Jérémie 36:6 - Mbeti ti Nzapa - Tënë so amu fini

⁶ Me ti mo, mo yeke gue ande kâ na mbeni lango ti kengo kobe. Fade mo yeke diko na mê ti azo so kue ayeke na ya ti kota da ti Nzapa, atënë ti KOTA GBIA so asigigi na yanga ti mbi si mo su na le ti rulo so. Mo yeke diko nga ni na mê ti azo ti Juda so kue alondo na ya ti agbata ti Juda si aga.

Jérémie 36:6 ပူးပေါင်းရင်းမြစ်များ

Jérémie 18:11

“Fadeso, ayeke nzoni mo tene na azo ti Juda na ala so ayeke lango na Jérusalem, mo tene: ‘Tënë so KOTA GBIA atene ayeke so: Mbi yeke leke na be ti mbi mbeni ye ti sara na ala, mbi yeke leke mbeni sioni kpale na tere ti ala. Ayeke nzoni zo oko oko azia sioni lege ti sarango ye ti lo. Ala sara si lege ti dutingo ti ala na sarango ye ti ala akiri aga nzoni!’ ”

Jérémie 19:14

Jérémie alondo na Tofet, ndo so KOTA GBIA atokua fade lo daa ti tene peko ti tënë ti yanga ti lo si lo kiri. So lo kiri awe, lo luti na ya ti gbagba ti kota da ti Nzapa si lo tene na azo ti kodro kue, lo tene:

Jérémie 22:2

Fade mo yeke tene: ‘Gbia ti Juda, mo so mo duti na ndö ti mbata ti gbia David so, ma tënë so KOTA GBIA atene! Tënë ni abaa nga agbenyogbia na azo ti kodro ti mo, ala so kue ayeke li na ayanga ti yangbo so!’

Jérémie 26:2

“Tënë so KOTA GBIA atene ayeke so: Gue mo luti na ya ti gbagba ti kota da ti KOTA GBIA, mo to mbela na tënë so na azo so kue alondo na ya ti agbata ti Juda si aga ti voro Nzapa na ya ti kota da so. Mo tene na ala atënë so kue mbi mu yanga na mo ti tene; mo zi mbeni tënë oko na ya ni pepe.

Jérémie 36:2

“Mu mbeni *rulo so a sara na poro ti nyama, mo su na le ni atënë so kue mbi tene na mo na tere ti akodro ti Israel, ti Juda nga na ti amara kue, ti londo na ngoi ti Yosias ngbii asi laso.

Jérémie 36:4

Jérémie airi Baruk, molenge ti Neria. Jérémie atene na Baruk peko ti atënë kue ti KOTA GBIA si Baruk asu na le ti rulo ni.

Jérémie 7:2

Mo luti na yanga ti da ti KOTA GBIA, mo to mbela na tënë so, mo tene: “Ala azo ti Juda kue, ala so ayeke li na yanga ti da so ti kuku na gbe ti KOTA GBIA, ala ma tënë ti lo si!

Zakarii 8:19

Tënë so KOTA GBIA so ayeke na ndö ti dunia kue atene ayeke so: “Alango ti kengo kobe so ala azo ti Juda, ala yeke ke na ya ti osio nze ni, oku nze ni, mbarambara nze ni nga na nze baleoko ni ti ngu oko oko, fade alango ni so ayeke kiri ti ga alango ti matanga, alango ti ngia na ti kota ngia nga na ti nzoni matanga. “Me ayeke nzoni ala ye taa-tënë nga na siriri.”

Awatokua 27:9

So alango mingi ahon awe, tambulango na le ti ngu aga sioni, ngbanga ti so ngoi ti de asi awe. Andaa lango ti kengo kobe na ngoi ni so ahon awe, nilaa Paul amu wango na ala, lo tene: