Ésaïe 57:5 - Mbeti ti Nzapa - Tënë so amu fini

⁵ Nzara ti tere ti ala ayeke gbi ala tongana wâ nduru na tere ti akota keke, na gbe ti afini keke so kue kugbe ni ayeke gbani gbani. Ala yeke fâ amolenge ti mu na *sandaga na tere ti ngu nga na popo ti atêne so asuru.

Ésaïe 57:5 ပူးပေါင်းရင်းမြစ်များ

1 Agbia 14:23

Legeoko tongana akotara ti ala, ala leke ando na ndö ti ahoto titene ala voro anzapa nde daa; ala leke angbongboro têne so aluti na nduzu, ala leke nga akeke so aluti na nduzu ndali ti nzapa-wali Ashera. Ala zia aye ni so na li ti akete hoto kue nga na gbe ti afini keke so kue kugbe ni ayeke gbani gbani.

2 Agbia 17:10

Ala leke angbongboro têne so aluti na nduzu ndali ti ala wani, ala leke nga akeke so aluti na nduzu ndali ti nzapa-wali *Ashera. Ala leke aye so na li ti ahoto kue nga na gbe ti afini keke kue.

2 Agbia 17:7

Ye so asi na azo ti Israel, ngbanga ti so ala sara siokpari ti ke *KOTA GBIA, Nzapa ti ala, lo so lo zi ala na maboko ti Faraon, gbia ti Ezipte. Nzapa so laa asara si ala sigigi na kodro ni. Me ala voro ambeni nzapa nde.

2 Agbia 23:10

Yosias asara si Tofet so ayeke na popo-hoto ti Hinom aga *sioni, tongaso si azo akiri agbi amolenge ti ala ti koli na ti wali na wâ pepe ti mu na *sandaga na nzapa Molek.

2 Mbai 28:3

Lo wani, lo zö dukani na popo-hoto ti Molenge ti Hinom si lo gbi amolenge ti lo ti koli na wâ ti mu na *sandaga. Lo mu peko ti asioni sarango ye ti amara nde, asioni ye so zo alingbi ti baa na le ti lo fani use pepe. Ando KOTA GBIA atumba amara ni na ndö ti sese ni si lo mu na azo ti Israel.

Sigingo 32:6

Lango oko na pekoni, na kota ndaperere, ala ya *sandaga so a yeke gbi ni kue na wâ, ala ga na sandaga ti beoko. Azo ni aduti ti te, ti nyon si ala londo ti sara ngia.

Ésaïe 1:29

Biani, akeke so ala yeke voro ni si ala ye ni mingi so, fade kamene ayeke sara ala ndali ni. Apendere ndo so ala soro ti voro ayanda daa so, kamene ayeke gbu le ti ala ndali ni.

Jérémie 17:2

Tongana ti so ala yeke dabe ti ala na amolenge ti ala, ala yeke dabe ti ala legeoko tongaso na agbalaka ti ala, na akeke ti Ashera ti ala nga na akeke so afini kugbe ayeke daa gbani gbani si ayeke na ndö ti ahoto.

Jérémie 2:20

*KOTA GBIA atene: “Mo mara ti Israel, ngu na ngu, kpu na kpu, mo ke ti duti na gbe ti komandema ti mbi; mo fâ ya ti ye so abongbi mbi na mo. Mo tene: ‘Mbi ye ti sara kua ti ngbaa mbeni pepe’. Me na ndö ti akete hoto kue, na gbe ti afini keke so kue kugbe ni ayeke gbani gbani, mo lango na sese ti sara ye ti ndumba.

Jérémie 3:13

Gi ye oko: ayeke nzoni mo hinga sioni ti mo si! Hinga, mo tene, mo sara ngangu li na KOTA GBIA, Nzapa ti mo. Na gbe ti afini keke so kue kugbe ni ayeke gbani gbani, mo huru mo ti kâ, mo huru mo ti ge ti zia tere ti mo na anzapa ti awande. Mo ke ti ma yanga ti mbi; so tënë ti yanga ti KOTA GBIA laa.’ ”

Jérémie 3:6

Na ngoi ti gbia Yosias, *KOTA GBIA atene na mbi: “Mo baa ye so Israel-wali-pupulenge asara so? Lo gue na li ti ahoto so kue ayo na nduzu, lo si na gbe ti afini keke so kue kugbe ni ayeke gbani gbani ti sara aye ti ndumba kâ.

Jérémie 32:35

Na popo-hoto ti Hinom, ala leke ndo na li ti ahoto ndali ti Baal. Kâ, ala yeke gbi amolenge ti ala ti koli na ti wali na wâ ti mu na sandaga na nzapa Molek. Mbi mu yanga na ala laoko pepe ti sara ye tongaso! Mara ti ye tongaso aga na li ti mbi laoko pepe. Na sarango mara ti sioni ye tongaso, so zo alingbi ti baa na le ti lo fani use pepe so, ala pusu azo ti Juda ti sara sioni.

