Jérémie 11:17 - Mbeti ti Nzapa - Tënë so amu fini

¹⁷ KOTA GBIA so ayeke na ndö ti dunia kue laa alu keke ni. Ti fadeso, lo yeke iri kpale na ndö ti lo ndali ti sioni so azo ti Israel na azo ti Juda asara. Biani, ala zia ngonzo na be ti KOTA GBIA na lege so ala ya asandaga na *Baal.

Jérémie 11:17 ပူးပေါင်းရင်းမြစ်များ

2 Samuel 7:10

Mbi yeke mu mbeni ndo na azo ti Israel, azo ti mbi; mbi yeke zia ala na ndo ni so titene ala duti daa si mbeni ye ayingi ala pepe, titene ambeni mara so ayeke na sioni pialo akiri ti sara ngangu na ala tongana ti kozoni pepe.

2 Mbai 28:25

Na ya ti agbata oko oko kue ti Juda, lo leke ando na ndö ti ahoto titene lo zö dukani daa na anzapa nde. Na sarango ye tongaso, lo zia ngonzo mingi na be ti KOTA GBIA, Nzapa ti akotara ti lo.

Abia (Psaumes) 44:2

Nzapa, e ma na mê ti e wani, ababâ ti e atene na e tënë ti akota ye so mo sara ando na ngoi ti ala, na ngoi ti giriri.

Abia (Psaumes) 80:15

Nzapa, mo so mo yeke na ndö ti dunia kue, kiri, mo ga maa! Na nduzu kâ, baa ndo si mo baa ye so asi so. Ga mo baa lege ti keke ti vinye so.

Abia (Psaumes) 80:8

Nzapa, mo so mo yeke na ndö ti dunia kue, sara si e kiri maa! Baa e na nzoni le si fade e soo kuâ.

Ésaïe 5:2

Lo de ya ti sese, lo zi atêne na ya ni, lo lu pendere keke ti vinye daa. Lo sara da so ayo na nduzu taa na be ti yaka ni. Lo zi du ti petengo na ale ti vinye daa. Lo yeke ku fade anzoni lengo ni, me yaka ni ale gi afungo ni.

Ésaïe 61:3

Ala yeke na mua ndali ti *Sion, me Nzapa atokua mbi ti zia na li ti ala ye ti pendere na plase ti mburu ti wâ; ti kpaka na tere ti ala mafuta so afa ngia ti ala, me afa mua pepe; ti yu na ala bongo ti matanga na plase ti be so awoko. Tongaso, a yeke haka ala na akeke so afa mbirimbiri ti Nzapa, a yeke haka ala na yaka so afa gonda ti KOTA GBIA.

Jérémie 1:14

Tongaso KOTA GBIA atene na mbi: “Na mbage ti Banga laa ye ti ngangu ayeke kporo ti ga na ndö ti azo ti kodro ni kue.

Jérémie 11:11

“Ndani laa, tënë so KOTA GBIA atene ayeke so: ‘Fade mbi yeke sara si mbeni kota kpale aga na ndö ti ala; kota kpale so ala lingbi ti sigigi na ya ni pepe. Ala yeke dekongo ti iri mbi, me mbi yeke ma ala pepe.

Jérémie 11:13

Biani, ala azo ti Juda, ala yeke na anzapa gbani gbani alingbi na wungo ti agbata ti ala. Kâ na Jérusalem, ala yeke na agbalaka gbani gbani ndali ti Kamene alingbi na wungo ti abalabala ti ya ti gbata ni, agbalaka so ala yeke ya *sandaga na ndö ni na *Baal.’

Jérémie 12:2

Mo lu ala tongana keke so agunda ni ali sese; ala yeke mai si ala yeke le. Iri ti mo ayeke na yanga ti ala lakue, me be ti ala ayeke yongoro na mo.

Jérémie 18:15

Me be ti azo ti mbi agirisa na mbi awe! Ala zö dukani na anzapa so ayeke taa Nzapa pepe. Na ndö ti alege so ala yeke hon daa, anzapa ni asara si ala ti. Lege so ando ala mu ni, anzapa ni ague na ala na mbeni lege nde; ambeni lege so azo ade asuru ni pepe.

Jérémie 18:8

Me tongana azo ti mara ni azia lege ti sioni so ala sara si azia ngonzo na be ti mbi so, sioni ye so mbi leke na be ti mbi ti sara na ala, mbi yeke zia lege ni.

Jérémie 19:15

“Tënë so KOTA GBIA so ayeke na ndö ti dunia kue, Nzapa ti Israel atene ayeke so: ‘Akpale so kue mbi tene tënë ni so, fade mbi yeke sara si ati na ndö ti gbata so nga na ndö ti akete kodro so kue ayeke na tere ni. Biani, azo ti gbata ni asara ngangu li si ala ke ti ma tënë ti mbi.’ ”

Jérémie 2:21

Mbi lu mo ando tongana pendere keke ti vinye, tongana kete keke so apendere mingi. Ye ni asara tongana nyen laa mo kiri mo ga sioni vinye so zo ahinga li ti lo na ni pepe?

Jérémie 24:6

Fade mbi yeke baa ala na nzoni le si mbi yeke kiri na ala na ya ti kodro so. Mbi yeke kiri ti kungbi ala na sese pepe, me mbi yeke leke ala na nduzu; mbi yeke kiri ti gboto ala pepe tongana ti so a yeke gboto pere na gunda ni kue, me mbi yeke lu ala tongana ti so a yeke lu keke.

