Jérémie 32:37 - Mbeti ti Nzapa - Tënë so amu fini

³⁷ Lani mbi sara ngonzo na tere ti ala si ngonzo ti mbi ti wâ alondo na tere ti ala. Tongaso, na lege ti sioni ngonzo ti mbi, mbi kangbi ala na ya ti akodro mingi. Me mbi yeke bongbi ala, mbi yeke kiri na ala na ndo so si ala yeke duti na siriri.

Jérémie 32:37 ပူးပေါင်းရင်းမြစ်များ

Abia (Psaumes) 106:47

KOTA GBIA Nzapa ti e, mo soo e maa! Zi e na popo ti amara nde, mo bongbi e na ndo oko, tongaso fade e yeke sepela iri ti mo so ayeke nde si ayeke nzoni kue. Fade e yeke pika kate ti e, ngbanga ti so e yeke sepela mo.

Jérémie 12:14

Tënë so KOTA GBIA atene ayeke so: “Asioni zo so ayeke lango nduru na azo ti mbi, ala ndu ye so aga ye ti mbi, ala ndu sese so mbi mu ando na Israel, azo ti mbi. Fade mbi yeke gboto azo ni na ndö ti sese ti ala tongana ti so a yeke gboto pere; mbi yeke gboto nga azo ti Juda na popo ti ala.

Jérémie 16:14

“So tënë ti yanga ti *KOTA GBIA laa: Biani, mbeni lango ayeke ga so fade azo ayeke kiri ti tene pepe: ‘Na iri ti KOTA GBIA so ayeke na fini, lo so lo sara si azo ti Israel asigigi na sese ti Ezipte!’,

Jérémie 16:15

me azo ni ayeke tene: ‘Na iri ti KOTA GBIA so ayeke na fini, lo so lo sara si azo ti Israel asigigi na kodro so ayeke na mbage ti Banga nga na akodro so lo tumba ala ando titene ala gue daa so!’ Fade mbi yeke sara si ala kiri na ndö ti sese so mbi mu ando na akotara ti ala.”

Jérémie 21:5

Mbi wani laa mbi yeke tiri na ala, azo ti Juda, na lege ti maboko ti mbi so mbi yoro, na lege ti ngangu ti maboko ti mbi. Mbi yeke tiri na ala na lege ti ngonzo ti mbi, ngonzo ti mbi ti wâ nga na kota ngonzo ti mbi.

Jérémie 23:3

“Na pekoni, mbi wani, mbi yeke bongbi tanga ti ataba ti mbi na ya ti akodro so kue mbi kangbi ando ala daa. Fade mbi yeke kiri na ala na ndo ti tengo pere ti ala. Kâ, ala yeke kiri ti du mingi si ala ga gbani gbani.

Jérémie 23:6

Na ngoi ti lo, fade a yeke soo kodro-gbia ti Juda, mbeni ye ti sioni ti si na Israel ayeke duti daa pepe. Iri so fade azo ayeke iri na lo laa: ‘KOTA GBIA ayeke mbirimbiri ti e.’

Jérémie 23:8

Me azo ni ayeke tene: ‘Na iri ti KOTA GBIA so ayeke na fini, lo so lo sara si ahale ti Israel asigigi na kodro ti mbage ti Banga nga na akodro so kue lo kangbi ando ala daa. Fade ala yeke kiri ti duti na ndö ti sese ti ala wani!’ ”

Jérémie 24:6

Fade mbi yeke baa ala na nzoni le si mbi yeke kiri na ala na ya ti kodro so. Mbi yeke kiri ti kungbi ala na sese pepe, me mbi yeke leke ala na nduzu; mbi yeke kiri ti gboto ala pepe tongana ti so a yeke gboto pere na gunda ni kue, me mbi yeke lu ala tongana ti so a yeke lu keke.

Jérémie 29:14

fade mbi yeke zia lege titene ala wara mbi; so tënë ti yanga ti KOTA GBIA laa. Mbi yeke sara titene ala kiri na kozo ndo ti ala; mbi yeke zi ala na ya ti kodro so kue nga na ando so kue mbi kangbi ala ando daa ti bongbi ala na ndo oko; mbi yeke kiri na ala na ndo so a gbu ala ando daa si a gue na ala na kodro wande so’; so tënë ti yanga ti KOTA GBIA laa.

Jérémie 30:18

Tënë so KOTA GBIA atene ayeke so: “Fade mbi yeke sara si azo ti da ti Jacob akiri na kozo ndo ti ala; mbi yeke baa mawa ti da ti ala. Gbata so lani abuba, a yeke kiri ti leke ni na ndö ti angbene da so atuku na sese; a yeke kiri ti sara apendere da gi na oko ndo so lani ada ni ayeke daa so.

