Jérémie 6:29 - Mbeti ti Nzapa - Tënë so amu fini

²⁹ Ye ti pengo na wâ ti ndao ayeke pe wâ ngangu ti zi azende na tere ti wen ni. Me ala pe wâ ni gbaa ti zi apuru ti wen ni daa; apuru ni alondo pepe.

Jérémie 6:29 ပူးပေါင်းရင်းမြစ်များ

Amato 17:3

A yeke tara lôro nga na wen ti nginza na ya ti wâ; me KOTA GBIA laa ayeke tara be ti zo.

Ésaïe 49:4

Ti mbi, mbi tene fade, mbi tene: “Mbi baa pasi na sarango kua senge senge, mbi hunzi ngangu ti mbi kue senge senge, ye ti peko ni oko ayeke daa pepe.” Andaa *KOTA GBIA laa ayeke baa lege ti nzoni fango ngbanga ti mbi, futa ti mbi ayeke na maboko ti Nzapa ti mbi.

Jérémie 15:19

Ndani laa, tënë so KOTA GBIA atene ayeke so: “Tongana mo kiri na mbage ti mbi, fade mbi yeke kiri na mo na kua ti mbi. Tongana mo yeke tene anengo tënë, me abuba tënë pepe, fade mo yeke duti zo ti tenengo peko ti atënë ti yanga ti mbi. Alingbi azo ti Juda laa akiri na mbage ti mo; me ayeke ti mo ti gue na mbage ti ala pepe.

Jérémie 9:7

Menga ti azo ni ayeke tongana le ti kokora so ayeke fâ zo; atënë ti ala gi atënë ti mvene: nzoni tënë ayeke sigigi na yanga ti ala na tere ti amba ti ala, me na be ti ala kâ, ala leke kuku ti gbu na amba ti ala ni.

Ezekiel 24:12

Me angangu so kue ayeke senge senge. Ataa so a zia na wâ, gba ti soko ni ahon pepe.

Ezekiel 24:13

Jérusalem, mo ga *sioni ndali ti sarango ye ti potopoto ti mo. Mbi sukula mo titene mo ga *nzoni, me mbi sara gbaa. Tongaso, kozo titene mo ga *nzoni, fade ngonzo ti mbi ti wâ ayeke londo na tere ti mo ngbii be ti mbi ade si.

Osée 11:7

Azo ti mbi aleke be ti ala ti ke mbi biani biani; a iri ala titene ala londo na nduzu, me zo oko na popo ti ala alondo pepe.

Zakarii 13:9

Fade mbi yeke mu ota mbage ti azo so angba na fini so, mbi yeke hon na ala na le ti wâ ti zi sioni ye na tere ti ala tongana ti so a yeke kporo wen ti nginza na ya ti wâ ti zi sioni ye na tere ni. Mbi yeke tara ala ti zi sioni ye na tere ti ala tongana ti so a yeke tara lôro na le ti wâ ti zi sioni ye na tere ni. Fade ala yeke iri mbi ti mu maboko na ala; ti mbi, mbi yeke ma ala. Mbi yeke tene: ‘Ala yeke azo ti mbi’, ala yeke tene: ‘KOTA GBIA ayeke Nzapa ti e.’ ”

1 Pierre 1:7

Pasi ni asi na ala ti tara mabe ti ala. Lôro ayeke ye so ayeke buba bubango, me azo ayeke tara ni na wâ. Mabe ayeke kota ye ahon lôro. Ndani laa a yeke tara ni ti baa wala akpengba, tongaso si fade Nzapa ayeke tene nzoni tënë ti ala, lo yeke gonda ala si lo yeke ne ala na ndembe so Jésus Christ ayeke si.

1 Pierre 4:12

A-ita ti mbi so mbi ye ala mingi, li ti ala akpe pepe na wâ ti pasi so ala yeke na ya ni so! Ala baa ni tongana mbeni fini ye pepe.

Awafango-ngbanga 17:4

Me Mika akiri na nginza ni na mama ti lo; mama ti lo azi ale ti nginza ni ngbangbo use, lo mu na mbeni matawa. Matawa ni amu nginza ni, lo kporo ni si lo sara na mbeni yanda. A zia yanda ni na ya ti da ti Mika.