Jérémie 50:38

Bira aga na tere ti angu ti lo! Ayeke nzoni angu ni ahole kue! Biani, Babilone ayeke kodro ti ayanda; afungo nzapa ti ala asara si li ti azo ti vorongo ala aga kirikiri.

Jérémie 51:7

Babilone ayeke ando mbeni kopo ti lôro na maboko ti KOTA GBIA! Ye ti ya ti kopo ni asara azo ti dunia kue tongana samba. Azo ti amara nde anyon vin ti lo ngbii li ti ala aga kirikiri.

Jérémie 7:31

Na popo-hoto ti Hinom, ala leke ndo na li ti hoto so ala di iri ni Tofet. Kâ, ala yeke gbi na wâ amolenge ti ala ti koli na ti wali ti mu na *sandaga. Andaa, so ayeke mbeni ye so mbi mu yanga laoko pepe titene ala sara ni; mbeni tënë tongaso aga na li ti mbi laoko pepe.

Ezekiel 16:20

Jérusalem, amolenge-koli na amolenge-wali so mo du ala na mbi, mo ya ala na sandaga na ayanda ni titene ala ga kobe ti ala! Sarango ye ti ndumba ti mo alingbi lani na mo pepe?

Ezekiel 20:26

Mbi zia ala titene ala ga *sioni na lege ti akozo molenge ti ala so ala yeke gbi na wâ ti mu na *sandaga. Mbi sara tongaso titene ala baa pasi si ala hinga atene, mbi laa mbi yeke KOTA GBIA.”

Ezekiel 20:28

Mbi sara si ala li na kodro so mbi yoro lani maboko ti mbi na nduzu, mbi deba yanga ti mbi ti mu na ala. Na ya ti kodro ni, le ti ala agi ndo so akete hoto kue ayeke daa nga na akeke so gba ti akugbe ayeke daa. Kâ laa, ala mu asandaga ti ala, ala mu amatabisi ti ala ti gingo na yanga ti mbi, ala mu asandaga so fion ni afun nzoni nga na sandaga ti samba.

Ezekiel 20:31

Ti fadeso, ala ngba ti ga *sioni na lege ti amatabisi ti ala, na lege ti amolenge ti ala so ala yeke gbi na wâ ti mu na sandaga na ayanda. Ala azo ti Israel, na sarango ye tongaso, fade mbi yeke yeda titene ala ga ti hunda mbi na mbeni tënë? Fini ti mbi! So tënë ti yanga ti mbi, Kota Gbia NZAPA laa. Fade mbi yeke yeda pepe titene ala hunda mbi na mbeni tënë!

Ezekiel 6:13

Fade kuâ ti ala ayeke lango na sese gbani gbani na popo ti ayanda ti ala, kuâ ni ayeke lango na sese angoro tere ti agbalaka ti ala, na ndö ti akota hoto na akete hoto kue, na gbe ti akeke so akugbe ni angba fini ni nga na gbe ti akeke so kue kugbe ni ayeke gbani gbani, na ando so kue ala yeke zö ayombo so fion ni anzere na ayanda ti ala kue. Tongaso, fade ala yeke hinga atene, mbi laa mbi yeke KOTA GBIA.

Awayango-sandaga 18:21

“Alingbi mo mu mbeni molenge ti mo oko pepe titene a gbi lo na wâ na *sandaga na nzapa Molek. So fade ayeke sara si iri ti mbi, Nzapa ti mo abuba: mbi laa mbi yeke KOTA GBIA.

Wungo ti azo 25:6

Na ndembe ni so, mbeni zo ti Israel amu mbeni wali ti mara ti Madian, lo ga na lo na popo ti azo ti Israel, taa na le ti Moïse nga na le ti bongbi ti azo ti Israel kue. Andaa azo ti Israel abongbi na yanga ti da ti bongo so KOTA GBIA na azo ti lo ayeke wara tere daa si ala yeke toto.

Ndia ti fani use ni 12:2

Amara nde so ala yeke gue ti mu sese ti ala aleke ambeni ndo na li ti ahoto, na li ti akete hoto nga na gbe ti afini keke so kue kugbe ni ayeke gbani ti voro anzapa ti ala daa. Alingbi ala, azo ti Israel, ala buba ando ni so kue kue kue.

Aye so Nzapa afa 18:3

Amara kue anyon vin ti lo, vin ti kota nzara ti aye ti ndumba so lo yeke sara. Agbia ti sese asara aye ti ndumba na lo, azo ti dengo buze ti sese aga azo ti mosoro gi na lege ti kota nzara ti warango ye ti lo.”