Jean 7:32 - Mbeti ti Nzapa - Tënë so amu fini

³² *Afarizien ama atënë so gba ti azo ayeke tene na gbe ti go ti ala na tere ti Jésus. Tongaso akota wayango-sandaga na afarizien atokua aturugu ti gue ti gbu lo.

Jean 7:32 ပူးပေါင်းရင်းမြစ်များ

Matthieu 12:14

So *afarizien asigigi na ya ti da ti sambelango Nzapa, ala bongbi ti gbu li ti ala ti gi lege ti fâ Jésus.

Matthieu 23:13

“Mawa na ala, awafango-ndia, ala na *afarizien! Tënë ti yanga ti ala ayeke nde na sarango ye ti ala! Ala kanga lege ti *Kodro-gbia ti yayu na azo. Ala wani aye ti li na ya ti Kodro-gbia ti yayu ni pepe, me ala yeke kanga lege ni na azo so aye ti li daa. [

Matthieu 26:58

Pierre ague na peko ti Jésus, me lo yeke gue nduru nduru pepe; lo gue ngbii lo si na ya ti gbagba ti kota wayango-sandaga. Lo li si lo na azo ti kua ayeke duti na sese na ndo oko, lo yeke ku ti baa wala ye ni ayeke hunzi ande tongana nyen.

Jean 11:46

Me ambeni ague, abaa *afarizien si ala fa na ala peko ti ye so Jésus asara.

Jean 12:19

Tongaso *afarizien atene na popo ti ala: “Ala baa awe? Ye ni akara ala awe: azo ti dunia kue ague gi na peko ti lo!”

Jean 18:3

Judas amu li ti mbeni bongbi ti aturugu na awabatango kota da ti Nzapa si ala gue na ndo ni so; akota wayango-sandaga na *afarizien laa atokua ala. Ala mu aye ti bira na alamba na wâ ti pere.

Jean 7:30

Tongaso, ala gi lege ti gbu Jésus, me zo oko agbu lo pepe, ngbanga ti so ngbonga ti lo ade ti lingbi pepe.

Awatokua 5:26

Tongaso makonzi ti aturugu ni na azo ti lo ague, amu awatokua ni akiri na ala; me ala sara ngangu na awatokua ni pepe, ngbanga ti so ala sara mbeto titene azo abo ala na têne.

1 Samuel 19:20

Saul atokua azo ti gbu David. Azo ni aga abaa bongbi ti awayanga-Nzapa so ayeke tene peko ti tënë ti Nzapa. Samuel laa ayeke na li ti ala. Yingo ti Nzapa agbu azo so Saul atokua ala si ala nga asara ye tongana awayanga-Nzapa.