Galasii 4:9 - Mbeti ti Nzapa - Tënë so amu fini

⁹ Me fadeso ala hinga Nzapa awe – ti tene taa-tënë, Nzapa laa ahinga ala –. Ayingo so ayeke na ngangu pepe si ala yeke nga ye oko pepe so, ala ye ti kiri ti mu peko ti ayingo ni so tongana nyen? Ngbanga ti nyen si ala azo ti Nzapa, ala ye ti kiri ti ga angbaa ti ala?

Galasii 4:9 ပူးပေါင်းရင်းမြစ်များ

1 Agbia 8:43

mo so mo yeke na yayu, na ndo so mo yeke duti daa, ayeke nzoni mo ma sambela ti wande so si ye so kue lo hunda na mo, mo mu ni na lo. Tongaso, fade azo kue ti ndö ti sese so ayeke hinga mo, ala yeke kpe mbeto ti mo tongana ti so azo ti Israel, azo ti mo, ayeke kpe mbeto ti mo; azo ni ayeke hinga nga atene, da so mbi sara so, a di iri ti mo na ndö ni.

1 Mbai 28:9

– Ti mo, molenge ti mbi Salomon, ayeke nzoni mo hinga Nzapa ti babâ ti mo; mo sara na lo na be ti mo kue, tere ti mo ayapu na kua, ngbanga ti so KOTA GBIA laa ayeke baa ya ti be ti zo si lo hinga tënë ti be ti zo. Tongana mo gi lo, fade lo yeke zia lege na mo ti wara lo; me tongana mo zia lo, fade lo yeke ke mo kpu na kpu.

Abia (Psaumes) 1:6

KOTA GBIA ayeke bata azo ti mbirimbiri, me lege ti azo ti sioni ayeke gue na kuâ.

Abia (Psaumes) 9:10

KOTA GBIA ayeke tongana ngangu gbagba so ayeke bata azo so a sara ngangu na ala; lo yeke tongana ngangu gbagba so ayeke bata azo na ngoi ti aye ti ngangu.

Sigingo 33:17

KOTA GBIA atene na Moïse: “Ye so mo hunda so, fade mbi yeke sara ni, ngbanga ti so mbi baa mo na nzoni le si mbi hinga mo na iri ti mo.”

Amato 2:5

Tongana mo sara tongaso, fade mo yeke hinga nda ti kpengo mbeto ti KOTA GBIA, mo yeke wara lege ti hinga Nzapa.

Jérémie 31:34

Zo oko na popo ti ala ayeke kiri ti fa ye na mba ti lo wala na ita ti lo pepe, atene: ‘Ala hinga KOTA GBIA!’ Biani, ti londo na kete zo asi na kota zo, fade ala kue ayeke hinga mbi; so tënë ti yanga ti KOTA GBIA laa. Mbi yeke zi sioni ti ala, mbi yeke kiri ti dabe ti mbi na siokpari ti ala pepe.”

Habakuk 2:14

Biani, fade azo ayeke hinga gonda ti KOTA GBIA si gonda ni ayeke si singo na ndö ti sese tongana ti so ngu asi singo na ya ti kota ngu-ingo.

Matthieu 11:27

“Babâ ti mbi azia ye kue na maboko ti mbi. Zo oko ahinga Molenge ni pepe, gi Babâ oko; zo oko ahinga Babâ ni pepe, gi Molenge ni oko nga na azo so Molenge ni aye ti fa Babâ ni na ala titene ala hinga lo.

Nzoni Tënë so Luc asu na mbeti 5:38

Me alingbi atuku fini vin na ya ti fini bozo.

Jean 10:14

Mbi yeke nzoni wabatango-taba. Mbi hinga ataba ti mbi si ala nga, ala hinga mbi,

Jean 10:27

Ataba ti mbi ahinga go ti mbi; mbi hinga ala si ala yeke mu peko ti mbi.

Jean 17:3

Fini so angba lakue lakue ayeke titene azo ahinga mo, mo so mo yeke oko taa Nzapa si ala hinga nga Jésus Christ, lo so mo tokua lo.

