Ésaïe 43:5 - Mbeti ti Nzapa - Tënë so amu fini

⁵ Mo sara mbeto pepe, ngbanga ti so mbi yeke na mo. Kâ na mbage ti To, mbi yeke sara titene *ahale ti mo akiri; kâ na mbage ti Do, mbi yeke bongbi azo ti mo na ndo oko.

Ésaïe 43:5 ပူးပေါင်းရင်းမြစ်များ

Abia (Psaumes) 106:47

KOTA GBIA Nzapa ti e, mo soo e maa! Zi e na popo ti amara nde, mo bongbi e na ndo oko, tongaso fade e yeke sepela iri ti mo so ayeke nde si ayeke nzoni kue. Fade e yeke pika kate ti e, ngbanga ti so e yeke sepela mo.

Abia (Psaumes) 107:3

Ala so lo mu ala na ya ti akodro kue ti To na ti Do, ti Banga na ti Mbongo si lo bongbi ala na ndo oko so, ayeke nzoni ala tene tongaso.

Ésaïe 41:10

Mo sara mbeto pepe, ngbanga ti so mbi yeke na mo. Mo baa ndo na mbeto pepe, ngbanga ti so mbi yeke Nzapa ti mo. Mbi yeke sara titene mo kpengba, mbi yeke ga ti mu maboko na mo; biani, mbi yeke bata mo na lege ti maboko ti mbi ti koli so ayeke so benda.

Ésaïe 41:14

“Jacob, sara mbeto pepe, mo so mo yeke tongana ngusu, Israel, mo so mo yeke tongana makongo. Mbi yeke ga ti mu na mo maboko, so tënë ti yanga ti *KOTA GBIA laa. Mbi laa mbi yeke zi mo, mbi Nzapa ti Israel so mbi yeke nde si mbi yeke nzoni kue.

Ésaïe 41:8

“Ti mo Israel, zo ti kua ti mbi, mo Jacob so mbi soro mo, mo yeke *hale ti Abraham, kamarade ti mbi.

Ésaïe 41:9

Mo so mbi mu mo na nda ti sese kâ si mbi ga na mo, mo so mbi iri mo ngbene ye so mo ngba na nda ti sese yongoro; mbi tene na mo, mbi tene: ‘Mo yeke zo ti kua ti mbi, mbi soro mo, mbi ke mo pepe.’

Ésaïe 43:1

Me fadeso mo Jacob, lo so lo sara mo, mo Israel, lo so lo leke mo, tënë so KOTA GBIA atene ayeke so: “Mo sara mbeto pepe, mbi zi mo awe, mbi iri mo na iri ti mo, mo yeke ti mbi.

Ésaïe 43:2

Tongana mo hon na ya ti kota ngu, fade mbi yeke na mo; tongana mo fâ *abale, abale ni ayeke mene mo pepe. Tongana mo hon na ya ti wâ, wâ ni ayeke gbi mo pepe, menga ti wâ ni ayeke ndu mo pepe.

Ésaïe 44:2

*KOTA GBIA so asara mo, lo so lo leke mo gi so mo de na ya ti mama ti mo, lo so lo yeke mu maboko na mo, tënë so lo tene ayeke so: Jacob, zo ti kua ti mbi, sara mbeto pepe, mo Yeshurun so mbi soro mo.

Ésaïe 49:12

Baa! Ala londo yongoro si ala yeke ga: ambeni alondo na mbage ti Banga, ambeni na mbage ti Do, ambeni na mbage ti Mbongo, na mbage ti Ezipte.”

Ésaïe 49:18

Yo le ti mo na nduzu, mo baa ndo na tere ti mo: amolenge ti mo kue abongbi, ala yeke ga na mbage ti mo. KOTA GBIA atene: Fini ti mbi! Amolenge ni ayeke ga ande tongana ye ti go so zo ayeke zia na go ti lo; ala yeke ga tongana pendere kamba ti ndö ti bongo so wali so aye ti mu koli ayeke kanga na ya ti lo.

Ésaïe 54:3

Biani, mo yeke sara si sese ti mo akono mbage na mbage kue; amolenge ti mo ayeke mu sese ti amara so ayeke nduru na ala ti ga ti ala; agbata so azo ayeke na ya ni pepe, amolenge ti mo ayeke kiri ti duti na ya ni.

Ésaïe 54:7

Gi na ya ti kete ngoi, mbi zia mo lani; me mbi baa mawa ti mo mingi, mbi yeke kiri ti mu mo.

