Jacques 3:14 - Mbeti ti Nzapa - Tënë so amu fini

¹⁴ Me tongana ala yeke sara sioni kota be ti gbugburungo na kota ndo, ala pika kate ti ala ndali ti ndara ti ala ni pepe. Tongana ala yeke sara ye tongaso, andaa ala yeke tene mvene ti buba lege ti taa-tënë.

Jacques 3:14 ပူးပေါင်းရင်းမြစ်များ

Tongo nda ti aye 37:11

A-ita ti Joseph asara kota be na tere ti lo. Me babâ ti lo angba ti dabe ti lo na atënë so.

Tongo nda ti aye 38:9

Onan ahinga so fade molenge ni ayeke ande ti lo pepe. Nilaa tongana lo na wali ti ita ti lo ni ayeke duti, lo yeke tuku ngu ti tere ti lo na sese; tongaso si lo du molenge na iri ti ita ti lo pepe.

2 Agbia 10:16

Yehu atene na Yonadab: “Ga na tere ti mbi, fade mo yeke baa nzara ti *KOTA GBIA so ayeke gbi na be ti mbi.” Yehu amu lo na tere ti lo na ya ti pusu ti mbarata ti lo si ala gue legeoko na tambula ni.

2 Agbia 10:31

Me Yehu amu be ti lo kue pepe ti sara ye alingbi na tënë ti *ndia ti KOTA GBIA, Nzapa ti Israel. Siokpari so Yeroboam, molenge ti Nebat apusu lani azo ti Israel si ala sara so, Yehu azia lege ni pepe.

Mbeti ti Job 5:2

Biani, songo be laa ayeke fâ zo ti buba; zo so li ti lo ayeke daa pepe, kota be ayeke fâ lo.

Amato 14:30

Be so ayeke na siriri ayeke mu nzoni tere na zo; me sarango mbanda ayeke tongana mbeni sioni kobela so ayeke te zo na ya ti bio.

Amato 27:4

Ngonzo ti wâ ayeke sioni mingi, ngonzo ayeke buba ye mingi; me zo wa laa alingbi ti luti na le ti mbanda ti zo?

Ésaïe 11:13

Kota be ti Efraim na tere ti Juda ayeke hunzi, a yeke fâ awato ti Juda kue; Efraim ayeke kiri ti sara kota be na tere ti Juda pepe; Juda ayeke kiri ti duti awato ti Efraim pepe.

Habakuk 1:3

Mo sara si mbi baa ye ti sioni ngbanga ti nyen? Azo ayeke sara ngangu na amba ti ala, mo yeda ti baa ni na le ti mo ngbanga ti nyen? Ye so mbi yeke baa mbage na mbage ayeke gi gbungo ye ti azo na ngangu na sarango ngangu na azo. Tongana fango ngbanga ayeke daa, papa ayeke daa lakue.

Matthieu 27:18

Biani, Pilate ahinga atene, ala zia Jésus na maboko ti lo, ngbanga ti so kota be asara ala na tere ti lo.

Jean 16:2

Fade azo ayeke tumba ala na ya ti ada ti sambelango Nzapa. Na ndö ni, ngbonga ni ayeke ga so fade ambeni zo ayeke fâ ala si azo ni ayeke tene na be ti ala atene, kua ti Nzapa laa ala yeke sara so.

Awatokua 13:45

So azuife abaa gba ti azo ni, kota be asara ala; ala yeke tene tënë ti buba ya ti atënë ti Paul si ala yeke zonga lo.

Awatokua 26:9

Ti mbi, mbi baa lani mbi tene, alingbi mbi sara kue ti mingo iri ti Jésus, zo ti Nazaret.

Awatokua 5:17

Tongaso, kota wayango-sandaga na azo ti tere ti lo, so ti tene azo ti bongbi ti *asadusien, kota be asara ala na tere ti *awatokua si ala ye ti sara mbeni ye.

Awatokua 7:9

“Akotara ti e asara kota be na tere ti Joseph, ala ka lo si lo ga ngbaa na kodro ti Ezipte. Me Nzapa ayeke na lo.

Rome 1:29

Asioni ye nde nde asi singo na be ti ala: ye so ayeke mbirimbiri pepe, sioni be, nzara ti warango ye mingi; ala yeke azo ti sioni be, kota be ahon ndö ti ala, ala yeke azo ti fango zo, azo ti papa, azo ti mvene, azo ti mbana, azo ti dungo mvene na iri ti amba ti ala,

Rome 13:13

Alingbi fini ti e aduti na legeni mbirimbiri tongana ti azo so ayeke sara ye na kota lâ. E te kobe wala e nyon samba ahon ndoni pepe, e sara aye ti kirikiri wala aye ti ndumba pepe, e papa wala e sara kota be pepe.

Rome 2:17

Ti mo so mo tene mo yeke zuife so, mo zia be ti mo na ndö ti *Ndia si mo yeke pika kate ti mo ndali ti Nzapa ti mo.

