Jérémie 51:11 - Mbeti ti Nzapa - Tënë so amu fini

¹¹ KOTA GBIA aleke na be ti lo ti buba kodro ti Babilone. Ndani laa lo zia nzara ni na be ti agbia ti Medii. Biani, KOTA GBIA akiri na awato ti e peko ti sioni ti ala awe; lo kiri na ala peko ti sioni so ala sara na kota da ti lo. Ala leke yanga ti ale ti kokora, aza! Ala mu ni asi ya ti abozo ni!

Jérémie 51:11 ပူးပေါင်းရင်းမြစ်များ

1 Agbia 11:14

*KOTA GBIA atokua mbeni wato na Salomon; wato ni ayeke Hadad, zo ti mara ti Edom, mbeni *hale ti gbia ti Edom.

1 Agbia 11:23

Nzapa akiri atokua mbeni wato na Salomon; wato ni ayeke Rezon, molenge ti Eliada ti koli. Lani, Rezon akpe da ti wa ti lo Hadadezer, gbia ti Soba si lo hon.

1 Mbai 5:26

Nilaa Nzapa ti Israel azia na be ti agbia ti Asirii, Pul na Teglat-Falasar titene ala ga amu sese ti amara ni si ala gbu azo ni ague na ala na Hala, Habor nga na Hara, nduru na *bale ti Gozan. Ala ngba kâ ngbii asi laso.

2 Mbai 36:22

Na kozo ngu so Sirus ayeke gbia ti Perse, *KOTA GBIA aye ti sara si tënë ti lo so lo zia ando na yanga ti Jérémie ti tene, aga taa-tënë. Nilaa KOTA GBIA azia na be ti Sirus ti mu yanga titene a to mbela na tënë ti Sirus na ya ti kodro ti lo kue; a su nga atënë ni na mbeti, atene:

Esdras 1:1

Na kozo ngu so Sirus ayeke gbia ti Perse, *KOTA GBIA aye ti sara si tënë ti lo so lo zia ando na yanga ti Jérémie ti tene, aga taa-tënë. Nilaa KOTA GBIA azia na be ti Sirus ti mu yanga titene a to mbela na tënë ti Sirus na ya ti kodro ti lo kue; a su nga atënë ni na mbeti, atene:

Ésaïe 10:26

Fade KOTA GBIA so ayeke na ndö ti dunia kue ayeke mu fimbo ti pika na azo ti Asirii tongana ti so lo pika ando azo ti Madian na tere ti kota têne ti Oreb. Lo yeke yoro keke ti lo na nduzu tongana ti so lo yoro ando na ndö ti kota ngu-ingo na Ezipte.

Ésaïe 21:2

Na ya ti mbeni ye tongana bango-li, mbi baa mbeni ye so ayeke sioni mingi: zo so lani ayeke na ya ti *mbuki, lo ga zo ti kango azo, zo ti bubango ye ayeke sara kua ti lo. *KOTA GBIA atene: “Azo ti Elam, ala londo na bira ma! Azo ti Medii, ala ngoro gbata ni na bira! Mbi yeke sara titene dema kue akai.”

Ésaïe 21:5

A leke meza awe, a zia asanziri ti baa ndo, azo ayeke te, ala yeke nyon. Mo ye ti baa, mbeni zo adekongo: “Aturugu ti kota kamba, ala londo! Ala zia mafuta na tere ti *avala ti ala!”

Ésaïe 41:25

Na mbage ti Banga kâ, mbi soro mbeni zo, mbi zia lo na lege si lo yeke ga. Na mbage ti To, mbi iri lo na iri ti lo; lo yeke do azo ti komandema na gere tongana ti so zo ayeke do potopoto, tongana ti so wasarango-ta ayeke do ya ti sese ti sarango na ta.

Ésaïe 45:1

Tënë so *KOTA GBIA atene na Sirus, gbia so lo soro lo ayeke so: “Mbi gbu mo na maboko ti mo ti koli ti kinda amara nde na gbe ti mo, ti zi na maboko ti agbia komandema ti ala, ti zi ayanga ti gbagba ti agbata so akanga kangango na dawa ti mo.

Ésaïe 45:5

Mbi laa mbi yeke KOTA GBIA, mbeni nde ayeke daa pepe. Mbeni Nzapa nde ayeke pepe, gi mbi oko. Ataa so mo hinga mbi pepe, mbi leke mo ndali ti bira.

Ésaïe 46:11

Na mbage ti To, mbi iri mbeni ndeke so ayeke te anyama. Yongoro na nda ti sese kâ, mbi iri mbeni zo, lo laa lo yeke sara si apialo ti mbi asi alingbi na ni. Tënë so mbi tene, ye ni ayeke si! Pialo so mbi leke, mbi yeke sara ni!

Jérémie 25:25

– agbia kue ti Zimri, ala ti Elam na ala ti Medii kue;

Jérémie 46:3

“Ala leke *avala, akete ni na akota ni! Ala londo asara bira!

