Jean 8:15 - Mbeti ti Nzapa - Tënë so amu fini

¹⁵ Ala yeke fâ ngbanga gi tongana ti azo; me ti mbi, mbi yeke fâ ngbanga na li ti zo oko pepe.

Jean 8:15 ပူးပေါင်းရင်းမြစ်များ

Amos 5:7

Ala sara si sarango ye na lege ti ndia aga tongana sioni yoro ti fango zo, ala yeke do na sese fango ngbanga ti mbirimbiri.

Amos 6:12

Laoko ambarata akpe loro na ndö ti akota têne? Laoko zo afâ yaka na abagara na ndö ti akota têne? Me ti ala, ala sara si sarango ye na lege ti ndia aga sioni yoro; ala sara si fango ngbanga ti mbirimbiri aga sioni yoro ti fango zo.

Habakuk 1:4

Ndani laa azo ayeke sara ye alingbi na ndia pepe, ala yeke fâ ngbanga na lege ti ndia pepe. Zo ti sioni ayeke hon ndö ti zo ti mbirimbiri, awafango-ngbanga ayeke fâ ngbanga kirikiri.

Nzoni Tënë so Luc asu na mbeti 12:14

Jésus atene na lo: “Koli, zo wa laa amu mbi titene mbi fâ ngbanga na popo ti ala, ti kangbi ya ti aye ti ala?”

Jean 12:47

Tongana mbeni zo ama atënë ti mbi si lo sara ye alingbi na ni pepe, mbi laa mbi yeke fâ ngbanga na li ti lo pepe. Biani, mbi ga ti fâ ngbanga na li ti azo ti dunia so pepe, me mbi ga ti soo azo ti dunia so na kuâ.

Jean 18:36

Jésus akiri tënë na lo: “Kodro-gbia ti mbi ayeke ti dunia so pepe. Tongana kodro-gbia ti mbi ayeke fade ti dunia so, ka azo ti mbi atiri bira ti kanga lege si azo aga na mbi na amakonzi ti azuife pepe. Me fadeso, kodro-gbia ti mbi ayeke ti ndo so ge pepe.”

Jean 3:17

Nzapa atokua Molenge ti lo na dunia so ti fâ ngbanga na li ti azo ti dunia ni pepe, me ti soo ala.

Jean 7:24

Ala fâ ngbanga gi ndali ti le ti zo pepe, me ala fâ ngbanga so ayeke na legeni.”

Jean 8:11

Wali ni akiri tënë na lo: “*Kota Gbia, zo oko pepe!” Jésus atene na lo: “Mbi nga, mbi yeke fâ ngbanga na li ti mo pepe. Mo gue, me mo kiri mo sara siokpari pepe.”]

Rome 2:1

Mo so mo yeke fâ ngbanga na li ti amba ti mo so, ataa mo yeke zo wa, mo baa ti mo, mo tene, mo yeke sigigi na ya ti tënë ni? So mo yeke fâ ngbanga na li ti amba ti mo so, mo yeke fâ nga ngbanga na li ti mo wani, ndali ti so mo nga, mo yeke sara mara ti aye so.

1 Korente 2:15

Zo so ayeke na Yingo ti Nzapa alingbi ti hinga nda ti aye kue, me mbeni zo ti hinga nda ti lo ayeke daa pepe.

2 Korente 5:16

Ndani laa, ti fadeso, e yeke kiri ti baa zo oko na le ti e na bango ndo ti zo pepe. Ataa so e baa Christ ando na le ti e na bango ndo ti zo, ti fadeso e yeke kiri ti baa lo tongaso pepe.

Jacques 2:4

So ala sara tongaso so, ala ne mbeni zo ahon mbeni pepe? Ala yeke na sioni tënë na be ti ala si ala yeke fâ na ngbanga pepe?

1 Samuel 16:7

Me KOTA GBIA atene na Samuel: “Mo baa pendere ti lo wala yongo ti lo pepe. Mbi ke lo awe. Bango ndo ti mbi ayeke tongana bango ndo ti azo pepe. Azo ayeke baa ti ala gi ye so ayeke pika le ti ala; me mbi yeke baa ti mbi be ti zo.”