Jérémie 25:6 - Mbeti ti Nzapa - Tënë so amu fini

⁶ Ala mu peko ti anzapa nde pepe ti voro ala, ala kuku nga na gbe ti ala pepe; ala zia ngonzo na be ti mbi pepe ndali ti ayanda so ala leke ni so. Tongaso, fade mbi yeke sara sioni na ala oko pepe.

Jérémie 25:6 ပူးပေါင်းရင်းမြစ်များ

1 Agbia 14:22

Azo ti mara ti Juda asara ye so ayeke sioni na le ti KOTA GBIA. Ala sara si ngonzo ti lo alondo na lege ti siokpari so ala sara ahon ti akotara ti ala.

2 Agbia 17:35

KOTA GBIA asara ando *mbuki na ala si lo mu yanga na ala, lo tene: “Fade ala voro ambeni nzapa nde pepe, ala kuku na gbe ti ala pepe, ala sara kua na anzapa ni so pepe, ala mu asandaga na ala pepe.

Sigingo 20:23

Alingbi ala mu wen ti nginza wala lôro, ala leke na ambeni nzapa nde ti zia na tere ti mbi pepe; ala sara ambeni nzapa nde ndali ti ala wani pepe.

Sigingo 20:3

“Alingbi mo voro ambeni nzapa nde pepe, gi mbi oko.

Jérémie 32:30

“Biani, so tënë ti yanga ti KOTA GBIA laa: Ti londo na ngoi so ala ga mara ngbii asi laso, azo ti Israel na azo ti Juda asara gi ye so ayeke sioni na le ti mbi. Ye so kue azo ti Israel asara azia gi ngonzo na be ti mbi.

Jérémie 35:15

Mbi mu ngoi ti mbi kue ti tokua na ala azo ti kua ti mbi, awayanga-Nzapa ti tene na ala, azo ti Juda, atene: ‘Ayeke nzoni zo oko oko azia sioni lege ti sarango ye ti lo; ala sara si sarango ye ti ala akiri aga nzoni; ala mu peko ti anzapa nde pepe ti voro ala. Tongaso, fade ala yeke ngba ti duti na ya ti kodro so mbi mu na ala, ala na akotara ti ala.’ Me ala dingi mê ti ala kete pepe, ala ma mbi pepe.

Jérémie 44:7

“Fadeso, tënë so KOTA GBIA, Nzapa so ayeke na ndö ti dunia kue, Nzapa ti Israel atene ayeke so: ‘Ala ngba ti sara sioni gbani gbani na ala wani tongaso ngbanga ti nyen? Ala ye ti hunzi azo ti mara ti Juda hunzingo: akoli, awali, amaseka na amolenge so angba ti nyon me? Ala ye titene mbeni zo oko ti ala akiri angba na fini pepe?

Jérémie 44:8

Ala ye ti zia ngonzo na be ti mbi na lege ti asarango ye ti ala? Biani, ala mu asandaga na anzapa nde na kodro ti Ezipte so ala ga aduti daa so! Ala ye ti hunzi kue titene ala ga tapande ndali ti azo so ayeke deba amba ti ala na ye ti kamene ndali ti amara kue ti dunia?

Jérémie 7:6

tongana mbeni wande, wala nyindu, wala wali-mua ayeke na popo ti ala, ala sara ngangu na ala pepe; azo so tënë ayeke na li ti ala pepe, ala tuku mene ti ala na ndo so pepe; ala mu peko ti anzapa nde pepe, ngbanga ti ala wara kpale.

Jérémie 7:9

So nyen! Ala yeke nzi, ala yeke fâ azo, ala yeke lango na akoli wala awali ti amba ti ala. Ala yeke de aba ti mvene, ala yeke zö dukani na *Baal, ala yeke mu peko ti anzapa so ala hinga ala kozoni pepe.

Osée 1:7

Me ti azo ti Juda, fade mbi yeke ngba ti ye ala. Mbi wani, KOTA GBIA Nzapa ti ala, mbi yeke soo ala; mbi yeke soo ala na lege ti kokora pepe, wala na lege ti yongoro zeme pepe, wala na lege ti bira pepe, wala na lege ti ambarata pepe, wala na lege ti azo ti kpengo na mbarata pepe.”

Ndia ti fani use ni 13:2

Moïse atene: Mbeni ye tongaso alingbi ti si: mbeni zo ti bango aye na ya ti bango-li, wala mbeni wayanga-Nzapa ayeke londo na popo ti ala; lo lingbi ande ti sara aye ti kpene na aye ti dongo be.

Ndia ti fani use ni 28:14

alege so mbi fa na ala, fade ala yeke zia ni ti hon mbage na mbage pepe, ala yeke mu peko ti ambeni nzapa nde pepe ti voro ala.

Ndia ti fani use ni 6:14

Ala yeke mu peko ti anzapa nde pepe, anzapa ti amara so angoro ala,

Ndia ti fani use ni 8:19

Tongana be ti ala agirisa na KOTA GBIA Nzapa ti ala, tongana ala mu peko ti ambeni nzapa nde, tongana ala voro anzapa ni so, tongana ala kuku na gbe ti ala, mbi tene na ala laso biani: fade ala yeke kui kue.

Josué 24:20

Tongana ala zia KOTA GBIA ti sara kua na ambeni nzapa nde, fade lo yeke kiri na ndö ti ala ti sara sioni na ala, lo yeke fâ ala ti hunzi ala na peko ti nzoni so lo sara na ala.”