Filipe 3:19 - Mbeti ti Nzapa - Tënë so amu fini

¹⁹ Lege ti kuâ laa ala yeke gue daa so. Nzapa ti ala ayeke gi ya ti ala, ye so ayeke zia kamene na le ti azo ni so, ala yeke wara ti ala gonda daa. Ala zia be ti ala kue gi na ndö ti aye ti dunia so.

Filipe 3:19 ပူးပေါင်းရင်းမြစ်များ

Abia (Psaumes) 17:14

KOTA GBIA, na maboko ti mo wani, ayeke nzoni mo tumba ala na popo ti azo, mo zi ala na ndö ti sese so! Ye so alingbi na ala na ndö ti dunia so laa! Ayeke nzoni ala nyon sengo ye so mo bata ndali ti ala; ala nyon ni asi ya ti ala. Ayeke nzoni amolenge ti ala anyon alingbi na ala, tanga ni angba ndali ti atara ti ala.

Abia (Psaumes) 52:1

Bia so ayeke ndali ti makonzi-bia; bia ti fango ye na zo; bia ti David.

Jérémie 44:17

Me e yeke sara ye alingbi gi na tënë so kue asigigi na yanga ti e: e yeke ngba ti zö dukani na gbia-wali ti yayu si e yeke tuku samba ti mu na sandaga na lo tongana ti so e sara ni ngbii asi laso. Ababâ ti e, agbia ti e na akota zo ti kodro ti e asara nga legeoko tongaso na ya ti agbata ti Juda nga na ndö ti abalabala ti Jérusalem. Lani so e yeke sara tongaso, e yeke na kobe gbani gbani ti tengo ni, e yeke duti nzoni si e hinga ye so iri ni sioni pepe.

Ezekiel 13:19

Ala bi buba na tere ti mbi na le ti azo ti mbi ndali ti kete le ti *orze nga ndali ti nduru mapa. Ala yeke tene mvene na azo ti mbi so ayeda ti ma atënë ti mvene ti ala, awali ni. Tongaso ala yeke fâ azo so alingbi na kuâ pepe si ala yeke bata azo so alingbi na kuâ.

Ezekiel 34:3

Ti ala, ala yeke te mafuta ti ataba ni, ala yeke yu bongo so a sara na kua ti tere ti ataba ni, ala yeke fâ ataba so akono nzoni; me ala yeke gi kobe ndali ti ataba ni pepe.

Osée 4:7

“Awayango-sandaga kue kue kue asara siokpari so ake mbi; fade mbi yeke sara si nengo ti kua ti ala aga kota ye ti kamene.

Mishe 3:11

Amakonzi ti agbata ni ayeke fâ ngbanga gi ndali ti warango goro; awayango-sandaga ti ala ayeke fa ye gi ti wara ye na pekoni; awayanga-Nzapa ti ala ayeke fa ye so ayeke si gi ndali ti warango nginza. Na ndö ni kue, ala yeke luti na ndö ti *KOTA GBIA si ala tene: “KOTA GBIA ayeke na popo ti e pepe? Fade ye ti sioni alingbi ti si na e pepe.”

Mishe 3:5

Tënë so *KOTA GBIA atene na ndö ti awayanga-Nzapa so ayeke handa azo ti mbi ayeke so: “Tongana ala wara ye ti tengo ni, ala yeke fa tënë ti siriri; me tongana mbeni zo amu na ala ye ti tengo ni pepe, ala yeke londo na bira na tere ti zo ni.

Malashii 1:12

Me ala, awayango-sandaga, ala baa iri ti mbi tongana senge ye si ala tene: ‘Meza ti KOTA GBIA aga *sioni awe. Kobe so ayeke na ndö ni so akpa pepe.’

Matthieu 16:23

Me Jésus abaa ndo na peko si lo tene na Pierre: “Satan, hon kâ na tere ti mbi! Mo yeke gi ti kinda mbi, ngbanga ti so bango ndo ti mo ayeke tongana ti Nzapa pepe, me ayeke tongana ti zo.”

Matthieu 25:41

“Na pekoni, fade Gbia ni ayeke tene na azo so ayeke na mbage ti maboko ti lo ti wali: ‘Ala hon yongoro na tere ti mbi, ala so Nzapa adeba ala awe so! Ala gue na ya ti kota wâ so ayeke gbi lakue lakue, so a leke ni ndali ti Zabolo na *a-ange ti lo.

Nzoni Tënë so Luc asu na mbeti 12:19

Tongaso, fade mbi yeke tene na mbi wani, mbi tene: Baa, mo yeke na aye mingi so alingbi na mo ndali ti ngu mingi; mo wu tere ti mo, mo te, mo nyon, mo sara ngia!’

