Galasii 3:13 - Mbeti ti Nzapa - Tënë so amu fini

¹³ Christ afuta kota ngere ti zi e na gbe ti deba awe. Deba so Ndia aga na ni na li ti e, lo yo deba ni na li ti lo wani ndali ti e. Biani, Mbeti ti Nzapa atene: “Zo so a kanga lo na nduzu na ndö ti keke, deba ayeke na li ti lo.”

Galasii 3:13 ပူးပေါင်းရင်းမြစ်များ

2 Samuel 17:23

So Ahitofel abaa so azo ake ti ma wango ti lo, lo mu lele ti lo, lo ko na ndö ni si lo kiri na gbata ti lo. Lo leke tënë ti aye ti da ti lo, na pekoni, lo kanga kamba na go ti lo si lo kui. A lu lo na ya ti du ti kuâ ti babâ ti lo.

2 Samuel 18:10

Mbeni turugu ti David abaa lo si lo gue, lo tene tënë ni na Yoab, lo tene: “Mbi baa Absalom! Lo yeke na ya ti maboko ti mbeni kota keke na le ti nduzu.”

2 Samuel 21:3

David ahunda ala, atene: “Nyen laa mbi lingbi ti sara ndali ti ala, nyen? Mbi lingbi ti sara nyen ti leke na sioni so azo asara na ala, tongaso si ala wara lege ti sara tufa na ndö ti azo ti KOTA GBIA?”

2 Samuel 21:9

Gbia azia ala na maboko ti azo ti Gabaon si azo ti Gabaon akanga kamba na go ti ala na nduzu na li ti mbeni hoto na dawa ti KOTA GBIA. Azo ni mbarambara kue akui legeoko. Azo ti Gabaon afâ ala lani na ya ti akozo lango ti fango ale ti *orze.

2 Agbia 22:19

Tënë so mbi tene na ndö ti gbata so nga na ndö ti azo ti gbata ni apika be ti mo si mo sara tere ti mo kete na gbe ti KOTA GBIA. Fade gbata so ayeke ga ngonda si ayeke ga ye so a deba ni awe. Na mango tënë so mbi tene, mo suru bongo na tere ti mo si mo toto na dawa ti mbi. Mbi nga, mbi ma mo awe; so tënë ti yanga ti KOTA GBIA laa.

Esther 7:10

Ala kanga go ti Haman na nduzu na tere ti keke so lo wani, lo leke ndali ti Mardochée. Na pekoni, ngonzo ti gbia ade.

Esther 9:14

Gbia amu yanga titene ala sara tongana ti so ala fa so: na kota-kodro ti Suze, lo kiri lo mu mbeni fini mbela si a kanga kuâ ti amolenge ti Haman na tere ti keke na nduzu.

Jérémie 44:22

KOTA GBIA akanga be ti lo gbaa na asioni sarango ye ti ala nga na asioni sarango ye ti ala so zo alingbi ti baa na le ti lo fani use pepe so. Ndani laa kodro ti ala aga ndo ti gba ti atêne, aga ngonda si zo ayeke daa mbeni pepe, aga tapande ndali ti azo so ayeke deba amba ti ala; ye ni laa a yeke baa ni laso so.

Jérémie 49:13

Mbi KOTA GBIA, mbi deba na iri ti mbi wani: Fade Bosra, li-kodro ti mo ayeke ga ngonda, ye ti hengo na ngia, ndo ti gba ti atêne; ayeke ga nga tapande ndali ti azo so ayeke deba amba ti ala. Agbata so ayeke na tere ni ayeke ga ndo ti gba ti atêne kpu na kpu.” So tënë ti yanga ti KOTA GBIA laa.

