Jérémie 33:13 - Mbeti ti Nzapa - Tënë so amu fini

¹³ Na ya ti agbata ti Kodro-ti-nduzu na ti agbata ti *Kodro-ti-gbeni na ti Negev, na sese ti Benjamin, na ya ti akodro so angoro Jérusalem nga na ya ti agbata ti Juda, fade ataba na angasa ayeke kiri na gbe ti maboko ti wabatango ala so ayeke diko ala”; tënë so KOTA GBIA atene laa.

Jérémie 33:13 ပူးပေါင်းရင်းမြစ်များ

Jérémie 17:26

Tongaso nga, fade azo ayeke londo na ya ti agbata ti Juda, na ya ti akodro so angoro Jérusalem nga na sese ti Benjamin ti ga; ambeni ayeke londo na *Kodro-ti-gbeni, na Kodro-ti-nduzu nga na sese ti Negev ti ga. Ala yeke ga na ya ti kota da ti Nzapa ti mu na KOTA GBIA amara ti *sandaga nde nde: sandaga so a yeke gbi ni kue na wâ, asenge sandaga, sandaga ti ale ti kobe wala ti dukani na sandaga ti mungo singila.

Jérémie 31:12

Fade ala yeke ga, ala yeke dekongo na ngia na ndö ti hoto ti *Sion; yanga ti ala ayeke na ngia ti wara anzoni ye so KOTA GBIA ayeke mu na ala: ble, fini vin, mafuta, ataba, angasa na abagara. Fini ti ala ayeke duti tongana yaka so a tuku ngu daa; ala yeke kiri ti woko pepe.

Jérémie 32:15

“Biani, tënë so KOTA GBIA so ayeke na ndö ti dunia kue, Nzapa ti Israel atene ayeke so: ‘Na ya ti kodro so, fade azo ayeke kiri ti vo ada, ayaka na ayaka ti *vinye.’ ”

Jérémie 32:44

Biani, fade azo ayeke kiri ti vo ayaka na sese ti Benjamin, na ya ti akodro so angoro Jérusalem, na ya ti agbata ti Juda, na ya ti agbata ti Kodro-ti-nduzu, agbata ti *Kodro-ti-gbeni na ti Negev. Ala yeke su ambeti ti vongo yaka ni, ala yeke kpo anzoroko na ndö ti ambeti ni ti kanga na yanga ni, ala yeke iri azo ti duti na tere ni. Biani, fade mbi yeke kiri na agbata ni na kozo ndo ti ala; so tënë ti yanga ti KOTA GBIA laa.”

Ezekiel 20:37

Fade mbi yeke sara si ala hon na gbe ti keke ti wabatango-taba si mbi yeke li na ala na ya ti *mbuki so akanga mbi na ala.

Awayango-sandaga 27:32

Âdu ti abagara, ataba na angasa, fade a yeke zia nzoroko na tere ti nyama oko na popo ti anyama baleoko si a yeke zia oko ni nde ndali ti KOTA GBIA.

Abdias 1:20

Azo ti Israel so a gbu ala na ngbaa ayeke ga tongana gba ti aturugu si ayeke mu sese so alondo na Kanaan ague ngbii asi na Sarepta. Azo ti Jérusalem so a gbu ala na ngbaa si a gue na ala na Sefarad ayeke mu agbata so ayeke na mbage ti Mbongo.

Nzoni Tënë so Luc asu na mbeti 15:4

“Na popo ti ala, tongana mbeni zo ayeke na ataba ngbangbo oko si mbeni oko agirisa, lo yeke zia atanga ni balegumbaya na gumbaya na benyama ti gue ti gi lo so agirisa so, ngbii lo wara lo si pepe?