Jérémie 29:14 - Mbeti ti Nzapa - Tënë so amu fini

¹⁴ fade mbi yeke zia lege titene ala wara mbi; so tënë ti yanga ti KOTA GBIA laa. Mbi yeke sara titene ala kiri na kozo ndo ti ala; mbi yeke zi ala na ya ti kodro so kue nga na ando so kue mbi kangbi ala ando daa ti bongbi ala na ndo oko; mbi yeke kiri na ala na ndo so a gbu ala ando daa si a gue na ala na kodro wande so’; so tënë ti yanga ti KOTA GBIA laa.

Jérémie 29:14 ပူးပေါင်းရင်းမြစ်များ

1 Mbai 28:9

– Ti mo, molenge ti mbi Salomon, ayeke nzoni mo hinga Nzapa ti babâ ti mo; mo sara na lo na be ti mo kue, tere ti mo ayapu na kua, ngbanga ti so KOTA GBIA laa ayeke baa ya ti be ti zo si lo hinga tënë ti be ti zo. Tongana mo gi lo, fade lo yeke zia lege na mo ti wara lo; me tongana mo zia lo, fade lo yeke ke mo kpu na kpu.

Abia (Psaumes) 126:1

A yeke he bia so na ndembe ti guengo ni na Jérusalem. So *KOTA GBIA amu azo so a agbu ala a gue na ala na kodro wande si lo kiri na ala na *Sion, e baa ye ni tongana bango-li.

Abia (Psaumes) 126:4

KOTA GBIA, azo so a gbu ala na popo ti e a gue na ala na kodro wande so, mo kiri na ala; sara si ala ga tongana angu ti mbage ti Mbongo so akiri ayeke sua.

Abia (Psaumes) 32:6

Nilaa zo so kue ayeke zo ti mo, alingbi lo sambela mo na lango so lo hinga sioni ti lo. Ataa akpale aga tongana ngu so asuku amu ndo kue, fade akpale ni ayeke si na lo pepe.

Abia (Psaumes) 46:1

Bia ti azo ti Kore; bia so ayeke ndali ti makonzi-bia. A he ni na aye ti mozoko so atoto na nduzu

Ésaïe 14:1

Biani, fade *KOTA GBIA ayeke baa mawa ti Jacob; lo yeke kiri ti soro Israel. Lo yeke zia azo ti Israel ti duti na kodro ti ala wani. Awande ayeke bongbi oko na ala si ala kue ayeke ga azo ti Jacob.

Ésaïe 43:5

Mo sara mbeto pepe, ngbanga ti so mbi yeke na mo. Kâ na mbage ti To, mbi yeke sara titene *ahale ti mo akiri; kâ na mbage ti Do, mbi yeke bongbi azo ti mo na ndo oko.

Ésaïe 43:6

Fade mbi yeke tene na Banga: ‘Kiri na ala’, mbi yeke tene na Mbongo: ‘Gbanzi ala pepe.’ Amolenge ti mbi ti koli so ayeke na yongoro ndo, mo kiri na ala; amolenge ti mbi ti wali so ayeke na nda ti sese kâ, mo kiri na ala.

Ésaïe 45:19

Mbi tene tënë na hondengo ni pepe, na mbeni ndo na sese so avuko vukongo. Mbi tene na *ahale ti Jacob pepe, mbi tene: Ala gi mbi na ndo so angba senge! Mbi KOTA GBIA, mbi yeke tene tënë ti ye so ayeke mbirimbiri, mbi yeke tene tënë ti ye so ayeke na legeni.”

Ésaïe 55:6

Ala gi *KOTA GBIA na ndembe so ala lingbi ti wara lo. Ala iri lo na ndembe so lo yeke nduru na ala.

Jérémie 12:15

Me na peko ti so mbi gboto ala na ndö ti sese ni awe, mbi yeke kiri ti baa mawa ti azo ni si mbi yeke kiri na zo oko oko na ndö ti sese ti lo nga na ya ti kodro ti lo.

Jérémie 3:14

“Amolenge ti pupulenge, ala kiri maa! Biani, mbi yeke wa ti ala; so tënë ti yanga ti *KOTA GBIA laa. Fade mbi yeke mu na popo ti ala, zo oko na ya ti mbeni gbata, zo use na ya ti mbeni kete mara ti kiri na ala na *Sion.

Jérémie 30:10

“Ti mo Israel, zo ti kua ti mbi, sara mbeto pepe! So tënë ti yanga ti KOTA GBIA laa. Mo hale ti Jacob, mo do na mbeto pepe! Biani, mbi yeke ga ti soo mo na ya ti akodro so ayeke na yongoro ndo; mbi yeke soo nga ahale ti mo na sese so a gbu ala si a gue na ala daa so. Israel, fade mo yeke kiri si mo yeke wara lege ti duti kpoo, mbeni sioni ye ti kiri ti sara mo ayeke daa pepe, mbeni zo ti kiri ti zia mbeto na be ti mo ayeke daa pepe.

Jérémie 30:18

Tënë so KOTA GBIA atene ayeke so: “Fade mbi yeke sara si azo ti da ti Jacob akiri na kozo ndo ti ala; mbi yeke baa mawa ti da ti ala. Gbata so lani abuba, a yeke kiri ti leke ni na ndö ti angbene da so atuku na sese; a yeke kiri ti sara apendere da gi na oko ndo so lani ada ni ayeke daa so.

