Esdras 6:22 - Mbeti ti Nzapa - Tënë so amu fini

²² Na pekoni, na ya ti lango mbarambara, ala sara na ya ti ngia, matanga ti Mapa so a sara na mama ni pepe. KOTA GBIA azia ngia na be ti ala, ngbanga ti so lo sara si be ti gbia Darius aga nzoni na mbage ti ala; ye so asara lani si be ti azo ti Israel awara ngangu si ala kiri ti gbu kua ti lekengo kota da ti Nzapa ti Israel.

Esdras 6:22 ပူးပေါင်းရင်းမြစ်များ

2 Agbia 23:29

Na ngoi so Yosias ayeke gbia, Faraon Neko, gbia ti Ezipte ague ti wara tere na gbia ti Asirii na mbage ti *bale ti Efrate. Gbia Yosias ague ti tiri bira na lo, me gi na ya ti kozo tengbingo tere ni, a fâ Yosias na Megido.

2 Mbai 23:18

Na pekoni, Yoyada azia kua ti batango kota da ti KOTA GBIA na maboko ti awayango-sandaga so ayeke azo ti mara ti Lévi. David akangbi lani awayango-sandaga ni na ya ti abongbi nde nde na ya ti kota da ti KOTA GBIA titene ala ya na KOTA GBIA asandaga so a yeke gbi ni kue na wâ, alingbi na *Ndia ti Moïse. Lo mu yanga na ala ti sara kua ni na hengo bia na ngia.

2 Mbai 29:30

Na pekoni, gbia Ezekias na amakonzi atene na azo ti mara ti Lévi ti he bia ti sepela KOTA GBIA na lege ti abia so David na Asaf, zo ti bango nda ti aye aleke ando so. Azo ti mara ti Lévi asepela KOTA GBIA na ngia, na pekoni ala kuku, akpo li ti ala na sese.

2 Mbai 30:21

Tongaso, na ngia mingi, azo ti Israel so ayeke na Jérusalem asara matanga ti Mapa so a sara na mama ni pepe; ala sara ni na ya ti lango mbarambara. Na ya ti lango oko oko, azo ti mara ti Lévi na awayango-sandaga ayeke he bia ti sepela KOTA GBIA, ala yeke pika aye ti mozoko so ayeke toto ngangu ndali ti KOTA GBIA.

2 Mbai 33:11

Tongaso KOTA GBIA asara si amakonzi ti aturugu ti gbia ti Asirii aga na tere ti ala. Aturugu ni agbu Manase, ala yoro *kongi na ngbangba ti lo, ala kanga lo na zingiri ti bengba wen si ala gue na lo na Babilone.

2 Mbai 35:17

Na peko ti matanga ti Pake ni, azo ti Israel so ayeke kâ asara matanga ti Mapa so a sara na mama ni pepe na ya ti lango mbarambara.

Esdras 1:1

Na kozo ngu so Sirus ayeke gbia ti Perse, *KOTA GBIA aye ti sara si tënë ti lo so lo zia ando na yanga ti Jérémie ti tene, aga taa-tënë. Nilaa KOTA GBIA azia na be ti Sirus ti mu yanga titene a to mbela na tënë ti Sirus na ya ti kodro ti lo kue; a su nga atënë ni na mbeti, atene:

Esdras 6:1

Tongaso gbia Darius amu yanga titene a gi ndo na Babilone na ya ti da ti batango angbene buku na ti amosoro ti gbia.

Esdras 7:27

Esdras atene: “Mbi mu singila na *KOTA GBIA, Nzapa ti akotara ti e! Lo laa lo zia na be ti gbia titene lo ne kota da ti Nzapa ti Jérusalem.

Néhémie 13:6

Na ngoi so aye so asi, mbi yeke na Jérusalem pepe. Na ngu baleota na use ni so Artakzerses ayeke gbia ti Babilone, mbi kiri na tere ti lo. Ngu mingi na pekoni, mbi hunda na gbia ti mu lege na mbi

Amato 16:7

Tongana KOTA GBIA ayeda na lege ti sarango ye ti mbeni zo, ataa awato ti zo ni, lo yeke leke songo na popo ti lo na ala.

Amato 21:1

Tënë ti be ti gbia ayeke na ya ti maboko ti KOTA GBIA tongana kete ngu so ayeke sua. KOTA GBIA ayeke hon na atënë ti be ni na ndo so kue be ti lo wani aye.

Ezekiel 23:23

Akoli ti Babilone, ti Kalde kue, ti Pekod, ti Shoa na ti Koa, ti Asirii si ayeke ga. Ala kue ayeke amaseka-koli so apendere mingi; ala yeke agovoronere, akota komanda, akpengba zo ti bira, akota zo ti kodro, azo so kue ahinga ti kpe na ambarata nzoni.

Matthieu 26:17

Na kozo lango ti matanga ti Mapa so a sara na mama ni pepe, adisiple aga na tere ti Jésus si ala hunda lo, atene: “Mo ye e leke na mo kobe ti *Pake na ndo wa?”

Jean 19:11

Jésus akiri tënë na lo: “Mo yeke na ngangu na ndö ti mbi pepe, gi ngangu so Nzapa amu na mo. Ndani laa zo so azia mbi na maboko ti mo so, kungba ti siokpari ti lo ane ahon ti mo.”