeke ga wâ; lo so ayeke nde si ayeke nzoni kue ayeke ga menga ti wâ so ayeke zö si ayeke gbi akamba ti ki na aki gi na ya ti lango oko.

Ésaïe 42:25

Ndani laa KOTA GBIA atuku na ndö ti Israel ngonzo ti lo ti wâ nga na sioni ye ti bira. Bira ni abi wâ na tere ti ala mbage na mbage kue, me Israel ahinga ye oko daa pepe. Wâ ni agbi azo ni, me tënë ni agbu be ti ala pepe.

Ésaïe 66:24

Na sigingo ti ala, fade ala lingbi ti baa kuâ ti azo so atomboka na tere ti mbi. Angusu so ayeke te ala ayeke kui pepe; wâ so ayeke gbi ala ayeke mingo pepe. Ala yeke ga ye so ayeke sioni mingi ndali ti azo kue.

Jérémie 11:16

Mbi zia lani iri na ndö ti mara ni: ‘Keke ti olive so afini kugbe ni ayeke gbani gbani si alengo ni ayeke pendere ahon ndoni.’ Me na ya ti kota wuluwulu tongana toto ti bekpa, mbi sara si wâ ati na ya ti akugbe ti lo, amaboko ni akungbi kue.”

Jérémie 12:4

Kodro ni ayeke ngba na mua ngbii asi lawa? Apere ti ayaka kue ayeke ngba ti hole ngbii asi lawa? Ndali ti sioni ti azo ti kodro ni, anyama na andeke ayeke kui kue. Azo ni ayeke tene: “Jérémie ayeke hunzi kozo ti e.”

Jérémie 14:16

Azo so awayanga-Nzapa ni atene tënë ni na ala so, fade bira na nzara ayeke fâ ala; a yeke bi kuâ ti ala kirikiri na ndö ti alege ti Jérusalem, zo oko ti lu kuâ ni ayeke daa pepe, ala na awali ti ala nga na amolenge ti ala ti koli na ti wali. Sioni so azo ni asara so, fade mbi yeke sara si akiri gi na li ti ala wani.

Jérémie 17:27

Me tongana ala ma mbi pepe, tongana ala ke ti bata lango ti wungo tere nde ndali ti mbi, tongana ala yo akungba na lango ni so si ali na ni na yanga ti gbagba ti Jérusalem, fade mbi yeke bi wâ na tere ti ayanga ti gbagba ni. Wâ ni ayeke gbi apendere da ti gbata ni si ayeke mingo pepe.’ ”

Jérémie 17:4

Kodro so lani mbi mu na mo si aga ye ti mo, fade mo yeke do ni ti zia. Mbi yeke sara si mo ga ngbaa ti awato ti mo na ya ti mbeni kodro so mo hinga ni pepe. Biani, mo sara si wâ ti ngonzo ti mbi alondo; wâ ni ayeke gbi kpu na kpu.”

Jérémie 18:23

Mo KOTA GBIA, mo hinga apialo so kue ala leke na tere ti mbi ti fâ mbi. Mo zi sioni na li ti ala pepe, sara si siokpari ti ala ahon na le ti mo pepe. Ayeke nzoni ala ti na sese na dawa ti mo. Na ndembe ti ngonzo ti mo, mo sara sana na ala.

Jérémie 21:12

ala asewa ti David! Tënë so KOTA GBIA atene ayeke so: Lakue na ndaperere, ayeke nzoni ala fâ ngbanga mbirimbiri. Azo so ayeke te amba ti ala na mbana so, ala zi azo ni na maboko ti ala. Tongaso pepe, fade ngonzo ti mbi ayeke londo tongana wâ so ayeke gbi ye kue; zo alingbi ti mingo ni pepe. So ayeke futa ti asioni sarango ye ti ala laa.

Jérémie 42:18

Jérémie akiri atene: “Tënë so KOTA GBIA so ayeke na ndö ti dunia kue, Nzapa ti Israel atene ayeke so: ‘Ngonzo ti mbi na ngonzo ti mbi ti wâ alondo lani na tere ti azo ti Jérusalem. Legeoko nga, fade mbi tuku ngonzo ni na ndö ti ala, azo ti Juda, tongana ala si na Ezipte. Tongaso, fade ala ga tapande ndali ti azo so ayeke deba amba ti ala, ala yeke ga ye ti dongo be, ye ti dengo ba na ye ti ziango kamene na le ti zo. Ala yeke kiri ti baa kodro so oko pepe.’ ”

Jérémie 44:6

Nilaa mbi tuku ngonzo ti mbi nga na ngonzo ti mbi ti wâ si agbi agbata ti Juda na abalabala ti Jérusalem. Agbata ni na abalabala ni aga ndo ti gba ti atêne, aga ngonda tongana ti so a yeke baa ni laso so.’ ”

Jérémie 6:11

Ti mbi, ngonzo ti mo, KOTA GBIA, asi be ti mbi singo. Mbi kanga be ti mbi gbaa. “Ayeke nzoni mo tuku ngonzo ni na ndö ti amolenge so ayeke na ndö ti alege; mo tuku ni na ndö ti bongbi ti amaseka. Akoli na awali, akangba na azo so ate gigi mingi, fade a yeke mu ala kue ti hon na ala.

