Jérémie 50:2 - Mbeti ti Nzapa - Tënë so amu fini

² “Ala azo, ala fa tënë ni na popo ti amara nde, ala sara si azo ama tënë ni na lege ti bendere so ala yo na nduzu; ala sara si azo ama tënë ni, ala honde ni pepe! Ala tene: A mu Babilone awe! Kamene ahon ndö ti ayanda ti lo awe! Biani, kamene ahon ndö ti Bel awe, Marduk ati biani biani awe!

Jérémie 50:2 ပူးပေါင်းရင်းမြစ်များ

Abia (Psaumes) 64:9

Tënë ti yanga ti ala akiri na ndö ti ala wani. Azo so kue abaa ala, ayeke yingi li ti ala.

Abia (Psaumes) 96:3

Ala tene tënë ti gonda ti lo na amara nde, ala tene tënë ti akota ye so lo sara na popo ti azo kue.

Abia (Psaumes) 97:7

Azo so kue ayeke voro ayanda, ayeke nzoni kamene agbu le ti ala! Azo so ayeke pika kate ti ala ndali ti abuba yanda ni, ayeke nzoni kamene agbu le ti ala! Ala anzapa kue, ala kuku na gbe ti KOTA GBIA!

Ésaïe 12:4

Na lango ni so, ala yeke tene: “Ala mu singila na KOTA GBIA, ala mu iri lo ti lo na nduzu! Ala tene na azo kue tënë ti akota ye so lo sara, ala dabe ti azo kue na iri ti lo so ayeke kota.

Ésaïe 13:2

*KOTA GBIA atene: “Na ndö ti hoto so ndö ni ayeke senge, ala ya bendere na nduzu, ala dekongo na aturugu, ala sara maboko na ala titene ala ga na yanga ti da ti akota zo.

Ésaïe 21:9

Ala baa, mbeni koli ayeke ga, lo duti na ndö ti pusu ti mbarata so ambarata use laa ayeke gboto ni. Lo kiri lo dekongo, lo tene: ‘Babilone ati awe! Babilone ati awe! Ayanda kue ti anzapa so ayeke na ya ti gbata ni ayeke lango na sese; ya ni afâ kete kete.’ ”

Ésaïe 37:19

Agbia ni abi anzapa ti azo ni na le ti wâ. Andaa, anzapa ni ayeke taa Nzapa pepe, me ala yeke gi ye so maboko ti zo laa asara ni na keke nga na têne; nilaa agbia ti Asirii abuba anzapa ni kue.

Ésaïe 39:1

Na ngoi ni so, Merodak-Baladan, gbia ti Babilone, molenge ti Baladan, ama a tene, tere ti Ezekias aso si lo wara ngangu awe. Tongaso lo tokua na lo mbeti nga na akadoo.

Ésaïe 46:1

Bel akuku awe, Nebo ati awe. A zia ayanda ti ala na ndö ti anyama, na ndö ti abagara. Ando, ala yeke yo ayanda ni ti tambula na ni na ya ti amatanga; fadeso aga nengo kungba na ndö ti anyama so awoko awe.

Ésaïe 48:20

Ala londo na Babilone asigigi! Ala londo hio na popo ti azo ni, ala kpe! Ala dekongo na ngia, ala fa tënë so, ala to mbela na ni ngbii asi na nda ti sese kue, ala tene: “*KOTA GBIA azi Jacob, zo ti kua ti lo awe.”

Ésaïe 48:6

Ye so mbi fa tënë ni lani na ala, ala ma ni awe, ala baa so ye ni asi awe. Ti ala, fade ala yeke fa tënë ni pepe? Fadeso, mbi yeke fa tënë ti afini ye na ala, afini ye so angba na hondengo ni si ala hinga ni pepe so.

Jérémie 10:11

Tënë so ala yeke tene ande na azo ni ayeke so: anzapa so asara yayu na sese pepe so, fade ala yeke ngba na ndö ti sese so pepe, ala yeke ngba na gbe ti yayu pepe.

Jérémie 10:15

Ala yeke asenge senge ye, ala yeke aye so azo ayeke he na ngia. Na lango so KOTA GBIA ayeke ga na tere ti ala, ala kue ayeke hunzi.

Jérémie 31:10

Ala amara nde, ala ma tënë ti KOTA GBIA, ala bi tënë ni na mê ti azo so ayeke na ya ti azoa yongoro kâ. Ala tene: “KOTA GBIA akangbi lani azo ti Israel kirikiri, fadeso lo bongbi ala si lo bata ala tongana wabatango-taba so abata ataba ti lo.”

Jérémie 4:16

Ala dabe ti amara nde na tënë so; ala sara titene azo ti Jérusalem ahinga tënë ni: azo alondo na mbeni kodro yongoro, ala ga ti mu gbata ni na bira. Ala yeke dekongo ti bira si ala yeke ga na tere ti agbata ti Juda.

Jérémie 4:6

Ala yo na nduzu mbeni bendere; ala yo ni na mbage ti *Sion. Ala kpe ahonde tere ti ala! Ala luti na lege pepe! Mbi yeke sara si ye ti mawa na kota kpale so ayeke buba ndo alondo na mbage ti Banga ti ga.