Daniel 9:24

A diko ngoi mbarambara fani balembarambara ndali ti azo ti mo nga ndali ti gbata ti mo so ayeke nde si ayeke nzoni kue. A diko ngoi ni titene sioni sarango ye na siokpari akai, titene a zi siokpari na li ti azo si mbirimbiri ti Nzapa angba lakue lakue, titene aye so zo abaa na ya ti mbeni ye tongana bango-li na tenengo peko ti tënë ti yanga ti Nzapa aga taa-tënë, titene kota da ti Nzapa so ayeke nde si ayeke nzoni kue, azo akiri azia ni nde ndali ti lo.

Daniel 9:26

Na peko ti ngoi baleomene na use so, fade a yeke fâ zo so a tuku mafuta na li ti lo so; zo oko ayeke mu maboko na lo pepe. Na pekoni mbeni makonzi ayeke londo, lo na aturugu ti lo ayeke ga ti buba gbata ni nga na ndo so a zia ni nde ndali ti Nzapa. Me na ndani, lango ti makonzi ni ayeke hunzi na lege ti ngonzo ti Nzapa so ayeke tuku na ndö ti lo. Me lo yeke sara bira ngbii asi na lango ti kuâ ti lo si lo yeke buba ndo kue alingbi na ye so a diko ndali ti lo.

Zakarii 13:7

So tënë ti yanga ti *KOTA GBIA so ayeke na ndö ti dunia kue laa: “Yongoro zeme, londo mo gue na tere ti wabatango-taba ti mbi nga na tere ti mba ti mbi so ayeke mu maboko na mbi! Fâ wabatango-taba ni si ataba ni akangbi kirikiri, mbi yeke kiri ti pika akete taba ni.”

Matthieu 26:28

ngbanga ti so ayeke mene ti mbi, mene so abongbi azo na Nzapa na ya ti *mbuki; mene so atuku ndali ti gba ti azo titene azi siokpari ti ala.

Matthieu 27:5

Tongaso Judas atuku nginza ni na ya ti kota da ti Nzapa si lo sigigi, lo gue. Na pekoni, lo kanga kamba na go ti lo si lo fâ tere ti lo.

Awatokua 5:30

Ala, ala kanga Jésus na ndö ti keke ti kroa si lo kui, me Nzapa ti akotara ti e azingo lo na kuâ.

Rome 4:25

Lo so a mu lo ndali ti siokpari ti e, Nzapa azingo lo na kuâ ti sara si e ga azo ti mbirimbiri.

Rome 9:3

Ti be ti mbi, mbi ye fade titene Nzapa adeba mbi si mbi wani, mbi kangbi na Christ ndali ti a-ita ti mbi so ayeke azo ti mara ti mbi.

2 Korente 5:21

Christ asara siokpari oko pepe, me Nzapa asara si siokpari ti e akiri na li ti lo. Tongaso na lege ti Christ, Nzapa asara si e ga mbirimbiri.

Galasii 3:10

Me azo so azia be ti ala gi na ndö ti sarango aye alingbi na Ndia, deba ti Nzapa ayeke na li ti ala. Biani, Mbeti ti Nzapa atene: “Deba aga na li ti zo so asara ye pepe alingbi na atënë kue ti ya ti mbeti ti Ndia!”

Galasii 4:5

titene lo zi azo so ayeke na gbe ti ngangu ti Ndia ni si e kue, e ga amolenge ti Nzapa.

Efeze 5:2

Ala sara ye na lege ti yengo tere tongana ti so Christ aye e si lo mu tere ti lo wani na Nzapa ndali ti e tongana *sandaga so fion ni afun nzoni si anzere na be ti Nzapa.

Ndia ti fani use ni 21:23

Tongana ye ni ayeke tongaso, alingbi kuâ ti lo angba na ya ti keke ni na bi ngbii asi na ndaperere pepe. Alingbi ala lu kuâ ni gi na oko lango ni so, ngbanga ti so kuâ ti zo so a kanga ni na ya ti keke, ayeke sara si deba ti Nzapa aga na ndö ti azo. Fade ala yeke sara si kodro so KOTA GBIA Nzapa ti ala amu na ala aga *sioni pepe.