Ésaïe 61:9

Na popo ti amara nde, azo ayeke hinga *ahale ti ala. Na ndo kue, azo ayeke hinga amolenge ti amolenge ti ala. Azo so kue ayeke baa ala, ayeke hinga ala na lege ti ye so: ala yeke amara so KOTA GBIA asara tufa na ndö ti ala.

Ésaïe 8:10

Ala leke apialo ma, fade ayeke li ngu. Ala tene tënë mingi mingi ma, fade a yeke sara ye oko pepe, ngbanga ti so Nzapa ayeke na e.

Jérémie 23:7

“So tënë ti yanga ti KOTA GBIA laa: Biani, mbeni lango ayeke ga so azo ayeke kiri ti tene pepe: ‘Na iri ti KOTA GBIA so ayeke na fini, lo so lo sara si azo ti Israel asigigi na sese ti Ezipte…’

Jérémie 23:8

Me azo ni ayeke tene: ‘Na iri ti KOTA GBIA so ayeke na fini, lo so lo sara si ahale ti Israel asigigi na kodro ti mbage ti Banga nga na akodro so kue lo kangbi ando ala daa. Fade ala yeke kiri ti duti na ndö ti sese ti ala wani!’ ”

Jérémie 29:14

fade mbi yeke zia lege titene ala wara mbi; so tënë ti yanga ti KOTA GBIA laa. Mbi yeke sara titene ala kiri na kozo ndo ti ala; mbi yeke zi ala na ya ti kodro so kue nga na ando so kue mbi kangbi ala ando daa ti bongbi ala na ndo oko; mbi yeke kiri na ala na ndo so a gbu ala ando daa si a gue na ala na kodro wande so’; so tënë ti yanga ti KOTA GBIA laa.

Jérémie 3:18

Na lango ni so, fade azo ti Juda ayeke bongbi oko na ala ti Israel si ala yeke londo na kodro so ayeke na Banga ti kiri na kodro so mbi mu na akotara ti ala titene aga ye ti ala.”

Jérémie 42:11

Fadeso ala kiri asara mbeto ti gbia ti Babilone pepe, lo so mbeto ti lo ahon ndö ti ala so. Ala sara mbeto ti lo pepe! So tënë ti yanga ti KOTA GBIA laa. Biani, mbi yeke na ala ti soo ala, ti zi ala na maboko ti lo.

Jérémie 51:46

“Be ti ala awoko pepe! Asango so ayeke hon na ya ti kodro ni so, ala sara mbeto ni pepe. Na mbeni ngu, azo ayeke tene mbeni tënë nde, na mbeni ngu, ala yeke tene mbeni tënë nde. Azo ni ayeke tene: na ya ti kodro ni, gi sarango ngangu na azo, mbeni sioni gbia ayeke ga ti tumba mba ti lo na ndö ti mbata…

Mishe 2:12

“*KOTA GBIA atene: ala *ahale ti Jacob, fade mbi yeke bongbi ala kue na ndo oko, mbi yeke bongbi nga tanga ti azo ti Israel so angba na fini so. Mbi yeke zia ala na ndo oko tongana ti so a yeke bongbi ataba na ya ti gbagba ti ala, tongana gba ti anyama so ayeke na ndo ti tengo pere ti ala. Fade go ti ala ayeke wu tongana go ti gba ti azo.

Zakarii 8:7

Tënë so KOTA GBIA so ayeke na ndö ti dunia kue atene ayeke so: Azo ti mbi so a gbu ala si a gue na ala na akodro ti mbage ti To nga na ti mbage ti Do, fade mbi yeke zi ala.

Nzoni Tënë so Luc asu na mbeti 13:29

Fade azo ayeke londo na mbage ti To, Do, Banga na Mbongo ti ga na kota matanga so ayeke duti na ya ti Kodro-gbia ti Nzapa.

Jean 10:16

Ambeni taba ti mbi ayeke na ya ti gbagba ti ataba so pepe. Alingbi mbi fa na ala lege; fade ala yeke ma go ti mbi si ala kue aga bongbi oko ti ataba na wabatango-taba oko.

Ndia ti fani use ni 30:3

Tongaso, fade KOTA GBIA ayeke sara titene dutingo ti ala aga nde na ti kozoni, lo yeke baa mawa ti ala si lo yeke zi ala na popo ti amara so kue lo kangbi ala lani daa ti kiri ti bongbi ala na ndo oko.