Jérémie 6:12

Fade ada ti ala ayeke ga ti ambeni zo nde; ayaka ti ala na awali ti ala ayeke ga ti ambeni zo nde; so tënë ti yanga ti KOTA GBIA laa. Biani, fade mbi yeke yoro maboko ti mbi ti pika azo ti kodro ni,

Jérémie 8:13

“So tënë ti yanga ti KOTA GBIA laa: Mbi yeke fâ ala ti hunzi ala; ale ti *vinye ayeke na tere ti keke ti vinye mbeni pepe; ale ti fige ayeke na tere ti keke ti fige mbeni pepe; akugbe ni ahole awe. Ye so mbi mu lani na ala, ala do na gbe ti gere ti ala.”

Abia ti demango tere 4:11

*KOTA GBIA asara ye ti ngonzo ti lo ni kue ahunzi awe. Lo sara si ngonzo ti lo ti wâ abuba ndo kue; lo bi wâ na gbata ti Sion si agbi agere ni kue.

Ezekiel 22:22

Tongana ti so wen ayeke ga ngu na le ti wâ, fade ala yeke ga ngu taa na be ti Jérusalem. Tongaso, fade ala yeke hinga atene, mbi laa mbi yeke KOTA GBIA so mbi tuku ngonzo ti mbi ti wâ na ndö ti ala.”

Ezekiel 7:12

Ngoi ni alingbi awe! Lango ni aga nduru awe! Ayeke nzoni zo ti vongo ye akai ngia ti lo, zo ti kango ye aduti na vundu pepe, ngbanga ti so ngonzo ti mbi ti wâ ayeke londo na tere ti azo ti kodro ni kue.

Ezekiel 7:14

Ataa a huru tatalita, ataa a leke ye kue ndali ti bira, zo oko ti gue na bira ni ayeke daa pepe, ngbanga ti so ngonzo ti mbi ti wâ alondo na tere ti azo ti kodro ni kue awe.”

Daniel 9:11

Azo ti Israel kue ake ndia ti mo awe; ala gue yongoro na mo si atënë so mo tene, ala ke ti ma ni. Tongaso asioni tënë na atënë ti dengo ba so a su ni na ya ti mbeti ti ndia ti Moïse, zo ti kua ti mo, atënë ni ati na ndö ti e, ngbanga ti so e sara siokpari so ake mo.

Awayango-sandaga 26:28

fade mbi nga, na sioni ngonzo na be ti mbi, mbi yeke sara ngangu li na ala; mbi wani, mbi yeke kiri ti pika ala fani mbarambara ndali ti asiokpari ti ala.

Nahum 1:6

Tongana lo sara ngonzo, zo wa laa ayeke luti na le ti lo, zo wa? Tongana ngonzo ti lo alondo tongana wâ, zo wa laa ayeke ngba na fini, zo wa? Ngonzo ti lo ayeke gbi ye kue tongana ti so kota wâ ayeke gbi ye kue; ya ti akota têne ayeke suru na dawa ti lo.

Sofonii 1:2

So tënë ti yanga ti *KOTA GBIA laa: “Fade mbi yeke hunzi aye kue kue kue na ndö ti sese.

Sofonii 1:3

Fade mbi yeke hunzi azo na anyama kue, andeke ti le ti nduzu na asusu ti kota ngu-ingo kue; mbi yeke hunzi asioni zo nga na aye so kue ayeke sara si ala yeke ti so. Mbi yeke hunzi azo kue kue kue na ndö ti sese.” So tënë ti yanga ti KOTA GBIA laa.

Zakarii 7:12

Ala kiri akpengba be ti ala ngangu tongana diaman; ala ke ti ma atënë ti ndia na atënë ti KOTA GBIA; atënë so KOTA GBIA so ayeke na ndö ti dunia kue afa na ala na lege ti Yingo ti lo si akozo wayanga-Nzapa afa peko ni so. Tongaso ngonzo agbu KOTA GBIA mingi, lo so lo yeke na ndö ti dunia kue so.

Matthieu 3:12

Lo gbu ye ti pengo na ale ti kobe na maboko ti lo, lo yeke leke ndo ti pikango ale ti kobe ti lo daa. Na pekoni, lo yeke zia ni na ya ti gogoro, me fade lo yeke bongbi aporo ni ti gbi na ya ti wâ so ayeke mingo laoko pepe.”

Aye so Nzapa afa 14:10

fade lo nga, lo yeke nyon vin ti kota ngonzo ti Nzapa. A yeke tuku vin ni na ya ti kopo ti ngonzo ti Nzapa, a yeke tuku ngu daa pepe. Lo yeke baa ande pasi na le ti wâ na *sufre, na le ti a-ange ti Nzapa nga na le ti Molenge ti Taba.