Rome 8:29

Biani, azo so Nzapa asoro ala kozoni, lo leke na be ti lo kozoni ti sara si ala ga tongana Molenge ti lo, tongaso si Molenge ni aga yaya ti a-ita mingi.

Rome 8:3

Ndia ti Moïse alingbi ti sara ye so lani pepe, ngbanga ti so aye so atia na ya ti fini ti zo akanga lege na ndia ti sarango ni, me Nzapa asara ni: lo tokua Molenge ti lo wani so amu tere ti zo – tere so ayeke tongana ti zo ti siokpari – titene lo zi azo na ya ti siokpari. Na lege so, Nzapa afâ ngbanga na ndö ti siokpari so ayeke sara kua na ya ti tere ti zo.

1 Korente 13:12

Ti fadeso, ye so e yeke baa ayeke tongana ye so zo ayeke baa na ya ti tatara; e yeke baa ye ni nzoni kue pepe. Me gbanda, e yeke baa Nzapa le na le. Ti fadeso, mbage ti hingango ye ti mbi atia; me gbanda, mbi yeke hinga ye kue tongana ti so Nzapa ahinga na mbi so.

1 Korente 15:34

Ala sara ye tongana azo so li ti ala ayeke daa, ala sara siokpari pepe! Biani, ambeni zo na popo ti ala ahinga Nzapa pepe. A-ita, mbi yeke tene tënë so ti zia kamene na le ti ala.

1 Korente 8:3

Me tongana zo aye Nzapa, Nzapa ahinga lo awe.

2 Korente 11:20

Azo ayeke sara ala na ngbaa, azo ayeke te ye ti ala, azo ayeke nzi ala, azo ayeke baa ala tongana ambumbuse zo, azo ayeke pika le ti ala, me ala yeke kanga be ti ala na ya ti aye so kue!

2 Korente 4:6

Nzapa so atene ando, atene: “Ayeke nzoni lumiere aza na ya ti vukongo ndo”, lo wani laa lo za na be ti e titene le ti e azi si e hinga gonda ti lo so ayeke za na ndö ti le ti Christ.

Galasii 3:3

Buba ti ala ahon ndoni! Ala to nda ti sara ye na ngangu ti Yingo ti Nzapa, fadeso ala ye ti hunzi ye ni na ngangu ti ala ti zo?

Galasii 4:3

E nga, e yeke ando tongaso: e yeke tongana amolenge, e yeke na gbe ti ngbaa ti ayingo so ayeke na ngangu na ndö ti dunia so.

Efeze 1:17

Mbi hunda na Nzapa ti Kota Gbia ti e Jésus Christ, Babâ so ayeke na gonda, titene lo mu na ala Yingo ti ndara. Fade Yingo ni ayeke fa Nzapa na ala, tongaso si ala hinga lo nzoni.

2 Timothée 2:19

Me kpengbango gere ti da so Nzapa aleke so ayeke yingi ande pepe. A su mbeti so na tere ti gere ti da ni, atene: “*Kota Gbia ahinga azo ti lo.” Mbeti ni akiri atene: “Zo so atene, ni yeke zo ti Kota Gbia, ayeke nzoni lo zia lege ti sarango ye ti sioni.”

Ahebro 7:18

Tongaso, a mingo ndia ti kozoni so, ngbanga ti so ndia ni ayeke na ngangu pepe si alingbi ti sara mbeni nzoni ye na zo pepe.

2 Pierre 2:20

Azo so azi tere ti ala awe na ya ti aye ti potopoto ti dunia na lege so ala hinga Jésus Christ, Kota Gbia ti e na Wasongo e, tongana ala kiri ayoro tere ti ala na ya ti aye ti potopoto ni titene ahon ndö ti ala si akanga ala, fade dutingo ti ala ayeke ga sioni mingi ahon ti kozoni.

1 Jean 5:20

E hinga so, Molenge ti Nzapa aga awe, lo mu na e lege ti hingango ndo si e hinga taa Nzapa. E na taa Nzapa, e ga oko na lege ti Molenge ti lo Jésus Christ. Lo laa lo yeke taa Nzapa, lo yeke fini so angba lakue lakue.