Jérémie 13:27 - Mbeti ti Nzapa - Tënë so amu fini

²⁷ Asarango ye ti ndumba ti mo, totongo ti mo tongana ti mbarata so ayeke toto na peko ti wali-mbarata so, asarango ye ti ndumba ti mo na li ti ahoto, nga na ya ti ayaka ayeke mu kamene na zo! Mbi baa afungo nzapa ti mo so kue! So ye ti mawa ti nyen, Jérusalem! Mo ye ti ga *nzoni pepe! Mo yeke ngba ti sara ye tongaso ngbii asi lawa?”

Jérémie 13:27 ပူးပေါင်းရင်းမြစ်များ

Abia (Psaumes) 94:4

Ala yeke diko atënë ti baba, ala yeke tene atënë ti zonga, ala yeke pika kate ti ala, azo ti sarango sioni so kue so.

Abia (Psaumes) 94:8

Ala abuba zo so, mbeni zo ti buba ti lingbi na ala ayeke daa? Ala sara hange si! Ala, azo so li ti ala ayeke daa pepe so, ala yeke hinga ande ndo lawa?

Amato 1:22

“Ala azo so le ti ala ahan pepe so, ala ye ti ngba tongaso ngbii asi lawa? Ala azo ti hengo ndo, ala yeke ngba ti he ndo ngbii asi lawa? Ala azo so ahinga ndo pepe so, ala yeke ke ti hinga ye ngbii asi lawa?

Ésaïe 57:7

Mo leke gbogbo ti mo na ndö ti akota hoto so ayo na nduzu. Kâ laa mo gue ti ya asandaga.

Ésaïe 65:7

Mbi KOTA GBIA, mbi tene: Mbi yeke futa ala alingbi na sioni ti ala wani nga na sioni ti akotara ti ala. Akotara ti ala ayeke zö ando yombo na li ti ahoto, ala yeke zonga mbi na li ti akete hoto. Tongaso, mbi yeke futa ala sioni sioni ndali ti aye so ala sara ando so.”

Jérémie 11:15

KOTA GBIA atene: “Azo so mbi ye ala mingi so, ala kiri asara ye na mayere mingi. Ala ga ti sara nyen na ya ti da ti mbi? Ala baa atene, azendo so ala mu nga na asandaga so ala yeke ya na mbi so, ni laa alingbi ti kanga lege na kpale ni? Ni laa alingbi ti zi ala na ya ti kpale ni?

Jérémie 3:6

Na ngoi ti gbia Yosias, *KOTA GBIA atene na mbi: “Mo baa ye so Israel-wali-pupulenge asara so? Lo gue na li ti ahoto so kue ayo na nduzu, lo si na gbe ti afini keke so kue kugbe ni ayeke gbani gbani ti sara aye ti ndumba kâ.

Ezekiel 16:23

“Na peko ti sioni so kue mo sara, so mawa na mo! Ae, so mawa na mo! So tënë ti yanga ti Kota Gbia NZAPA laa.

Ezekiel 2:10

Maboko ni azi ya ti mbeti ni na le ti mbi. A su mbeti na le ti *rulo ni na ya ni nga na peko ni kue. Abia ti demango tere, atënë ti toto na ti dema laa a su na le ni.

Ezekiel 20:28

Mbi sara si ala li na kodro so mbi yoro lani maboko ti mbi na nduzu, mbi deba yanga ti mbi ti mu na ala. Na ya ti kodro ni, le ti ala agi ndo so akete hoto kue ayeke daa nga na akeke so gba ti akugbe ayeke daa. Kâ laa, ala mu asandaga ti ala, ala mu amatabisi ti ala ti gingo na yanga ti mbi, ala mu asandaga so fion ni afun nzoni nga na sandaga ti samba.

Ezekiel 24:12

Me angangu so kue ayeke senge senge. Ataa so a zia na wâ, gba ti soko ni ahon pepe.

Ezekiel 24:13

Jérusalem, mo ga *sioni ndali ti sarango ye ti potopoto ti mo. Mbi sukula mo titene mo ga *nzoni, me mbi sara gbaa. Tongaso, kozo titene mo ga *nzoni, fade ngonzo ti mbi ti wâ ayeke londo na tere ti mo ngbii be ti mbi ade si.