Jérémie 31:10

Ala amara nde, ala ma tënë ti KOTA GBIA, ala bi tënë ni na mê ti azo so ayeke na ya ti azoa yongoro kâ. Ala tene: “KOTA GBIA akangbi lani azo ti Israel kirikiri, fadeso lo bongbi ala si lo bata ala tongana wabatango-taba so abata ataba ti lo.”

Jérémie 32:15

“Biani, tënë so KOTA GBIA so ayeke na ndö ti dunia kue, Nzapa ti Israel atene ayeke so: ‘Na ya ti kodro so, fade azo ayeke kiri ti vo ada, ayaka na ayaka ti *vinye.’ ”

Jérémie 33:16

Na lango ni so, fade a yeke soo kodro-gbia ti Juda si mbeni ye ti sioni ti si na Jérusalem ayeke duti daa pepe. Iri so fade azo ayeke iri na lo laa: ‘KOTA GBIA ayeke mbirimbiri ti e.’ ”

Jérémie 33:7

Mbi yeke sara titene azo ti Juda na azo ti Israel akiri na kozo ndo ti ala, mbi yeke kiri ti leke ala na nduzu tongana ti kozoni.

Ezekiel 11:17

Tongaso, mo tene na ala, mo tene: Tënë so mbi Kota Gbia NZAPA, mbi tene ayeke so: ‘Fade mbi yeke zi ala na popo ti amara nga na ya ti akodro so mbi kangbi ala daa ti bongbi ala; mbi yeke kiri ti mu na ala sese ti Israel.

Ezekiel 20:34

Na lege ti ngangu ti maboko ti mbi nga na lege ti maboko ti mbi so mbi yoro, na lege ti ngonzo ti mbi ti wâ so mbi tuku na ndö ti ala, mbi yeke sara si ala sigigi na popo ti amara ni; mbi yeke mu ala na ya ti akodro so ala kangbi lani daa ti bongbi ala na ndo oko.

Ezekiel 28:25

“Tënë so mbi Kota Gbia NZAPA, mbi tene ayeke so: Lani, mbi sara si azo ti Israel akangbi na popo ti amara; fade mbi yeke mu ala na popo ti amara ni, ti bongbi ala na ndo oko. Na lege ti azo ti Israel, mbi yeke fa na le ti amara nde so mbi yeke Nzapa so mbi yeke nde si mbi yeke nzoni kue. Fade azo ti Israel ayeke duti na sese ti ala, sese so mbi mu ando na Jacob, zo ti kua ti mbi.

Ezekiel 28:26

Kâ, ala yeke duti na siriri, ala yeke sara ada, ala yeke fâ ayaka ti *vinye; ala yeke duti na siriri na ndembe so mbi yeke fâ ngbanga na li ti azo so ayeke baa azo ti Israel ni tongana mbumbuse ye. Fade ala yeke hinga atene, mbi laa mbi yeke KOTA GBIA, Nzapa ti ala.”

Ezekiel 36:24

“Fade mbi yeke zi ala na popo ti amara nde, mbi yeke mu ala na sese nde nde, mbi yeke bongbi ala si mbi yeke kiri na ala na sese ti ala.

Osée 3:5

Na pekoni, azo ti Israel ayeke kiri ti gi KOTA GBIA, Nzapa ti ala nga na David, gbia ti ala. Gbanda, fade ala yeke do na mbeto si ala yeke kiri na mbage ti KOTA GBIA ti wara anzoni ye ti lo.

Sofonii 3:20

Na ngoi ni so, mbi yeke kiri na ala; gi na ngoi ni so, mbi yeke bongbi ala na ndo oko. Gi na le ti ala wani, mbi yeke sara titene gigi ti ala akiri aga nzoni. Mbi yeke sara titene azo ane ala si iri ti ala awu, amu ndo na popo ti azo ti sese kue.” Tënë so KOTA GBIA atene laa.

Zakarii 14:11

Fade azo ayeke lango na ya ti gbata ni; a yeke kiri ti buba ni pepe; azo ayeke duti kâ na siriri.

Zakarii 3:10

Na lango ni so, fade ala yeke tisa tere na popo ti ala ti ga ti duti na siriri na gbe ti akeke ti *vinye ti ala nga na gbe ti akeke ti fige ti ala; so tënë ti yanga ti KOTA GBIA so ayeke na ndö ti dunia kue laa.”