Jérémie 46:27 - Mbeti ti Nzapa - Tënë so amu fini

²⁷ “Ti mo Israel, zo ti kua ti mbi, sara mbeto pepe! Mo *hale ti Jacob, mo do na mbeto pepe! Biani, mbi yeke ga ti soo mo na ya ti akodro so ayeke na yongoro ndo; mbi yeke soo nga ahale ti mo na sese so a gbu ala si a gue na ala daa so. Israel, fade mo yeke kiri si mo yeke wara lege ti duti kpoo, mbeni ye sioni ti kiri ti sara mo ayeke daa pepe, mbeni zo ti kiri ti zia mbeto na be ti mo ayeke daa pepe.

Jérémie 46:27 ပူးပေါင်းရင်းမြစ်များ

Ésaïe 14:3

Israel, na peko ti apasi so mo baa, na aye ti ngangu nde nde so asi na mo nga na ngangu kua ti ngbaa so lani a zia mo na gbe ni, mbeni lâ, *KOTA GBIA ayeke sara titene mo wu tere ti mo.

Ésaïe 43:1

Me fadeso mo Jacob, lo so lo sara mo, mo Israel, lo so lo leke mo, tënë so KOTA GBIA atene ayeke so: “Mo sara mbeto pepe, mbi zi mo awe, mbi iri mo na iri ti mo, mo yeke ti mbi.

Ésaïe 43:5

Mo sara mbeto pepe, ngbanga ti so mbi yeke na mo. Kâ na mbage ti To, mbi yeke sara titene *ahale ti mo akiri; kâ na mbage ti Do, mbi yeke bongbi azo ti mo na ndo oko.

Ésaïe 44:1

Me fadeso Jacob, zo ti kua ti mbi, mo ma! Israel, mo so mbi soro mo, mo ma!

Ésaïe 44:2

*KOTA GBIA so asara mo, lo so lo leke mo gi so mo de na ya ti mama ti mo, lo so lo yeke mu maboko na mo, tënë so lo tene ayeke so: Jacob, zo ti kua ti mbi, sara mbeto pepe, mo Yeshurun so mbi soro mo.

Jérémie 23:6

Na ngoi ti lo, fade a yeke soo kodro-gbia ti Juda, mbeni ye ti sioni ti si na Israel ayeke duti daa pepe. Iri so fade azo ayeke iri na lo laa: ‘KOTA GBIA ayeke mbirimbiri ti e.’

Jérémie 29:14

fade mbi yeke zia lege titene ala wara mbi; so tënë ti yanga ti KOTA GBIA laa. Mbi yeke sara titene ala kiri na kozo ndo ti ala; mbi yeke zi ala na ya ti kodro so kue nga na ando so kue mbi kangbi ala ando daa ti bongbi ala na ndo oko; mbi yeke kiri na ala na ndo so a gbu ala ando daa si a gue na ala na kodro wande so’; so tënë ti yanga ti KOTA GBIA laa.

Jérémie 32:37

Lani mbi sara ngonzo na tere ti ala si ngonzo ti mbi ti wâ alondo na tere ti ala. Tongaso, na lege ti sioni ngonzo ti mbi, mbi kangbi ala na ya ti akodro mingi. Me mbi yeke bongbi ala, mbi yeke kiri na ala na ndo so si ala yeke duti na siriri.

Jérémie 33:16

Na lango ni so, fade a yeke soo kodro-gbia ti Juda si mbeni ye ti sioni ti si na Jérusalem ayeke duti daa pepe. Iri so fade azo ayeke iri na lo laa: ‘KOTA GBIA ayeke mbirimbiri ti e.’ ”

Jérémie 50:19

Me ti Israel, mbi yeke sara titene lo kiri na ndo ti tengo pere ti lo. Fade lo yeke wara kobe ti lo ti tengo ni na ndö ti hoto ti Karmel nga na ti Bashan; na sese ti ahoto ti Efraim nga na sese ti Galaad, lo yeke te ye, ya ti lo asi.

Jérémie 51:46

“Be ti ala awoko pepe! Asango so ayeke hon na ya ti kodro ni so, ala sara mbeto ni pepe. Na mbeni ngu, azo ayeke tene mbeni tënë nde, na mbeni ngu, ala yeke tene mbeni tënë nde. Azo ni ayeke tene: na ya ti kodro ni, gi sarango ngangu na azo, mbeni sioni gbia ayeke ga ti tumba mba ti lo na ndö ti mbata…

Ezekiel 16:53

Mbi yeke sara si dutingo ti agbata so akiri aga nzoni tongana ti kozo: Sodome na agbata so ayeke na tere ni, Samarii na agbata so ayeke na tere ni. Ti mo Jérusalem, mbi yeke sara nga si dutingo ti mo aga nzoni tongana ti ala.

Ezekiel 36:24

“Fade mbi yeke zi ala na popo ti amara nde, mbi yeke mu ala na sese nde nde, mbi yeke bongbi ala si mbi yeke kiri na ala na sese ti ala.

Ezekiel 39:25

“Me tënë so mbi Kota Gbia NZAPA, mbi tene ayeke so: Fadeso, mbi yeke sara si gigi ti *ahale ti Jacob aga nzoni, mbi yeke baa mawa ti azo ti Israel kue, mbi yeke sara mbanda ti iri ti mbi so ayeke nde si ayeke nzoni kue so.

Amos 9:14

Fade mbi yeke sara si gigi ti azo ti Israel, azo ti mbi, akiri aga nzoni, ala yeke kiri ti leke agbata so abuba so, ala yeke lango na ya ti agbata ni, ala yeke fâ ayaka ti vinye, ala yeke nyon vin ni; ala yeke fâ ayaka si ala yeke te akobe ni.