Ésaïe 9:15 - Mbeti ti Nzapa - Tënë so amu fini

¹⁵ Azo so afa lege na azo ni so, ala fa na azo ni sioni lege; azo so azo ni afa lege na ala so, ala mu sioni lege.

Ésaïe 9:15 ပူးပေါင်းရင်းမြစ်များ

1 Agbia 13:18

Wayanga-Nzapa ni atene na lo: “Mbi nga, mbi yeke wayanga-Nzapa tongana mo. Andaa mbeni *ange atene na mbi peko ti tënë ti yanga ti KOTA GBIA, atene: ‘Mu lo, mo ga na lo na da ti mo, lo te kobe, lo nyon ngu.’ ” Andaa mvene laa lo tene.

Mbeti ti Job 22:8

Me mo yeke zia ka azo ti ngangu amu sese ti ambeni zo; azo so ayeke na tere ti azo ti ngangu ni ayeke duti na sese ni.

Ésaïe 19:15

Na Ezipte, zo oko ayeke kiri ti sara ye pepe, ataa li ni, ataa damba ni, ataa maboko ti mburu na pere ti sosongo.

Ésaïe 23:9

*KOTA GBIA so ayeke na ndö ti dunia kue laa aleke na be ti lo ti mingo baba ti azo so azo ayeke gonda ala, ti bi kamene na le ti akota zo ti dunia so.

Ésaïe 28:15

“Ala yeke tene: E na kuâ e ga *ambuki awe, e na ndo ti akuâ, e leke tënë awe. Tongana ye ti ngangu ayeke si ande, ye ni ayeke wara e pepe. Biani, tenengo mvene aga ndo so e yeke kpe daa ti bata tere ti e, handango azo ayeke ndo ti hondengo tere ti e.”

Ésaïe 28:17

Mbi yeke mu sarango ye na legeni tongana kamba ti hakango na ye, ye ti mbirimbiri tongana kamba ti amason.” Me fade *pembe ti bekpa ayeke zi ndo ti batango tere ti ala ti mvene ti hon na ni, ngu ayeke suku ti mu ndo ti hondengo tere ti ala.

Ésaïe 28:7

Ndali ti vin so asara ala, ataa awayango-sandaga na awayanga-Nzapa agirisa lege. Ndali ti ngangu samba, ala yeke tambula kirikiri. Samba asara si ala girisa lege. Ndali ti vin, li ti ala aga kirikiri, tongana ala baa ye na ya ti mbeni ye tongana bango-li, ala yeke girisa lege, ala hinga li ti ala na ngbanga so ala yeke fâ pepe.

Ésaïe 29:10

Biani, *KOTA GBIA asara si yingo ti kota lango aga na ndö ti ala. Lo kanga le ti awayanga-Nzapa ti ala, lo bi bongo na le ti azo ti bango nda ti aye ti ala.

Ésaïe 3:12

KOTA GBIA atene: “Azo ti mbi, azo so ayeke sara ngangu na ala ayeke gi amolenge, awali laa ayeke sara komandema na ndö ti ala. Azo ti mbi, azo so ayeke fa lege na ala asara si ala girisa lege, ala yeke fa na ala sioni lege.”

Ésaïe 3:5

Azo ayeke sara ngangu na amba ti ala na popo ti ala, zo oko oko ayeke sara ngangu na mba ti lo. Molenge ayeke londo ti tiri na kangba; senge zo ayeke londo ti tiri na kota zo.

Ésaïe 43:27

Kozo kotara ti mo asara siokpari awe, azo ti tenengo peko ti tënë ti yanga ti mo atomboka na tere ti mbi.

Ésaïe 5:13

Ndani laa KOTA GBIA atene: “Fade a yeke gbu azo ti mbi ti gue na ala na kodro wande, ngbanga ti so ala hinga ndo pepe. Akota zo ayeke kui nzara si asenge zo ayeke kui nzara ti ngu.”

Ésaïe 59:3

Biani, ya ti maboko ti ala asi singo na mene, ali ti maboko ti ala aga sioni ndali ti sioni ti ala; yanga ti ala ayeke tene atënë ti mvene, menga ti ala ayeke diko atënë ti kirikiri.

Ésaïe 59:4

Tënë so ala gue na ni na le ti ngbanga, ayeke na legeni pepe; ala yeke gbu koko ti azo na lege ti taa-tënë pepe. Ala yeke luti na ndö ti ye so ayeke ye oko pepe, ala yeke tene atënë ti mvene; ala yeke mu ngo ti ye ti sioni si ala yeke du ye ti kirikiri.

Jérémie 23:32

Awayanga-Nzapa so ayeke tene peko ti bango-li ti mvene so, mbi na ala, e yeke baa ya ni; so tënë ti yanga ti KOTA GBIA laa. Na tenengo peko ti bango-li ni, ala yeke handa azo ti mbi ti gue kirikiri na lege ti atënë ti mvene ti ala nga na lege ti baba ti ala. Mbi, mbi tokua ala pepe, mbi mu yanga na ala pepe; ala yeke sara nzoni na azo ti mbi oko pepe; so tënë ti yanga ti KOTA GBIA laa.”