Jérémie 46:4

Ala kanga aye ti bira na ndö ti ambarata! Ala azo ti kpengo na mbarata, ala londo! Ala yu kpoto ti bira, ala luti na molongo! Ala leke yanga ti alikongo, aza! Ala yu kazaka ti wen!”

Jérémie 46:9

Ala ambarata, ala londo asara bira! Ala apusu ti mbarata, ala mu loro ngangu! Ala angangu zo ti bira, ala mu li ni! Ala azo ti Etiopii na ti Put, ala so ahinga ti gbu avala, ala azo ti Lud so ahinga ti tiri na kokora, ala nga, ala mu li ni!”

Jérémie 50:25

KOTA GBIA azi yanga ti da ti batango aye ti bira ti lo; lo sigigi na aye ti bira ni ti fa ngonzo ti lo. Na kodro ti Babilone, kua ayeke kâ ndali ti Kota Gbia, NZAPA so ayeke na ndö ti dunia kue.

Jérémie 50:3

Biani, mbeni mara alondo na mbage ti Banga ti ga ti sara bira na Babilone. Lo yeke sara si kodro ti lo aga ngonda, zo ayeke kiri ti lango daa pepe; azo na anyama, ala kue ayeke kpe, ala kue kue kue ayeke hon.

Jérémie 50:45

Azo, ala ma tënë ti ye so KOTA GBIA agbu li ti lo ti sara na Babilone, tënë ti ye so lo leke na be ti lo ti sara na azo ti kodro ni. Biani, fade a yeke gbu ala ti hon na ala tongana akete bagara. Biani, ndali ti ala, fade a yeke buba ndo ti dutingo ti ala.

Jérémie 50:9

Biani, mbi yeke sara si azo ti amara nde gbani gbani abongbi, mbi yeke tokua ala ti gue ti tiri bira na Babilone. Azo ni ayeke londo na mbage ti Banga ti ga, ala yeke leke tere ti ala ti tiri bira na Babilone si ala yeke mu ni. Ale ti kokora ti azo ni ayeke kiri senge pepe tongana ti so ngangu turugu so ahinga kua ti lo, lo yeke kiri ka na kodro maboko senge pepe.

Jérémie 51:12

Ala yo na nduzu mbeni bendere so afa atene, ala yeke nduru ti tiri bira. Ala zia bendere ni na tere ti agbagba ti Babilone! Ala sara si wungo ti aturugu so ayeke bata ndo ni aga mingi ahon ti kozoni! Ala zia asanziri na tere ti agbagba ni; ala honde azo na ya ti ngonda! Biani, ye so KOTA GBIA aleke na be ti lo ti sara na azo ti Babilone so, lo yeke sara ye alingbi na ni.

Jérémie 51:24

“Me ye so ala yeke baa na le ti ala fadeso ayeke so: sioni so kue Babilone na azo ti Babilone ni asara na gbata ti *Sion, mbi yeke futa azo ni alingbi na ye so ala sara; so tënë ti yanga ti KOTA GBIA laa.

Jérémie 51:35

Azo ti gbata ti *Sion atene: Ayeke nzoni aye ti ngangu so Babilone asara na e akiri na ndö ti lo! Azo ti Jérusalem atene: Ayeke nzoni ngbanga ti mene ti e akiri na ndö ti azo ti Kalde!”

Jérémie 51:36

Tënë so *KOTA GBIA atene ndali ti Jérusalem ayeke so: “Mbi yeke mu tënë ti mo na maboko si azo so asara sioni na mo so, mbi yeke kiri na peko ti sioni ni na ala. Mbi yeke sara titene kota *bale ti lo ahole si ali ti ngu ti lo ahole kue.

Daniel 5:30

Gi na bi ni, azo afâ Baltazar, gbia ti Babilone.

Awayango-sandaga 26:25

Ndali ti mbuki ti mbi so ala buba ni, fade mbi yeke tokua bira na tere ti ala, ala yeke honde tere ti ala na ya ti agbata ti ala, me mbi yeke tokua sioni kobela ti bubango kodro na tere ti ala si mbi yeke zia ala na maboko ti awato ti ala.

Zakarii 14:12

Amara so atiri lani bira na azo ti Jérusalem so, baa, aye ti sioni so KOTA GBIA ayeke sara titene ati na ndö ti ala laa: so ala ngba na le ti ala gi tongaso, fade kasa ti tere ti ala ayeke fun gi fungo, le ti ala ayeke fun na ya ti da ni, menga ti ala ayeke fun na ya ti yanga ti ala.

Zakarii 14:2

Fade KOTA GBIA ayeke bongbi amara kue ti tiri bira na Jérusalem; azo ayeke mu gbata ni, ala yeke nzi aye ti ya ti ada, ala yeke gbu awali na ngangu ti lango na ala; ala yeke gbu ndambo ti azo ti gbata ni ti gue na ala na kodro wande, me tanga ti azo ayeke ngba na ya ti gbata ni.