Rome 2:8

Me azo so ake ti ma yanga ti lo, ala so ake taa-tënë si ye so ayeke sioni ayeke gboto ala, fade ngonzo ti Nzapa ayeke londo tongana wâ na tere ti ala.

1 Korente 13:4

Ndoye ayeke kanga be ti lo, lo yeke sara nzoni, lo yeke sara kota be pepe, lo yeke pika kate ti lo pepe, lo yeke sara baba pepe;

1 Korente 3:3

ngbanga ti so ala ngba lakue ti sara ye gi tongana ti azo ti dunia so. So tënë ti kota be na papa angba na popo ti ala so, so afa atene, ala yeke sara ye gi na lege ti azo ti dunia so pepe? Ala yeke sara ye gi tongana ti azo kue pepe?

1 Korente 5:2

Na ndö ni kue, ala yeke pika kate ti ala daa! Ala lingbi fade ti duti na vundu ndali ti ye so pepe? Alingbi fade titene ala zi zo so asara mara ti ye tongaso na popo ti ala!

1 Korente 5:6

Ye so ala yeke pika kate ti ala daa so, anzere oko pepe! Ala hinga pepe atene, gi kete mama ti mapa laa ayeke sara titene mapa ni kue alondo?

2 Korente 12:20

Mbeto asara mbi titene tongana mbi si na ala kâ, mbi baa dutingo ti ala ayeke nde na ti so be ti mbi aye si ala nga, ala baa dutingo ti mbi ayeke nde na ti so be ti ala aye. Mbeto asara mbi titene aye tongaso aduti na popo ti ala: papa, kota be, ngonzo, kangbingo tere, zongango zo na asioni tënë, fonongo na iri ti zo, baba, sarango aye ti wusuwusu.

Galasii 5:15

Me tongana ala yeke sara ye tongana ti anyama, ala yeke suru tere ti ala si ala yeke te tere na popo ti ala, ala sara hange: tongaso pepe, ala yeke fâ tere ti ala kue!

Galasii 5:20

vorongo anzapa nde, guengo na zo na gbe ti yoro, kengo zo, papa, kota be, ngonzo, gbugburungo tere ti gi na kota ndo, mungo mbage ti mbeni zo, kangbi,

Galasii 5:21

sarango nzara ti ye ti zo, nyongo samba na tengo kobe butuma, na ambeni mara ti ye tongaso. Mbi tene tënë so na ala kozoni awe, mbi yeke kiri na ndö ni: azo ti sarango aye tongaso, *Kodro-gbia ti Nzapa ayeke ga ti ala pepe.

Galasii 5:26

E sara kuru baba pepe! E gi yanga ti amba ti e pepe, e sara kota be na popo ti e pepe!

Galasii 6:13

Ataa so azo ni afâ ganza, ala yeke sara ye alingbi na *Ndia pepe! Azo ni aye ti fâ ala na ganza ti wara lege ti gondango tere ndali ti ye so azo ni asara na tere ti ala, a-ita.

Filipe 1:15

Mbi hinga so ambeni zo ayeke fa tënë ti Christ gi na kota be wala ti gi na yanga ti mbi; me ambeni ayeke fa tënë ni na nzoni be.

Filipe 2:3

Ala sara ye na gbugburungo tere ti gi na kota ndo pepe, ala sara nga ye na lege ti kuru baba pepe. Me ala baa tere ti ala tongana akete zo, ala baa amba ti ala tongana azo so ayeke kota ahon ala.

1 Timothée 2:4

Lo ye titene azo kue asoo kuâ si ala hinga taa-tënë.

1 Timothée 6:4

andaa baba ahon ndö ti lo, lo hinga ye pepe. Lo yeke na kobela ti *bingbingo tënë na ti papa ndali ti lege so azo ayeke di iri ti aye. Aye tongaso ayeke du sarango nzara ti ye ti zo, papa, zongango ndo, bango zo tongana sioni zo senge senge

Tite 3:3

E nga, e yeke ando azo so li ti e ayeke daa pepe, azo ti ngangu li, azo so agirisa lege. Ando, e mu be ti e kue ti sara aye so anzere na be ti e si nzara ti aye nde nde ahon ndö ti e; e yeke azo ti sioni si e yeke sara kota be na tere ti amba ti e. Azo ayeke ke e; e nga, e yeke ke tere na popo ti e.

Jacques 1:18

Tongana ti so be ti lo wani aye, lo mu na e fini na lege ti tënë ti lo so ayeke taa-tënë, tongaso si e ga tongana akozo zo ti lo na popo ti aye so kue lo sara.

Jacques 3:16

Biani, ndo so kota be ayeke daa si gbugburungo kota ndo ayeke daa, wusuwusu na mara ti asioni nde nde ayeke daa.

Jacques 5:19

A-ita ti mbi, tongana mbeni zo na popo ti ala agirisa lege ti taa-tënë, mbeni mba ti lo alingbi ti kiri na lo daa.