Jérémie 46:14

“Ala azo, ala fa tënë ni na Ezipte; ala sara si azo ama tënë ni na Migdol, na Manfis nga na Tapanes. Ala tene na ala, atene: ‘Ala londo! Ala leke tere ti ala!’ Biani, azo so ayeke nduru na tere ti ala, bira ahunzi ala awe!

Jérémie 50:46

Gi so azo ama tënë ti mungo Babilone awe, sese ayingi, azo ayeke ma dekongo ni na popo ti amara nde.

Jérémie 51:12

Ala yo na nduzu mbeni bendere so afa atene, ala yeke nduru ti tiri bira. Ala zia bendere ni na tere ti agbagba ti Babilone! Ala sara si wungo ti aturugu so ayeke bata ndo ni aga mingi ahon ti kozoni! Ala zia asanziri na tere ti agbagba ni; ala honde azo na ya ti ngonda! Biani, ye so KOTA GBIA aleke na be ti lo ti sara na azo ti Babilone so, lo yeke sara ye alingbi na ni.

Jérémie 51:27

Ala azo, ala yo mbeni bendere na nduzu na ya ti kodro ni, ala huru didi na popo ti amara nde! Ala bongbi amara ti ga na tere ti Babilone; ala iri azo ti akodro-gbia ti Arara, ti Mini na ti Ashekenaz ti ga na tere ti lo. Ala mu ambeni turugu ti kota kamba azia ala titene ala mu aturugu na kua, tongaso si ala tiri bira na Babilone. Ala tokua ambarata gbani gbani tongana agbadola ti gue ti tiri bira na lo.

Jérémie 51:31

Azo ti tokua akpe ague, awara ambeni zo ti tokua, azo ti mungo sango akpe ague awara ambeni zo ti mungo sango; ala gue ti tene na gbia ti Babilone, atene: “A mu gbata ni kue awe;

Jérémie 51:44

KOTA GBIA atene: “Mbi yeke ga na tere ti Bel, nzapa ti Babilone. Ye so Bel angba ti mene, mbi yeke zi ni na yanga ti lo. Amara nde ayeke kiri ti gue gbani gbani na mbage ti lo pepe. Gbagba ti Babilone ati awe.

Jérémie 51:47

Ambeni lango ayeke ga so mbi yeke ga na tere ti ayanda ti Babilone. Kodro ni kue ayeke duti na ya ti kamene. Azo so akui kuâ ti bira, ala yeke ngba ti lango na sese na ya ti gbata ni.

Jérémie 51:52

“Ndani laa, ambeni lango ayeke ga so mbi yeke ga na tere ti ayanda ti Babilone; so tënë ti yanga ti KOTA GBIA laa. Na ya ti kodro ni kue, azo so awara akota ka ayeke dema.

Jérémie 51:8

Me gi hio tongaso, Babilone ati, ya ti lo afâ kue. “Ayeke nzoni ala he bia ti totongo kuâ ndali ti lo. Ala zia mafuta na le ti aka ti lo; e hinga pepe, fade tere ti lo ayeke ga nzoni!”

Jérémie 52:31

Ngu baleota na mbarambara na peko ti so a gbu Yoakin, gbia ti Juda a gue na lo na kodro wande, Evil-Merodak aga gbia ti Babilone. Na lango baleuse na oku ti nze baleoko na use ni, na kozo ngu so lo to nda ti le-gbia, lo sara nzoni be na Yoakin, gbia ti Juda si lo zi lo na da ti kanga.

Jérémie 6:18

Ala ma si, ala azo ti amara nde! Ayeke nzoni ala ma tënë ti ye so ayeke si na azo ti Jérusalem.

Daniel 1:2

KOTA GBIA azia Yoakim, gbia ti Juda na maboko ti Nabukodonosor; lo zia nga lege na Nabukodonosor si lo mu mbeni mbage ti akungba ti ya ti kota da ti Nzapa. Nabukodonosor ague na akungba ni na kodro ti Shinear si lo zia ni na ya ti kubu ti batango amosoro ti lo so ayeke na ya ti da ti anzapa ti lo.

Daniel 3:14

Gbia ahunda ala, atene: “Mbi ma a tene, ala ke ti sara na anzapa ti mbi si ala ke ti voro yanda ti lôro so mbi zia aluti na nduzu so. So ayeke taa-tënë?

Sofonii 2:11

Fade KOTA GBIA ayeke zia kota mbeto na be ti ala, lo yeke hunzi anzapa ti sese kue. Tongaso, ataa amara so kue ayeke na yongoro ndo, ala yeke kuku akpo li ti ala na sese na dawa ti lo, zo oko oko na kodro ti lo.

Aye so Nzapa afa 18:2

Lo dekongo ngangu, lo tene: “Lo ti awe! Babilone, kota gbata ati awe! Lo ga fadeso ndo ti duti ti asioni yingo, ti ayingo ti kirikiri; lo ga ndo ti hondengo tere ti asioni ndeke kue nga na andeke so azo ake ala.