Nzoni Tënë so Luc asu na mbeti 16:19

“Ando, mbeni zo ti mosoro ayeke daa so lo yeke yu gi apendere bongo ti nginza. Lo yeke duti nzoni si lakue na da ti lo, gi matanga na matanga.

Nzoni Tënë so Luc asu na mbeti 18:4

Wafango-ngbanga ni ake lege mingi. Na pekoni, lo tene na be ti lo, lo tene: ‘Ataa so mbi yeke kpe mbeto ti Nzapa pepe si mbi yeke kpe nga mbeto ti azo pepe,

Rome 16:18

ngbanga ti so azo ni ayeke sara kua ti Christ, *Kota Gbia ti e pepe, me ala yeke gi gi kobe ti ya ti ala. Anzoni tënë na anzerengo tënë ayeke sigigi na yanga ti ala ti handa na azo so le ti ala azi pepe.

Rome 6:21

Aye so ando ala yeke sara so, nzoni ye ti nyen laa ala wara daa? Fadeso aye ni asara ala kamene, ngbanga ti so ye ti peko ni ayeke gi kuâ!

1 Korente 3:3

ngbanga ti so ala ngba lakue ti sara ye gi tongana ti azo ti dunia so. So tënë ti kota be na papa angba na popo ti ala so, so afa atene, ala yeke sara ye gi na lege ti azo ti dunia so pepe? Ala yeke sara ye gi tongana ti azo kue pepe?

1 Korente 5:2

Na ndö ni kue, ala yeke pika kate ti ala daa! Ala lingbi fade ti duti na vundu ndali ti ye so pepe? Alingbi fade titene ala zi zo so asara mara ti ye tongaso na popo ti ala!

1 Korente 5:6

Ye so ala yeke pika kate ti ala daa so, anzere oko pepe! Ala hinga pepe atene, gi kete mama ti mapa laa ayeke sara titene mapa ni kue alondo?

2 Korente 11:12

Ye so mbi yeke sara laso so, fade mbi yeke ngba lakue ti sara ni, tongaso si azo so aye ti wara mbeni ye ti luti na ndö ni ti gonda tere ti ala tongana ti so e yeke gonda tere ti e, fade ala wara ye ni pepe.

2 Korente 11:15

Tongaso, azo ti kua so asara tere ti ala tongana azo so ayeke sara ye ti mbirimbiri, so ayeke fini ye pepe. Ye so ayeke si ande na ala na nda ti gigi ti ala ayeke lingbi gi na aye so ala sara.

Galasii 6:13

Ataa so azo ni afâ ganza, ala yeke sara ye alingbi na *Ndia pepe! Azo ni aye ti fâ ala na ganza ti wara lege ti gondango tere ndali ti ye so azo ni asara na tere ti ala, a-ita.

Filipe 2:21

Atanga ti azo ni kue ayeke gi gi nzoni ti ala wani; ala yeke gi nzoni ti Jésus Christ pepe.

Kolose 3:2

Ala zia be ti ala na aye ti yayu, me na aye ti sese pepe.

2 Tesalonike 1:9

Ngbanga so a yeke fâ na li ti azo ni ayeke so: Nzapa ayeke buba ande ala lakue lakue, ala yeke duti yongoro na le ti Kota Gbia nga na kota gonda ti lo

2 Tesalonike 2:12

Tongaso, ala so kue ama na be na taa-tënë pepe si be ti ala ayeke nzere na sarango sioni ye, fade Nzapa ayeke fâ ngbanga na li ti ala.

2 Tesalonike 2:8

Fade Zo ti sioni ayeke si, Kota Gbia Jésus ayeke fâ lo biani biani na pupu ti yanga ti lo. Lo yeke mingo lo biani biani na lege ti zango ndo ti gango ti lo.

1 Timothée 6:5

na bingbingo tënë so ayeke kai hio pepe; aye ni so ayeke londo lakue na popo ti azo so gbungo-li ti ala aga sioni awe, ala hinga taa-tënë oko pepe. Ala baa ti ala atene, gbungo tënë ti Nzapa ngangu ayeke mbeni lege ti warango mosoro.

2 Timothée 3:4

Ala yeke azo ti kango amba ti ala, azo ti ngonzo, azo so baba ahon ndö ti ala; ala ye aye so anzere na ala ahon Nzapa;

Jacques 4:16

Me fadeso, ala yeke pika kate ti ala si ala yeke gonda tere ti ala. Mara ti pikango kate tongaso ayeke nzoni pepe.

