Jean 12:34 - Mbeti ti Nzapa - Tënë so amu fini

³⁴ Gba ti azo ni akiri tënë na lo, atene: “Na ya ti mbeti ti *Ndia ti e, e ma a tene, fade *Mesii ayeke ngba kpu na kpu. Tongana nyen laa mo tene, a yeke mu *Molenge ti Zo ti kanga lo na nduzu so? Molenge ti Zo ni ayeke zo wa?”

Jean 12:34 ပူးပေါင်းရင်းမြစ်များ

2 Samuel 7:13

Lo laa lo yeke sara da ndali ti mbi; mbi yeke sara titene lengo-gbia ti lo akpengba kpu na kpu.

Abia (Psaumes) 110:4

KOTA GBIA adeba yanga ti lo, lo tene: “Mo yeke duti wayango-sandaga kpu na kpu tongana ti Melkisedeke.” KOTA GBIA ayeke kiri na ndö ti tënë ti lo pepe.

Abia (Psaumes) 72:7

Na ngoi so lo ngba ti le-gbia, ayeke nzoni sarango ye ti mbirimbiri angba ti mai na ndo kue, nzoni duti asi singo na ngoi so kue nze angba ti su!

Ésaïe 53:8

Azo agbu lo, ala fâ ngbanga na li ti lo si ala fâ lo. Me na popo ti azo ti ngoi ti lo, zo wa laa abaa mawa ti lo, zo wa? Biani, a zi lo na ndö ti sese ti azo so angba na fini; a pika lo ndali ti sioni ti azo ti mbi.

Ésaïe 9:7

*KOTA GBIA atokua mbeni tënë na tere ti azo ti Jacob, tënë ni ati na ndö ti Israel.

Daniel 2:44

Na ngoi ti agbia ni, fade Nzapa so ayeke na yayu ayeke sara mbeni kodro so ayeke buba laoko pepe; kodro ni ayeke ti na gbe ti azo ti ambeni mara nde pepe. Fade kodro ni ayeke fâ si ayeke nika ambeni kodro ni kue; gi kodro oko so laa ayeke ngba ti lo lakue lakue.

Daniel 7:14

A mu na lo ngangu ti sara komandema, a mu na lo gonda si a mu lo gbia. Tongaso amara nde nde na azo ti ayanga ti kodro nde nde kue asara kua na lo. Ngangu ti lo ti sara komandema angba lakue lakue, fade ayeke hunzi pepe. Mbeni ye ti buba lengo-gbia ti lo ayeke daa laoko pepe.

Daniel 7:27

Kodro, komandema na dutingo na kota ndo na ya ti akodro nde nde so ayeke na ndö ti sese, fade a mu ni na azo so Nzapa asoro ala; Nzapa so ayeke na yayu kâ na ndö ti aye kue so. Komandema ti azo ti Nzapa ayeke ngba lakue lakue; fade angangu kue ti dunia ayeke ma yanga ti ala si ayeke sara kua na ala.’

Mishe 4:7

Ala so gere ti ala abuba, mbi yeke sara titene ala ga tanga ti azo so angba na fini; ala so a gue na ala na yongoro ndo, mbi yeke sara titene ala ga mbeni ngangu mara. Na ndö ti hoto ti Sion, fade KOTA GBIA ayeke duti gbia ti ala fadeso kpu na kpu.

Matthieu 16:13

Jésus asi nduru na sese ti Sezare ti Philippe. Lo hunda adisiple ti lo, lo tene: “Azo ayeke tene *Molenge ti Zo ayeke zo wa?”

Matthieu 21:10

So Jésus ali na Jérusalem awe, gbata ni kue ayingi. Azo ahunda ndo, atene: “So zo wa laa?”

Matthieu 8:20

Jésus atene na lo: “Anyama ti gbungo kondo ayeke na du so ala yeke lango na ya ni, andeke ti nduzu ayeke na da ti lango ti ala; me *Molenge ti Zo ayeke na mbeni ndo ti ziango li ti lo daa pepe.”

Jean 10:34

Jésus akiri tënë na ala, atene: “Na ya ti mbeti ti *Ndia ti ala, Nzapa atene: ‘Ala yeke anzapa.’

Jean 12:32

Ti mbi, tongana a mu mbi na sese, a kanga mbi na nduzu, fade mbi yeke sara si azo kue aga na tere ti mbi.”

Jean 15:25

Me aye so asi titene tënë ti *Ndia ti ala aga taa-tënë; Ndia ni atene: ‘Ala ke mbi gi senge senge.’

Jean 8:28

Jésus atene na ala: “Tongana ala kanga ande *Molenge ti Zo na nduzu, fade ala yeke hinga so ‘Mbi Yeke’; fade ala yeke hinga so mbi yeke sara ye gi na li ti mbi pepe, me mbi yeke tene gi tënë so Babâ afa na mbi.

Rome 3:19

E hinga so atënë ti *Ndia kue abaa azo so ayeke na gbe ti Ndia. Tongaso si zo oko awara tënë ti kiringo na ni pepe si na le ti Nzapa, ngbanga ayeke na li ti azo ti dunia kue.

Rome 5:18

Tongaso, na lege ti siokpari ti zo oko, ngbanga ati na li ti azo kue. Legeoko nga, sarango ye ti mbirimbiri ti zo oko asara si azo kue aga mbirimbiri si ala yeke na fini.

Ahebro 7:24

Me ti Jésus, lo yeke ngba na fini lakue lakue; mbeni zo nde ti mu ndo ti lo, ti sara kua ti yango sandaga ni ayeke daa pepe.