Jérémie 50:14 - Mbeti ti Nzapa - Tënë so amu fini

¹⁴ Ala so kue ayeke pika kokora, ala leke tere ti ala angoro Babilone kue ti tiri bira na lo. Ala pika lo na kokora, ala bata ale ti kokora oko pepe! Biani, Babilone asara sioni ti ke KOTA GBIA.

Jérémie 50:14 ပူးပေါင်းရင်းမြစ်များ

2 Samuel 10:9

Yoab ahinga atene, ambeni zo ti bira ni aluti na dawa ti lo ti tiri na lo si ambeni aluti na peko ti lo. Lo soro akpengba turugu na popo ti azo ti Israel si lo zia ala ti tiri bira na aturugu ti Sirii.

Abia (Psaumes) 51:4

Sukula asioni ti mbi kue; zi siokpari ti mbi si mbi ga *nzoni.

Ésaïe 13:4

Ala ma go ti azo na ndö ti hoto, go ni ayeke tongana go ti gba ti azo. Ala ma wusuwusu na ya ti akodro-gbia, amara nde so abongbi ayeke sara wusuwusu. KOTA GBIA so ayeke na ndö ti dunia kue ayeke hon ti baa aturugu ti lo oko na oko so ayeke gue ti tiri bira.

Ésaïe 5:28

Ala leke yanga ti ale ti kokora ti ala aza, ala gboto ya ti kamba ti kokora ti ala. Asokoto ti gere ti ambarata ti ala akpengba tongana têne, gere ti apusu ti ambarata ti ala ayeke turne wirrr tongana ngangu pupu.

Jérémie 46:9

Ala ambarata, ala londo asara bira! Ala apusu ti mbarata, ala mu loro ngangu! Ala angangu zo ti bira, ala mu li ni! Ala azo ti Etiopii na ti Put, ala so ahinga ti gbu avala, ala azo ti Lud so ahinga ti tiri na kokora, ala nga, ala mu li ni!”

Jérémie 49:14

Mbi ma mbeni tënë so alondo na KOTA GBIA si mbeni watokua ague na ni na amara kue; tënë ni atene: “Ala bongbi tere ti ala! Ala londo ague na tere ti Edom! Ala londo! Ala tiri bira!”

Jérémie 49:35

Tënë so KOTA GBIA so ayeke na ndö ti dunia atene ayeke so: “Mbi yeke fâ ya ti kokora ti azo ti Elam so ayeke sara ngangu ti ala.

Jérémie 50:11

Nzoni ma! Ala sara ngia, ala dodo na ngia, ala so abuba kodro so ayeke ando ti mbi so! Ala huru tongana kete bagara na ya ti fini pere! Ala toto tongana akoli-mbarata!

Jérémie 50:29

Ala iri azo ti pikango kokora kue, ala so ahinga ti pika kokora nzoni ti ga ti tiri bira na Babilone. Ala sara bâbâ ti ala angoro Babilone kue; ala sara si zo oko asigigi akpe pepe! Ala kiri na lo peko ti sioni so lo sara, ala futa lo alingbi na ye so lo sara na amba ti lo! Biani, lani lo sara kuru baba mingi ti ke KOTA GBIA, Nzapa ti Israel so ayeke nde si ayeke nzoni kue.

Jérémie 50:42

Ala gbu akokora na alikongo na maboko ti ala, ala yeke sioni mingi si ala yeke baa mawa ti zo pepe. Toto ti ala ayeke tongana toto ti kota ngu-ingo. Ala ko na ndö ti ambarata si ala leke tere ti ala tongana akoli ti tiri bira na mo, maseka-wali Babilone!

Jérémie 50:7

Azo so kue awara ala ayeke te ala. Awato ti ala ayeke tene: ‘E sara ti e sioni oko pepe! Biani, azo ni laa asara siokpari ti ke KOTA GBIA, lo so lani lo yeke ndo ti dutingo mbirimbiri ti ala, lo so akotara ti ala azia ando be ti ala ti ku lo.’

Jérémie 50:9

Biani, mbi yeke sara si azo ti amara nde gbani gbani abongbi, mbi yeke tokua ala ti gue ti tiri bira na Babilone. Azo ni ayeke londo na mbage ti Banga ti ga, ala yeke leke tere ti ala ti tiri bira na Babilone si ala yeke mu ni. Ale ti kokora ti azo ni ayeke kiri senge pepe tongana ti so ngangu turugu so ahinga kua ti lo, lo yeke kiri ka na kodro maboko senge pepe.

Jérémie 51:2

Mbi yeke tokua awande so fade ayeke ga ti kangbi azo ti kodro ni kirikiri tongana poro ti ale ti kobe so zo ape ya ni. Awande ni ayeke buba ye kue ti kodro ni. Na lango ti aye ti ngangu ni so, ala yeke londo mbage na mbage kue ti ga ti ngoro kodro ni.”

Jérémie 51:27

Ala azo, ala yo mbeni bendere na nduzu na ya ti kodro ni, ala huru didi na popo ti amara nde! Ala bongbi amara ti ga na tere ti Babilone; ala iri azo ti akodro-gbia ti Arara, ti Mini na ti Ashekenaz ti ga na tere ti lo. Ala mu ambeni turugu ti kota kamba azia ala titene ala mu aturugu na kua, tongaso si ala tiri bira na Babilone. Ala tokua ambarata gbani gbani tongana agbadola ti gue ti tiri bira na lo.

Jérémie 51:3

Ayeke nzoni a agboto ya ti kokora na tere ti zo so agboto ya ti kokora ti lo, na tere ti zo so ayu bongo ti wen si lo yeke pika kate ti lo ndali ni. Ala baa mawa ti angangu zo ti bira ti ala pepe! Ala fâ aturugu ni kue kue kue!

Habakuk 2:17

Biani, ye ti ngangu so mo sara na akeke ti Liban, fade ayeke kiri na li ti mo wani; mo fâ anyama mingi, fade anyama ni ayeke zia mbeto na be ti mo. Aye so kue ayeke si ndali ti so mo tuku mene ti azo, mo sara ye ti ngangu na kodro ti azo ni, na gbata ti ala nga na azo ti gbata ni.

Habakuk 2:8

So mo nzi aye ti amara mingi so, fade tanga ti azo so angba so ayeke nzi aye ti mo, ndali ti so mo tuku mene ti azo, mo sara ye ti ngangu na kodro ti azo ni, na gbata ti ala nga na azo ti gbata ni.

Aye so Nzapa afa 17:5

Na ndö ti le ti lo, a su mbeni iri so nda ni angba na hondengo ni: “Kota Babilone, mama ti awali-ndumba, na ti aye ti sioni kue ti ndö ti sese so zo alingbi ti baa na le ti lo fani use pepe.”

1 Samuel 17:20

David alondo na kota ndaperere, lo zia anyama ti lo na mbeni zo ti bata ni; lo mu kungba ti lo si lo gue tongana ti so babâ ti lo amu yanga na lo. Gi so lo yeke si na ya ti bâbâ tongaso, andaa aturugu aleke tere ti ala kue ti tiri bira si ala yeke dekongo ti bira.