Jérémie 23:9

Tënë na ndö ti awayanga-Nzapa: Be ti mbi afâ na ya ni kâ, tere ti mbi kue ayeke do. Mbi yeke tongana zo so anyon samba ahon ndö ti lo ngangu mingi. Aye so kue asi na mbi ndali ti *KOTA GBIA nga ndali ti atënë ti lo so ayeke nde si ayeke nzoni kue. Lo tene:

Jérémie 5:31

awayanga-Nzapa ayeke tene peko ti atënë ti mvene; awayango-sandaga ayeke gi ti wara aye ndali ti ala wani si azo ti mbi ayeda na sarango aye tongaso. Na ndani, fade ala yeke sara nyen?”

Abia ti demango tere 2:14

Awayanga-Nzapa ti ala awara ambeni tënë ndali ti ala na ya ti mbeni ye tongana bango-li; me atënë ni gi mvene, gi abuba tënë. Awayanga-Nzapa ni afa asioni ti ala, azo ti gbata ti Sion na gigi pepe; ye so alingbi fade ti zi ala na ya ti ngbaa. Biani, atënë ti awayanga-Nzapa ni gi mvene na asenge senge tënë.

Ezekiel 13:19

Ala bi buba na tere ti mbi na le ti azo ti mbi ndali ti kete le ti *orze nga ndali ti nduru mapa. Ala yeke tene mvene na azo ti mbi so ayeda ti ma atënë ti mvene ti ala, awali ni. Tongaso ala yeke fâ azo so alingbi na kuâ pepe si ala yeke bata azo so alingbi na kuâ.

Ezekiel 13:22

Na lege ti mvene ti ala, awali ni, ala sara si be ti azo ti mbirimbiri awoko, ataa so mbi laa mbi zia vundu na be ti azo ti mbirimbiri ni pepe. Ala mu ngangu na be ti azo ti sioni si ala lingbi ti zia lege ti sioni ti ala pepe ti ngba na fini.

Osée 9:8

Zo so ayeke sara sanziri ti azo ti Efraim ayeke mbi wayanga-Nzapa. Mbi yeke nduru na Nzapa ti mbi. Me azo ayeke zia kuku ti gbu na mbi na ndö ti alege so kue mbi yeke hon daa. Ataa na ya ti da ti Nzapa ti mbi, ala yeke sara ngangu na mbi.

Amos 2:4

Tënë so KOTA GBIA atene ayeke so: “Mbi yeke na tënë na azo ti Juda ndali ti asioni ye ota, wala osio so ala sara: ala baa ndia ti mbi KOTA GBIA tongana mbumbuse ye, ala ke ti sara ye alingbi na ambela ti mbi; ala mu peko ti anzapa ti mvene tongana ti so akotara ti ala asara ando. Ndani laa, ngbanga so mbi fâ na li ti ala, mbi yeke kiri na ndö ni oko pepe.

Mishe 3:5

Tënë so *KOTA GBIA atene na ndö ti awayanga-Nzapa so ayeke handa azo ti mbi ayeke so: “Tongana ala wara ye ti tengo ni, ala yeke fa tënë ti siriri; me tongana mbeni zo amu na ala ye ti tengo ni pepe, ala yeke londo na bira na tere ti zo ni.

Malashii 2:9

Mbi nga, mbi yeke sara titene azo abaa ala tongana ambumbuse zo si azo ni abi buba na tere ti ala. Biani, lege so mbi fa na ala, awayango-sandaga, ala yeke mu ni pepe; ala yeke baa azo bango si ala yeke fâ ya ti tënë ti ala na lege ti ndia.”

Matthieu 24:24

Biani, fade amesii ti mvene na awayanga-Nzapa ti mvene ayeke ga si ala yeke sara akota ye ti kpene na aye ti dongo be ti handa na azo. Tongana lege ayeke daa, ataa azo so Nzapa asoro ala, ala yeke handa ala.

Matthieu 7:15

“Ala sara hange na awayanga-Nzapa ti mvene! Awayanga-Nzapa ni ayeke yu poro ti tere ti taba si ayeke ga na popo ti ala. Andaa ala yeke taa asioni mbo ti ngonda.

1 Jean 4:1

A-ita ti mbi so mbi ye ala mingi, tongana azo atene, ani yeke na Yingo ti Nzapa, ala yeda na ala kue pepe; me ayeke nzoni ala gi nda ti azo ni ti baa wala yingo so ala yeke na ni so alondo na Nzapa. Biani, *awayanga-nzapa mingi ti mvene amu ndö ti dunia kue awe.

Aye so Nzapa afa 19:20

A gbu nyama ni na wayanga-nzapa ti mvene so asara aye ti kpene na dawa ti lo so. Na lege ti aye ti kpene laa lo wara lege ti handa azo so awara nzoroko ti nyama ni si avoro limo so akpa nyama ni so. A mu ala use kue si a bi ala na fini le ti ala na le ti kota wâ ti *sufre.

1 Samuel 9:6

Zo ti kua ni atene na lo: “Mbeni zo ti Nzapa ayeke na ya ti gbata so. Azo ane lo mingi; tënë so kue lo yeke tene, ye ni ayeke si biani. E gue, e baa lo si. E hinga pepe, fade lo yeke fa na e lege so e lingbi ti mu ni.”