2 Pierre 2:1

Ando, awayanga-Nzapa ti mvene ayeke na popo ti azo ti Israel. Legeoko nga, fade ambeni wafango-ye ti mvene ayeke duti na popo ti ala, a-ita. Na lege ti mayere, azo ni so ayeke ga na ambeni fango ye ti mvene so ayeke gue na zo na kuâ. Azo ni so ayeke gue ngbii ti ke tënë ti Gbia so asoo ala; sarango ye ti ala ayeke bi ala gi hio tongaso na ya ti kpale so ayeke mingo ala.

2 Pierre 2:13

Futa so ala yeke wara ande na peko ti sarango ye ti kirikiri ti ala ni laa. Ye so anzere na be ti azo ni ayeke sarango ye ti kamene na kota lâ. Tongana ala duti na ndo oko na ala, a-ita, ti te ti nyon, so ayeke mbeni ye ti kamene si ayeke sara titene iri ti ala abuba. Azo ni ayeke wara ngia na lege ti handango ala, a-ita.

2 Pierre 2:3

Ndali ti nzara ti nginza, azo so ayeke handa ala ti te ala na lege ti atënë ti mvene. Me ti azo ni, aninga mingi so ngbanga ti ala alondo awe, ngbanga so aga nduru ti ti na ndö ti ala: kpale so ayeke mingo ala ade yongoro pepe.

Jude 1:10

Me ti azo ni so, ala yeke zonga aye so ala hinga nda ni pepe. Ataa aye so ala hinga, ala hinga ni tongana anyama so ayeke na ndara pepe si aye ni ayeke buba fini ti ala.

Jude 1:16

Be ti azo ni anzere laoko pepe, demango tere ti ala ahon ndoni; ala ye ti sara ye alingbi gi na asioni nzara ti be ti ala; ala yeke tene gi atënë ti baba si ala yeke diko apendere tënë ti handa na azo ngbanga ti warango ye.

Jude 1:4

Biani, ambeni zo ti sioni ali na popo ti ala na hondengo ni; azo ni ayeke buba ya ti tënë ti nzoni be ti Nzapa ti e ti mu lege na ala wani ti sara aye ti potopoto ti ala. Ala ke tënë ti Jésus Christ, lo so lo yeke oko Makonzi ti e na *Kota Gbia ti e. Mbeti ti Nzapa atene tënë ti ngbanga so a fâ na li ti azo ni, ngbene ye aninga awe.

Aye so Nzapa afa 18:7

Ala sara pasi na lo, ala bi lo na ya ti aye ti vundu alingbi gi na gondango tere ti lo nga na kota nzara ti warango ye ti lo. Ala sara na lo aye ni so ndali ti so lo yeke tene na be ti lo, lo tene: ‘Mbi yeke gbia-wali, mbi so mbi duti ge so! Mbi yeke wali-mua pepe si mbi yeke sara mua laoko pepe.’

Aye so Nzapa afa 19:20

A gbu nyama ni na wayanga-nzapa ti mvene so asara aye ti kpene na dawa ti lo so. Na lege ti aye ti kpene laa lo wara lege ti handa azo so awara nzoroko ti nyama ni si avoro limo so akpa nyama ni so. A mu ala use kue si a bi ala na fini le ti ala na le ti kota wâ ti *sufre.

Aye so Nzapa afa 21:8

Me ti azo ti mbeto, azo so azia lege ti mabe, azo ti sarango asioni ye, azo ti fango zo, azo ti sarango aye ti ndumba, azo ti guengo na gbe ti yoro, azo ti vorongo anzapa nde nga na azo ti mvene kue, ye so a leke ti ku na ala ayeke kota le ti wâ ti *sufre. So laa ayeke kuâ ti use ni.”

Aye so Nzapa afa 22:15

Na gigi, azo so sarango ye ti ala akpa ti mbo, azo ti guengo na gbe ti yoro, azo ti sarango aye ti ndumba, azo ti fango zo nga na azo so aye mvene si ayeke tene mvene!

1 Samuel 2:29

Ngbanga ti nyen laa mo na amolenge ti mo ayeke baa sandaga ti mbi na ye so mbi mu yanga si azo aga na ni na ya ti da ti mbi, tongana mbeni buba ye na le ti ala so? Ngbanga ti nyen laa mo ne amolenge ti mo ahon mbi? Azo ti mbi so ayeke azo ti Israel aga na mbi anzoni ye ti mu na sandaga. Ngbanga ti nyen laa mo na amolenge ti mo ayeke te ni si ala yeke kono na ni so?