Ezekiel 24:6

Ndani laa, tënë so mbi Kota Gbia NZAPA, mbi tene ayeke so: Mawa na gbata ti fango zo! Lo yeke tongana tawa so *soko ate tere ni, tawa so soko ti tere ni alingbi ti londo pepe. Mo zi akasa ni oko na oko na ya ni; mo bi mbeni ye pepe ti hinga kasa wa laa mo yeke zi.

Ezekiel 36:25

Mbi yeke tuku *nzoni ngu na ndö ti ala si ala ga *nzoni. Mbi yeke *sukula asioni ti ala kue, mbi yeke zi ayanda ti ala.

Ezekiel 36:37

“Tënë so mbi Kota Gbia NZAPA, mbi tene ayeke so: Mbi yeke kiri ti zia lege na azo ti Israel ti gi mbi si mbi yeke sara ye ndali ti ala; mbi yeke sara titene ala kiri awu mingi tongana bongbi ti ataba.

Ezekiel 6:13

Fade kuâ ti ala ayeke lango na sese gbani gbani na popo ti ayanda ti ala, kuâ ni ayeke lango na sese angoro tere ti agbalaka ti ala, na ndö ti akota hoto na akete hoto kue, na gbe ti akeke so akugbe ni angba fini ni nga na gbe ti akeke so kue kugbe ni ayeke gbani gbani, na ando so kue ala yeke zö ayombo so fion ni anzere na ayanda ti ala kue. Tongaso, fade ala yeke hinga atene, mbi laa mbi yeke KOTA GBIA.

Osée 1:2

So ayeke tongo nda ti atënë so *KOTA GBIA azia na yanga ti Osée ti tene na azo ti lo laa. Lo tene na Osée: “Gue, mo mu mbeni wali-ndumba titene lo ga wali ti mo si lo du na mo amolenge ti ndumba. Biani, azo ti kodro ni ake KOTA GBIA; so sarango aye ti ndumba ti ala laa.”

Osée 4:2

Ye so ahon ndoni na ya ti kodro ni ayeke dengo ba ti mvene, handango zo, fango zo, nzi, gingo wali wala gingo koli ti zo, tukungo mene na peko ti tere, na peko ti tere.

Osée 8:5

Ala azo ti Samarii, be ti mbi alondo na bango kete bagara ti ala ni! Ngonzo ti mbi alondo tongana wâ na tere ti ala awe. Ala yeke ngba ngbii asi lawa si ala ga *nzoni?

Sofonii 3:1

Mawa na gbata ti ngangu li so, gbata so *sioni ayeke na tere ti lo so, gbata ti sarango ngangu na azo so!

Matthieu 11:21

Lo tene na ala: “Mawa na mo, gbata ti Korazen! Mawa na mo, gbata ti Betsaida! Biani, tongana aye ti kpene so asi na ndo ti ala so asi ando na sese ti Tir na ti Sidon, ka azo ni ayu bongo ti mua, ala tuku mburu ti wâ na li ti ala aninga awe ti fa atene, ala zia ngbene lege ti sarango ye ti ala awe!

2 Korente 12:21

Mbeto asara nga mbi titene tongana mbi kiri mbi si na ala kâ, Nzapa azia kamene na le ti mbi na dawa ti ala. Mbi hinga pepe, fade mbi yeke toto ndali ti azo mingi na popo ti ala so angba ti sara siokpari tongana ti ando; ala ngba na lege ti sarango aye ti sioni, aye ti kamene na aye ti ndumba.

2 Korente 7:1

A-ita ti mbi so mbi ye ala mingi, azendo so kue ayeke ndali ti e. Tongaso, e *sukula sioni so kue ayeke na tere ti e nga na be ti e. Na lege ti kpengo mbeto ti Nzapa, e gi lege ti mu tere ti e kue na lo.

Jacques 4:4

Ala so ado lege ti Nzapa azia so! Ala hinga pepe? Zo so aye tënë ti aye ti dunia so, andaa lo ke Nzapa awe; zo so aye tënë ti aye ti dunia so, andaa lo ga wato ti Nzapa awe.

Aye so Nzapa afa 8:13

Mbi kiri mbi baa ndo, mbi ma mbeni *ngoalo so ayeke huru yongoro kâ na le ti nduzu si ayeke dekongo, atene: “Mawa! Mawa! Mawa na azo ti ndö ti sese ndali ti atatalita so a-ange ota ayeke huru ni ande!”