Tite 2:14

Lo ka ando tere ti lo na kuâ ndali ti e, ti zi e na ya ti aye ti sioni kue, ti sukula e si e ga azo ti lo wani, titene e mu ngangu ti e kue ti sara anzoni ye.

Ahebro 9:12

So Christ ali na ya ti da ti bongo ni, lo li fani oko biani biani na ndo so ayeke nde si ayeke nzoni kue ahon atanga ni. So lo li, lo ya mene ti angasa wala mene ti akete bagara pepe, me lo ya mene ti lo wani si lo zi e biani biani na ya ti asiokpari awe.

Ahebro 9:15

Ndani laa, Christ ayeke zo ti lekengo songo na popo ti azo na Nzapa na lege ti mbeni fini mbuki. Azo so Nzapa airi ala alingbi ti wara anzoni ye so ayeke ngba ande lakue lakue, aye so Nzapa amu zendo ni. Azo ni so alingbi ti wara aye ni, ngbanga ti so Christ akui awe si na lege ti kuâ ti lo, azo so asara siokpari na ndembe so ala ngba na gbe ti kozo mbuki, lo lingbi ti zi ala na ya ti siokpari.

Ahebro 9:26

Tongana ye ni ayeke fade tongaso, ngbene ye so dunia abaa gigi, ka Christ abaa pasi fani mingi awe. Me so lango ti ndani aga nduru awe, Christ asi fani oko biani biani titene lo zi asiokpari ti azo na lege ti mene ti lo wani.

Ahebro 9:28

Legeoko nga, Christ amu tere ti lo na sandaga fani oko titene lo zi siokpari ti azo mingi. Ti fani use ni, lo yeke kiri ti ga ti zi siokpari ti azo pepe, me ti soo azo so kue ayeke ku lo.

1 Pierre 2:24

Christ wani ayo siokpari ti e na ya ti tere ti lo si lo kui na ni na ndö ti keke ti kroa, tongaso si e so e kangbi na siokpari na lege ti kuâ so e kui awe, e duti na fini ti sara ye ti mbirimbiri. Na lege ti aka so lo wara laa tere ti ala aga nzoni.

1 Pierre 3:18

Biani, Christ wani akui fani oko biani biani ndali ti siokpari ti azo; lo so lo yeke mbirimbiri, lo kui ndali ti azo ti kirikiri titene lo gue na ala na le ti Nzapa. Azo afâ gi tere ti lo ti zo, me Nzapa akiri na lo na fini na lege ti Yingo-Vuru.

1 Jean 4:10

Nda ti tënë ti ndoye ayeke so: e laa e ye Nzapa pepe, me Nzapa laa aye e si lo tokua Molenge ti lo ti mu tere ti lo na *sandaga ti zi asiokpari ti e.

Aye so Nzapa afa 1:5

Ayeke nzoni Jésus Christ amu aye ni na ala, lo so lo yeke fa peko ti tënë mbirimbiri! Lo yeke kozo zo so lo zingo na kuâ, lo yeke nga Makonzi ti agbia ti sese. Jésus aye e si lo zi e na gbe ti ngbaa ti asiokpari ti e na lege ti mene ti lo.

Aye so Nzapa afa 13:8

Fade azo ti ndö ti sese kue ayeke voro nyama ni. Azo so ayeke voro lo ayeke azo so, ngbene ye so dunia abaa gigi, iri ti ala ayeke na ya ti mbeti pepe, mbeti so a su iri ti azo so ayeke na taa fini daa, mbeti ti Molenge ti Taba so a fâ lo so.

Aye so Nzapa afa 5:9

Ala yeke he fini bia, atene: “Mo lingbi ti mu mbeti ni ti zi anzoroko ni, ngbanga ti so a fâ mo ando awe. Mo futa ngere ti vongo azo na mene ti mo titene mo vo azo ti akete mara kue na Nzapa, azo ti ayanga ti kodro kue, azo ti akodro kue na azo ti amara kue.