Jean 13:5 - Mbeti ti Nzapa - Tënë so amu fini

⁵ Na pekoni, lo tuku ngu na ya ti mbeni kota sembe, lo to nda ti sukula gere ti adisiple ti lo si lo mbo ni na bongo so lo kanga na ya ti lo so.

Jean 13:5 ပူးပေါင်းရင်းမြစ်များ

Tongo nda ti aye 18:4

Fade a ga na kete ngu titene ala sukula na gere ti ala; ala wu tere ti ala na gbe ti keke so.

Tongo nda ti aye 19:2

Lo tene: “Mbi gbu gere ti ala, akota zo! Ayeke nzoni ala ga na da ti mbi, ala sukula gere ti ala, ala lango. Kekereke na ndaperere, ala mu lege ahon senge.” Ala kiri tënë na lo, atene: “Ên-en! E yeke lango gi na be ti kodro na ndo so.”

Tongo nda ti aye 43:24

Lo mu ala, lo gue na ala na da ti Joseph. Lo mu ngu na ala si ala sukula na gere ti ala; lo mu pere na alele ti ala titene ala te.

2 Agbia 3:11

Me Yosafat ahunda ndo, atene: “Mbeni wayanga-Nzapa ayeke na ndo so titene na lege ti lo, e lingbi ti hunda *KOTA GBIA pepe?” Mbeni zo ti kua oko ti gbia ti Israel akiri tënë: “Élisée, molenge ti Shafat ayeke na ndo so; lo laa lo yeke mu lani maboko na wayanga-Nzapa Élie.”

Abia (Psaumes) 51:2

David adema tere ti lo na peko ti so wayanga-Nzapa Natan aga asuku na lo ndali ti so lo gi Batsheba, wali ti mba ti lo.

Sigingo 29:4

“Fade mo yeke mu Aaron na amolenge ti lo, mo ga na ala na yanga ti da ti bongo so Nzapa na azo ti lo ayeke wara tere daa si mo yeke sukula ala na ngu.

Ésaïe 1:16

Ala sukula tere ti ala, ala sara titene ala ga *nzoni! Asioni ye so ala sara, ala zi ni na le ti mbi, ala zia ti sara sioni.

Ezekiel 36:25

Mbi yeke tuku *nzoni ngu na ndö ti ala si ala ga *nzoni. Mbi yeke *sukula asioni ti ala kue, mbi yeke zi ayanda ti ala.

Awayango-sandaga 14:8

Zo so aga titene *a sukula asioni ti lo so, fade lo yeke sukula abongo ti lo, lo yeke kio kua ti tere ti lo kue, lo yeke sukula ngu titene lo ga *nzoni. Na pekoni, lo yeke kiri na ya ti bâbâ, me lo yeke li na ya ti da ti lo pepe na ya ti lango mbarambara.

Zakarii 13:1

“Na lango ni so, fade mbeni li ti ngu ayeke sigigi ti sukula asiokpari na asioni ti *ahale ti David na ti azo ti Jérusalem.”

Nzoni Tënë so Luc asu na mbeti 7:38

Lo luti na peko ti Jésus, nduru na tere ti lo. Lo yeke toto, ngu ti le ti lo ayeke yuru na ndö ti gere ti Jésus si lo yeke mbo ni na kua ti li ti lo; lo gbu gere ti Jésus si lo yeke tuku yombo ni na ndö ni.

Nzoni Tënë so Luc asu na mbeti 7:44

Na pekoni, Jésus abaa ndo na mbage ti wali ni si atene na Simon: “Mo baa wali so? So mbi li na da ti mo, mo mu na mbi ngu pepe ti sukula na gere ti mbi; me lo, lo sukula gere ti mbi na ngu ti le ti lo si lo mbo ni na kua ti li ti lo.

Jean 13:10

Jésus atene na lo: “Zo so asukula tere ti lo awe, lo lingbi ti kiri ti sukula tere ti lo pepe, me gi gere ti lo. Biani, tere ti lo avuru awe. Ti ala, tere ti ala avuru awe, me ala kue pepe.”