Jérémie 26:13

Ti fadeso, ala sara si lege ti dutingo ti ala na sarango ye ti ala akiri aga nzoni; ala ma yanga ti KOTA GBIA Nzapa ti ala! Tongaso, sioni kpale so lo tene tënë ti tokuango ni na ndö ti ala, lo yeke zia lege ni.

Jérémie 26:19

Gbia Ezekias na azo ti Juda afâ wayanga-Nzapa Mishe ndali ni? Oko pepe, me ala kpe mbeto ti KOTA GBIA, nilaa ala sara kue ti de be ti lo. Tongaso, sioni kpale so KOTA GBIA atene tënë ti tokuango ni na ndö ti ala, lo zia lege ni. Ti e, tongana e fâ ngbanga fadeso na li ti koli so, andaa e sara sioni mingi na e wani.”

Jérémie 32:29

Azo ti Babilone angba ti tiri bira ti mu gbata ni; fade ala yeke li na ya ni, ala yeke bi wâ daa; ala yeke gbi ada so azo ayeke zö dukani na li ni na *Baal titene ala gi na yanga ti mbi. Azo ni ayeke tuku samba ti mu na *sandaga na anzapa nde na ya ti ada ni.

Jérémie 32:30

“Biani, so tënë ti yanga ti KOTA GBIA laa: Ti londo na ngoi so ala ga mara ngbii asi laso, azo ti Israel na azo ti Juda asara gi ye so ayeke sioni na le ti mbi. Ye so kue azo ti Israel asara azia gi ngonzo na be ti mbi.

Jérémie 35:17

Jérémie akiri atene: “Ndani laa, tënë so KOTA GBIA so ayeke na ndö ti dunia kue, Nzapa ti Israel atene ayeke so: Ala azo ti Juda na ala, azo ti Jérusalem, akpale so kue mbi tene tënë ni so, mbi yeke sara titene aga na ndö ti ala. Biani, mbi tene tënë na ala, me ala ma mbi pepe; mbi iri ala, me ala ke ti yeda.”

Jérémie 36:7

Tongaso, e hinga pepe, vorongo tere ti ala ayeke si na KOTA GBIA si zo oko oko ayeke zia sioni lege ti sarango ye ti lo. Biani, KOTA GBIA asara ngonzo mingi si ngonzo ti lo ti wâ alondo na tere ti mara so.”

Jérémie 40:2

Makonzi ti aturugu ti batango gbia airi Jérémie, ala na lo use si lo tene na lo: “KOTA GBIA, Nzapa ti mo atene ando tënë ti sioni ye so ayeke ti na ndö ti gbata so.

Jérémie 40:3

KOTA GBIA atokua ye ni awe; lo sara si ye ni asi alingbi na tënë so lo tene ando. Biani, ala sara siokpari ti ke KOTA GBIA, ala ma yanga ti lo pepe. Ndani laa ye so kue asi na ala.

Jérémie 42:10

‘Tongana ala yeda ti ngba na ya ti kodro so, fade mbi yeke kiri ti leke ala na nduzu, mbi yeke kiri ti kungbi ala na sese pepe; mbi yeke kiri ti lu ala tongana ti so a yeke lu keke, mbi yeke kiri ti gboto ala pepe. Fade mbi yeke zia lege ti sioni ye so mbi sara na ala.

Jérémie 44:5

Me ala ma pepe, ala dingi mê ti ala ti ma ni pepe; ala zia pepe lege ti sioni sarango ye ti ala, ala zia pepe lege ti mungo asandaga na anzapa nde.

Jérémie 44:8

Ala ye ti zia ngonzo na be ti mbi na lege ti asarango ye ti ala? Biani, ala mu asandaga na anzapa nde na kodro ti Ezipte so ala ga aduti daa so! Ala ye ti hunzi kue titene ala ga tapande ndali ti azo so ayeke deba amba ti ala na ye ti kamene ndali ti amara kue ti dunia?

Jérémie 45:4

Baa, tënë so mo yeke tene na Baruk laa: Tënë so KOTA GBIA atene ayeke so: ‘Ye so mbi leke na nduzu, mbi yeke kungbi ni na sese; ye so mbi lu, mbi yeke gboto ni. Fade mbi yeke sara tongaso na ya ti kodro ni kue.

Jérémie 7:18

Amolenge ayeke ro akeke ti wâ, ababâ ayeke tingo wâ, awali ayeke pete ya ti farini na ngu ti sara na agatoo titene ala mu na gbia-wali ti yayu. Ala yeke tuku samba na sese ti mu na *sandaga na anzapa nde titene ala zia ngonzo na be ti mbi.

Jérémie 7:9

So nyen! Ala yeke nzi, ala yeke fâ azo, ala yeke lango na akoli wala awali ti amba ti ala. Ala yeke de aba ti mvene, ala yeke zö dukani na *Baal, ala yeke mu peko ti anzapa so ala hinga ala kozoni pepe.

Ezekiel 17:5

Na pekoni, lo mu mbeni ngoangoa ti keke ti sese ti Israel si lo lu ni na sese so a leke ni nzoni. Lo lu ni na tere ti kota ngu tongana mbeni keke so aye ngu mingi.

Osée 10:1

Israel ayeke tongana keke ti *vinye so ayeke le ando mingi. So ale ti keke ti lo ayeke wu mingi, lo yeke sara si agbalaka akiri awu mingi; so sese ti lo ayeke pendere mingi, lo yeke sara si angbongboro têne so a leke si aluti na nduzu akiri aga pendere mingi.