Jean 15:2 - Mbeti ti Nzapa - Tënë so amu fini

² Maboko ti keke so kue ayeke na ndö ti mbi si ale pepe, Babâ ayeke fâ ni azi; maboko ti keke so ale, lo yeke zi *aguruma ni titene akiri ale mingi.

Jean 15:2 ပူးပေါင်းရင်းမြစ်များ

Mbeti ti Job 17:9

Ala yeke tene: “Ayeke nzoni zo ti mbirimbiri angba gi na lege ti sarango ye ti lo; zo so maboko ti lo avuru, ayeke nzoni lo kiri lo gbu ngangu ahon ti kozoni!”

Abia (Psaumes) 92:14

Lo yeke tongana keke so a lu na ya ti gbagba ti kota da ti KOTA GBIA, lo yeke kono gi na ya ti gbagba ti Nzapa ti e.

Amato 4:18

Lege ti dutingo ti azo ti mbirimbiri ayeke tongana lumiere ti ndaperere, lo yeke su ngbii lo su ngangu ngangu na bekombite.

Ésaïe 27:9

Lege so a yeke zi sioni na li ti Jacob laa; ye so ayeke si na peko ti zingo siokpari na li ti lo ni ayeke so: fade a yeke nika atêne kue ti agbalaka tongana ti so a yeke nika mbamba si aga fuku. Akeke so azo aleke aluti na nduzu si ala yeke voro ni, wala ata ti wen so ala zia nde titene ala zö dukani na ya ni ayeke kiri ti ngba na nduzu pepe.

Ésaïe 29:19

Azo so ayeke sara tere ti ala kete ayeke wara ngia so ayeke gue guengo na nduzu ndali ti *KOTA GBIA; azo so yere ti ala ahon ndoni ayeke dodo na ngia ndali ti Nzapa ti Israel so ayeke nde si ayeke nzoni kue.

Daniel 11:35

Fade azo mingi na popo ti azo so le ti ala ahan ayeke kui. Kuâ ti ala ayeke sara si a *sukula sioni ti azo ti kodro, ala ga nzoni si ala vuru nzoni ti ku na lango ti ndani. Lango ti ndani ayeke si gi na ngoi so a diko awe.

Osée 6:3

Tongaso, e sara ngangu ti hinga KOTA GBIA. Nyen na nyen kue, lo yeke ga tongana lâ so ayeke sigigi ka na ndaperere; fade lo yeke ga na mbage ti e tongana ngu-Nzapa, tongana tanga ti ngu-Nzapa so ayeke tuku na ndö ti sese.”

Malashii 3:3

Fade lo yeke duti tongana matawa so ayeke kporo wen ti nginza ti zi azende na tere ni. Fade lo yeke sara si azo ti mara ti Lévi aga *nzoni tongana ti so a yeke zi azende na tere ti lôro nga na wen ti nginza. Tongaso ala lingbi ti mu *sandaga na KOTA GBIA alingbi na tënë ti ndia.

Matthieu 13:12

Biani, zo so ayeke na ye, fade a kiri amu mbeni na ndö ni na lo si lo yeke na ye ahon ndoni; me zo so ayeke na ye pepe, ataa kete ye so lo yeke na ni, fade a yeke zi na maboko ti lo.

Matthieu 13:33

Jésus atene na ala mbeni toli, lo tene: “*Kodro-gbia ti yayu ayeke tongana mama ti mapa so mbeni wali amu, lo bongbi na gba ti farini, lo pika ya ni si mapa ni kue asuku nzoni.”

Matthieu 15:13

Jésus akiri tënë na ala: “Akeke so kue Babâ ti mbi so ayeke na yayu alu ni pepe, fade a yeke gboto ni.

Matthieu 21:19

Lo baa mbeni keke ti fige na tere ti lege si lo gue nduru na ni, me lo wara gi akugbe ni. Lo tene na keke ni: “Mo yeke kiri ti le oko pepe!” Gi hio tongaso, keke ti fige ni ahole.

Matthieu 25:29

ngbanga ti so zo so kue ayeke na ye, fade a kiri amu mbeni na ndö ni na lo si lo yeke na ye ahon ndoni; me zo so ayeke na ye pepe, ataa kete ye so lo yeke na ni, fade a yeke zi na maboko ti lo.

Matthieu 3:10

Do ayeke na gunda ti akeke ti de ni: keke so kue ale nzoni lengo pepe, fade ayeke de ni ti bi na wâ.

Matthieu 3:12

Lo gbu ye ti pengo na ale ti kobe na maboko ti lo, lo yeke leke ndo ti pikango ale ti kobe ti lo daa. Na pekoni, lo yeke zia ni na ya ti gogoro, me fade lo yeke bongbi aporo ni ti gbi na ya ti wâ so ayeke mingo laoko pepe.”