Jean 13:6

Lo si na Simon Pierre, me Simon Pierre atene na lo: “*Kota Gbia, mo ye ti sukula gere ti mbi?”

Jean 13:8

Pierre atene na lo: “Mo ye ti sukula gere ti mbi? Oko pepe!” Jésus atene na lo: “Tongana mbi sukula gere ti mo pepe, mbeni ye so mo lingbi ti ku na mbage ti mbi ayeke daa pepe.”

Jean 19:34

Mbeni turugu akpo kate ti Jésus na likongo, gi hio tongaso, mene na ngu asigigi daa.

Awatokua 22:16

Nyen laa mo yeke ku fadeso? Londo, mo wara bateme, Nzapa azi siokpari ti mo na lege so mo di iri ti lo.’ ”

1 Korente 6:11

Ambeni zo na popo ti ala ayeke ando tongaso. Me Nzapa *asukula asioni ti ala awe, lo sara si ala ga nzoni kue si lo zia ala nde; lo sara si ala ga mbirimbiri na le ti lo na iri ti *Kota Gbia Jésus Christ nga na lege ti Yingo ti Nzapa ti e.

Efeze 5:26

Lo sara tongaso titene Eglize ni aga nde si aga nzoni kue. Titene Eglize ni avuru tarara, lo sukula ni na ngu nga na lege ti tënë ti lo,

1 Timothée 5:10

Alingbi azo ahinga lo ndali ti nzoni sarango ye ti lo: lo bata amolenge ti lo nzoni, lo yamba azo so aga na da ti lo nzoni, lo sukula gere ti azo ti Nzapa, lo mu maboko na azo so ayeke na ya ti pasi si lo mu ngangu ti lo ti sara anzoni ye nde nde.

Ahebro 10:22

Tongaso, e ga nduru na Nzapa na be ti e oko nga na be so asi singo na mabe, be so e hinga, e tene, a *sukula asioni kue daa awe na tere so a sukula ni awe na mbeni nzoni ngu.

1 Jean 1:7

Me tongana e yeke tambula na ya ti lumiere tongana ti so Nzapa wani ayeke na ya ti lumiere, andaa e yeke na beoko na amba ti e si mene ti Jésus, Molenge ti lo, ayeke *sukula asiokpari ti e kue.

1 Jean 5:6

Jésus Christ laa aga na ngu na mene, ngu ti bateme so lo li na ya ni nga na mene ti lo so atuku. Lo ga gi na ngu pepe, me lo ga na ngu na mene kue. Yingo-Vuru si ayeke fa atene, ye ni ayeke taa-tënë, ngbanga ti so Yingo-Vuru ayeke taa-tënë.

Aye so Nzapa afa 1:5

Ayeke nzoni Jésus Christ amu aye ni na ala, lo so lo yeke fa peko ti tënë mbirimbiri! Lo yeke kozo zo so lo zingo na kuâ, lo yeke nga Makonzi ti agbia ti sese. Jésus aye e si lo zi e na gbe ti ngbaa ti asiokpari ti e na lege ti mene ti lo.

Aye so Nzapa afa 7:14

Mbi kiri tënë na lo, mbi tene: “Kota zo, mo laa mo hinga.” Lo kiri tënë na mbi: “Ala yeke azo so a sara ngangu mingi na ala na ngoi ti aye ti ngangu. Ala sukula bongo ti ala na ya ti mene ti Molenge ti Taba, ala sara si bongo ni avuru.”

Awafango-ngbanga 19:21

Koli ni ague na ala na da ti lo; lo mu kobe na alele ni. Agene ni asukula gere ti ala, ala te, ala nyon.

1 Samuel 25:41

Abigail akuku akpo li ti lo na sese si lo tene: “Mbi, zo ti kua ti mo, mbi yeke ngbaa-wali; mbi ye ti sukula gere ti azo ti kua ti babâ ti mbi.”