Ésaïe 52:7 - Mbeti ti Nzapa - Tënë so amu fini

⁷ So ayeke nzoni ye mingi ti baa zo so aga na nzoni tënë na li ti ahoto! Lo yeke fa tënë ti siriri, tënë ti nzoni dutingo ti zo nga na tënë ti songo zo na kuâ. Lo yeke tene na Jérusalem: “Nzapa ti mo ayeke le-gbia!”

Ésaïe 52:7 ပူးပေါင်းရင်းမြစ်များ

Abia (Psaumes) 59:13

Gi so ala zi yanga ti tene tënë, ala sara siokpari na lege ti tënë ti ala. Ayeke nzoni baba ti ala aga mbeni kuku ti gbu ala, ngbanga ti so ala yeke deba azo si ala yeke tene gi mvene.

Abia (Psaumes) 68:11

Na ndo so laa azo ti mo asara kodro daa; mo Nzapa so mo yeke nzoni mingi laa, mo leke ni ndali ti azo ti mawa.

Abia (Psaumes) 93:1

*KOTA GBIA ayeke gbia, lo yu gonda tongana bongo, lo kanga ngangu na tere ti lo tongana kamba ti ndö ti bongo. Biani, sese aluti ngangu, ye ayeke yingi ni pepe.

Abia (Psaumes) 96:10

Ala tene na amara nde, atene: “KOTA GBIA laa ayeke gbia! Biani, sese aluti ngangu, ye ayeke yingi ni pepe. Lo yeke fâ ngbanga ti azo na legeni.”

Abia (Psaumes) 97:1

*KOTA GBIA ayeke gbia! Ayeke nzoni azo ti sese adodo na ngia, azo so kue ayeke na yongoro ndo aduti na ngia!

Abia (Psaumes) 98:2

KOTA GBIA afa songo benda ti lo na azo kue, lo fa nga mbirimbiri ti lo na le ti amara nde.

Abia (Psaumes) 98:3

Lo dabe ti lo so lo bata tënë ti yanga ti lo si lo sara nzoni be na azo ti Israel. Na nda ti sese kue, azo abaa songo benda ti Nzapa ti e.

Abia (Psaumes) 99:1

*KOTA GBIA ayeke gbia, tere ti azo ayeke do! Lo duti na ndö ti *asheruben, sese ayeke yingi!

B. ti abia 2:8

So go ti kamba ti be ti mbi laa mbi yeke ma so! Baa, lo laa lo yeke ga so! Lo yeke huru na ndö ti akota hoto, lo yeke huru na ndö ti akete hoto.

Ésaïe 24:23

Le ti nze ayeke be na kamene, kamene ayeke gbu le ti lâ. Biani, KOTA GBIA so ayeke na ndö ti dunia kue, lo yeke duti gbia na Jérusalem nga na ndö ti hoto ti *Sion. Gonda ti lo ayeke za na dawa ti *akangba ti gbata ni.

Ésaïe 33:22

Biani, KOTA GBIA ayeke fâ ngbanga na popo ti e, lo laa lo yeke fa na e ndia. KOTA GBIA ayeke gbia ti e, lo laa lo yeke soo e.

Ésaïe 40:9

Mo gbata ti *Sion, mo so mo yeke ga na nzoni tënë, mo ma na li ti kota hoto. Mo Jérusalem, mo so mo yeke ga na nzoni tënë, mo yo go ti mo na nduzu na ngangu ti mo kue. Mo yo go ti mo na nduzu, sara mbeto pepe. Tene na agbata ti Juda: “Baa, Nzapa ti ala laa!

Ésaïe 41:27

Mbi KOTA GBIA laa mbi yeke kozoni, mbi fa na *Sion, mbi tene: ‘Baa aye ni laa!’ Mbi tokua na Jérusalem mbeni zo ti gango na nzoni tënë.

Ésaïe 42:11

Ala azo ti benyama na ala azo ti agbata ti benyama, ala he bia! Ala azo ti akete kodro ti Kedar, ala he bia! Ala azo so alango na gbata ti Kota têne, ala dekongo na ngia! Na ndö ti hoto, ala dekongo na ngia!

Mishe 4:7

Ala so gere ti ala abuba, mbi yeke sara titene ala ga tanga ti azo so angba na fini; ala so a gue na ala na yongoro ndo, mbi yeke sara titene ala ga mbeni ngangu mara. Na ndö ti hoto ti Sion, fade KOTA GBIA ayeke duti gbia ti ala fadeso kpu na kpu.

Nahum 2:1

Ala azo ti Juda, baa mbeni zo alondo na ndö ti ahoto ayeke ga, lo yeke ga na nzoni tënë: lo yeke tene tënë ti siriri! Ala sara amatanga ti ala, ala sara ye alingbi na zendo so ala mu na Nzapa. Zo ti sioni pialo ti bubango ndo so ayeke kiri ti hon na ya ti kodro ti ala pepe; ti lo ahunzi biani biani awe.

Zakarii 9:9

Dodo na ngia, mo gbata ti *Sion! Dekongo na ngia, mo gbata ti Jérusalem! Baa, gbia ti mo ayeke ga na mbage ti mo; lo yeke mbirimbiri, lo so benda, lo sara tere ti lo tongana senge zo, lo duti na ndö ti lele, lo duti na ndö ti molenge ti lele.

Matthieu 25:34

Tongaso, fade Gbia ni ayeke tene na azo so ayeke na mbage ti maboko ti lo ti koli: ‘Ala ga, ala so Babâ ti mbi asara tufa na ndö ti ala; ala ga awa ti *Kodro-gbia ti yayu so lo leke ni ndali ti ala ando, ngbene ye so dunia abaa gigi.

Matthieu 28:18

Jésus aga nduru na tere ti ala si lo tene na ala: “A mu na mbi ngangu kue na yayu nga na sese.

Marc 13:10

Alingbi a fa Nzoni Tënë na amara kue kozoni si.

Marc 16:15

Na pekoni, lo tene na ala: “Ala gue na ndö ti dunia kue, ala fa Nzoni Tënë na azo kue.

Nzoni Tënë so Luc asu na mbeti 2:10

Me ange ni atene na ala: “Ala sara mbeto pepe, ngbanga ti so mbi ga ti tene mbeni nzoni tënë na ala, tënë ni ayeke zia ngia na be ti azo kue.

Nzoni Tënë so Luc asu na mbeti 24:47

Na iri ti lo, fade azo ayeke fa Nzoni Tënë na amara kue, ti to nda ni na Jérusalem. Ala yeke tene na azo titene ala zia ngbene lege ti sarango ye ti ala, ala kiri na Nzapa si fade Nzapa azi siokpari na li ti ala.

Efeze 6:15

ala yu nzara ti fango Nzoni Tënë ti siriri tongana ti so zo ayeke yu poro ti hon na ndo kue.

Aye so Nzapa afa 11:15

Mbarambara *ange ni ahuru tatalita ti lo. Mbi ma akota go so alondo na yayu, atene: “Fadeso lengo-gbia ayeke ti *Kota Gbia ti e, lo na *Mesii ti lo; fade lo yeke le-gbia kpu na kpu!”

Aye so Nzapa afa 14:6

Na pekoni, mbi baa mbeni *ange nde so ayeke huru yongoro kâ na le ti nduzu. Lo yeke na mbeni Nzoni Tënë so ayeke ngba lakue lakue ti fa na azo ti amara kue, azo ti akete mara kue, azo ti ayanga ti kodro kue nga na azo ti akodro kue. Tënë ni ayeke.