Matthieu 7:19

Keke so kue ale nzoni pepe, fade a yeke de ni si a tuku ni na le ti wâ.

Marc 4:20

Ambeni zo ayeke tongana ale ti kobe so atuku na nzoni sese; ala ma tënë ni, ala yeda na ni si ala le: ambeni ale baleota, ambeni ale baleomene si ambeni ale ngbangbo oko.”

Nzoni Tënë so Luc asu na mbeti 8:13

Ambeni zo ayeke tongana ndö ti têne so ale ti kobe atuku daa; tongana ala ma tënë ni, ala yamba ni na ngia, me tënë ni ali na ya ti be ti ala pepe; ala ma na be gi na ya ti kete ngoi, tongana ye ti tarango be asi na ala, ala do lege ni azia.

Jean 15:1

“Mbi yeke taa keke ti *vinye si Babâ ti mbi ayeke wa ti yaka ni.

Jean 15:16

Ala laa asoro mbi pepe, me mbi laa mbi soro ala; mbi zia ala titene ala gue ti le mingi si lengo ti ala angba lakue. Tongaso, fade Babâ ayeke mu na ala ye so kue ala hunda na lo na iri ti mbi.

Jean 15:3

Tënë so mbi tene na ala asara si ala ga *nzoni awe.

Jean 15:6

Zo so aduti oko na mbi pepe, fade a yeke bi lo na gigi tongana ti so a yeke bi maboko ti keke si ahole. A yeke bongbi amaboko ti keke ni, a tuku na le ti wâ si agbi.

Jean 15:8

Fade Babâ ti mbi ayeke wara gonda na lege so: tongana ala le mingi, so afa atene, ala yeke adisiple ti mbi.

Jean 17:12

So mbi yeke lani na tere ti ala, mbi bata ala na lege ti ngangu ti iri ti mo so mo mu na mbi. Mbi bata ala si zo oko na popo ti ala agirisa pepe, gi lo so a yeke buba ande lo biani biani so, tongaso si tënë ti Mbeti ti Nzapa aga taa-tënë.

Rome 11:17

Azo ti Israel ayeke tongana keke ti olive ti yaka so a fâ ambeni maboko ni. Ti mo, mo yeke tongana maboko ti keke ti olive ti ngonda; a mu mo si a gerefe mo na popo ti amaboko so angba na ndö ti keke ti yaka ni. Fadeso mo lingbi nga ti baa nzoni legeoko na amaboko ti keke ti yaka ni ndali ti ngu so alondo na ya ti gunda ni.

Rome 11:22

Baa, Nzapa ayeke Nzapa ti nzoni be, lo yeke nga Nzapa so fango ngbanga ti lo aso mingi. Fango ngbanga ti lo aso na tere ti azo so ati, me lo yeke sara nzoni be na mo. Alingbi mo ngba ti duti na ya ti nzoni be ti lo, tongaso pepe, fade a yeke zi nga mo tongana ti so a zi maboko ti keke so.

Rome 8:28

E hinga so, ye kue abongbi ti sara nzoni na azo so aye Nzapa, azo so lo iri ala na lege so be ti lo aye.

1 Korente 13:1

Tongana mbi tene ayanga ti kodro ti azo na ayanga ti *a-ange si mbi ye amba ti mbi pepe, andaa mbi yeke tongana gbagba ngo so ayeke toto wala mbeni wen so ayeke toto mingi.

Tite 2:14

Lo ka ando tere ti lo na kuâ ndali ti e, ti zi e na ya ti aye ti sioni kue, ti sukula e si e ga azo ti lo wani, titene e mu ngangu ti e kue ti sara anzoni ye.

Ahebro 12:15

Ala sara hange si mbeni zo ado lege ti nzoni be ti Nzapa azia pepe. Alingbi mbeni zo aga tongana sengo gere ti pere ti ngonda pepe; mara ti zo tongaso ayeke bi wusuwusu na popo ti azo si lo yeke buba li ti ala.

1 Jean 2:19

Azo ni so ayeke azo ti e pepe, nilaa ala londo na popo ti e si ahon. Tongana azo ni ayeke fade azo ti e, ka ala ngba na popo ti e. Me ala zia e ahon ti fa polele na le ti azo atene, mbeni zo oko na popo ti ala ayeke zo ti e pepe.

Aye so Nzapa afa 3:19

Azo so kue mbi ye ala, mbi yeke pika ala si mbi yeke kiri ala na nzoni lege. Zia be ti mo kue na sarango kua, zia sioni lege ti sarango ye ti mo!