Jérémie 30:3

So tënë ti yanga ti KOTA GBIA laa: Mbeni lango ayeke ga so mbi yeke sara titene azo ti Israel na azo ti Juda so ayeke azo ti mbi akiri na kozo ndo ti ala. Fade mbi yeke kiri na ala na ya ti kodro so mbi mu ando na akotara ti ala; ala yeke kiri ti mu ni titene aga ye ti ala; mbi KOTA GBIA laa, mbi tene.”

Jérémie 31:16

Me tënë so KOTA GBIA atene ayeke so: “Awe-oo! Kiri mo dema tere ti mo pepe! Kiri mo toto pepe! Fade mo yeke wara futa ti kua ti mo; so tënë ti yanga ti KOTA GBIA laa. Amolenge ti mo ayeke londo na ndo ti awato ti ala ti kiri.

Jérémie 31:17

Mo lingbi ti zia be ti mo ti ku anzoni ye ndali ti gigi ti mo ti gbanda; so tënë ti yanga ti KOTA GBIA laa: Fade amolenge ti mo ayeke kiri na sese ti ala.

Jérémie 31:23

Tënë so *KOTA GBIA so ayeke na ndö ti dunia kue, Nzapa ti Israel atene ayeke so: “Tongana mbi sara titene kodro ti Juda na agbata ti Juda akiri na kozo ndo ti ala, tënë so azo ayeke kiri ti tene laa: ‘Ayeke nzoni KOTA GBIA asara tufa na ndö ti mo, hoto ti *Sion so mo yeke nde si mo yeke nzoni kue; mo yeke ndo ti mbirimbiri!’

Jérémie 51:10

KOTA GBIA afa mbirimbiri ti e polele. E gue na *Sion, e fa peko ti ye so KOTA GBIA Nzapa ti e asara!”

Jérémie 8:3

Ti tanga ti asioni zo ni, ala so angba na fini, na ndo so kue mbi yeke kangbi ala daa kirikiri, ye so ala yeke ye, ayeke titene ala kui ahon titene ala ngba na fini; so tënë ti yanga ti KOTA GBIA so ayeke na ndö ti dunia kue laa.”

Ezekiel 37:21

Na pekoni, mo tene na ala: Tënë so Kota Gbia NZAPA atene ayeke so: Ala azo ti Israel, mbi yeke zi ala na popo ti amara nde so ala gue na ndo ti ala nga na ando nde nde, mbi yeke bongbi ala si mbi yeke kiri na ala na sese ti ala.

Ezekiel 39:25

“Me tënë so mbi Kota Gbia NZAPA, mbi tene ayeke so: Fadeso, mbi yeke sara si gigi ti *ahale ti Jacob aga nzoni, mbi yeke baa mawa ti azo ti Israel kue, mbi yeke sara mbanda ti iri ti mbi so ayeke nde si ayeke nzoni kue so.

Amos 9:14

Fade mbi yeke sara si gigi ti azo ti Israel, azo ti mbi, akiri aga nzoni, ala yeke kiri ti leke agbata so abuba so, ala yeke lango na ya ti agbata ni, ala yeke fâ ayaka ti vinye, ala yeke nyon vin ni; ala yeke fâ ayaka si ala yeke te akobe ni.

Mishe 4:12

Tënë so ayeke na be ti KOTA GBIA, azo ni ahinga ni oko pepe; ye so lo leke na be ti lo ti sarango ni, ala hinga ni oko pepe: lo ye ti bongbi ala tongana ti so a yeke bongbi ale ti kobe na le ti lakere titene a pika ni so.

Sofonii 3:20

Na ngoi ni so, mbi yeke kiri na ala; gi na ngoi ni so, mbi yeke bongbi ala na ndo oko. Gi na le ti ala wani, mbi yeke sara titene gigi ti ala akiri aga nzoni. Mbi yeke sara titene azo ane ala si iri ti ala awu, amu ndo na popo ti azo ti sese kue.” Tënë so KOTA GBIA atene laa.

Rome 10:20

Ésaïe atene tënë ni na mbeto pepe, lo tene: “Azo so agi mbi pepe, ala laa awara mbi; azo so ahunda ye na mbi pepe, ala laa mbi fa tere ti mbi na ala.”

Ndia ti fani use ni 30:1

Moïse atene: Aye so kue mbi tene tënë ni na ala so ayeke si ande: atënë ti tufa na atënë ti dengo ba so. Na ndembe so *KOTA GBIA Nzapa ti ala ayeke kangbi ala na popo ti amara nde, fade ala yeke gbu li ti ala na ndö ti aye ni so.

Ndia ti fani use ni 30:3

Tongaso, fade KOTA GBIA ayeke sara titene dutingo ti ala aga nde na ti kozoni, lo yeke baa mawa ti ala si lo yeke zi ala na popo ti amara so kue lo kangbi ala lani daa ti kiri ti bongbi ala na ndo oko.

Ndia ti fani use ni 30:5

Fade KOTA GBIA Nzapa ti ala ayeke kiri na ala na sese so akotara ti ala amu ando titene aga ti ala; ala, azo ti Israel, ala yeke kiri ti mu sese ni titene aga ti ala. KOTA GBIA ayeke sara si ala duti nzoni, ala wu mingi ahon akotara ti ala.

Ndia ti fani use ni 4:7

KOTA GBIA Nzapa ti e ayeke lakue nduru na e tongana e iri lo ti mu maboko na e. Mbeni kota mara nde ayeke daa so anzapa ti lo ayeke nduru na lo tongana ti e so?