Ésaïe 42:5 - Mbeti ti Nzapa - Tënë so amu fini

⁵ Nzapa, *KOTA GBIA asara yayu, lo gbara le ti nduzu; lo gbara sese na aye so kue asigigi daa, lo mu fini na azo so ayeke na ndö ti sese, lo mu pupu ti wungo ni na azo ti ndö ti sese ni; tënë so lo tene ayeke so:

Ésaïe 42:5 ပူးပေါင်းရင်းမြစ်များ

Tongo nda ti aye 1:1

Na tongo nda ni, Nzapa asara yayu na sese.

Tongo nda ti aye 2:7

KOTA GBIA Nzapa amu fuku ti sese, lo sara na zo. Na pekoni, lo huru pupu so ayeke sara titene zo aduti na fini na ya ti hon ti zo ni si zo ni aga zo so ayeke na fini.

Mbeti ti Job 12:10

Aye so kue ayeke na fini, fini ti ala ayeke na maboko ti lo; pupu so zo ayeke wu ayeke na maboko ti lo.

Mbeti ti Job 27:3

Tongana mbi ngba ti wu, tongana pupu ti Nzapa angba na du ti hon ti mbi,

Mbeti ti Job 33:4

Yingo ti Nzapa laa asara mbi; Nzapa so ngangu ti lo ahon angangu kue, pupu ti yanga ti lo laa amu fini na mbi.

Mbeti ti Job 34:14

Tongana Nzapa abaa ndo fade gi na lo wani, tongana lo zi fade pupu ti lo na ya ti fini ti azo ndali ti lo wani,

Abia (Psaumes) 136:6

Lo sara si sese aluti na ndö ti angu. – Biani, nzoni be ti lo angba kpu na kpu!

Abia (Psaumes) 33:6

Na lege ti tënë ti lo, KOTA GBIA asara yayu; na lege ti pupu ti yanga ti lo, lo sara aye so kue ayeke na le ti nduzu.

Abia (Psaumes) 96:5

Anzapa kue ti amara nde ayeke gi asenge senge ye, me KOTA GBIA laa asara yayu.

Ésaïe 37:16

“KOTA GBIA, mo so mo yeke na ndö ti dunia kue, Nzapa ti Israel, mo so mo yeke duti na ndö ti *asheruben, gi mo oko mo yeke Nzapa na ndö ti akodro-gbia ti sese kue, ngbanga ti so mo laa mo sara yayu na sese.

Ésaïe 40:12

Zo wa laa ahaka ngu ti kota ngu-ingo na ya ti maboko ti lo, zo wa? Zo wa laa azi ya ti ali ti maboko ti lo si lo sara konde ti konongo ti yayu, zo wa? Zo wa laa azia fuku ti sese na ya ti sembe ti hinga nengo ni, zo wa? Zo wa laa azia ahoto na akete hoto na ndö ti kilo si lo haka ala, zo wa?

Ésaïe 40:22

*KOTA GBIA azia mbata ti lo ti gbia na nduzu kâ, na ndö ti sese, lo yeke baa azo tongana agbadola. Lo gbara le ti nduzu tongana kota bongo, lo zi ya ni titene aga da ti bongo so lo yeke duti daa.

Ésaïe 40:26

Ala yo le ti ala na nduzu, ala baa ndo: Zo wa laa asara atongoro, zo wa? Zo wa laa asara si ala yeke tambula na molongo tongana aturugu so, zo wa? Lo yeke iri ala oko oko kue na iri ti ala. Na lege ti kota ngangu ti lo nga na kota komandema ti lo, tongoro oko so ake ti ga na iringo ndo ti lo ayeke daa pepe.

Ésaïe 40:28

Mo hinga pepe? Mo ma tënë ni pepe? KOTA GBIA ayeke Nzapa so angba lakue lakue; lo laa lo sara sese, alondo na mbeni yanga ni asi na mbeni yanga ni. Ngangu atia ti lo laoko pepe, lo woko laoko pepe. Hingango ye ti lo, zo oko alingbi ti gi nda ni pepe.

Ésaïe 44:24

Israel, *KOTA GBIA so azi mo, lo so lo leke mo gi so mo de na ya ti mama ti mo, tënë so lo tene ayeke so: “Mbi KOTA GBIA laa mbi sara ye kue; mbi oko laa mbi gbara le ti nduzu, mbi oko laa mbi gbara sese; zo wa laa ayeke lani na tere ti mbi, zo wa?

Ésaïe 45:12

Mbi laa mbi sara sese si mbi sara zo na ndö ni. Maboko ti mbi wani laa agbara le ti nduzu si mbi yeke sara komandema na ndö ti aye ti le ti nduzu kue kue kue.

Ésaïe 45:18

*KOTA GBIA asara yayu; lo yeke Nzapa so lo sara sese, lo leke ni, lo sara si akpengba. Lo sara sese ni titene ndö ni angba senge pepe, lo sara ni titene azo alango daa. Tënë so lo tene ayeke so: “Mbi laa mbi yeke KOTA GBIA, mbeni nde ayeke daa pepe.

Ésaïe 48:13

Na maboko ti mbi wani, mbi zia gere ti sese; na maboko ti mbi ti koli, mbi gbara le ti nduzu: gi so mbi iri ala, ala ga aluti.

Ésaïe 57:16

Biani, mbi yeke bi tënë na li ti azo lakue pepe, wala mbi yeke sara ngonzo lakue lakue pepe. Tongaso pepe, azo so kue mbi sara ala, ka ala yeke kui.

Jérémie 10:12

KOTA GBIA asara sese na lege ti ngangu ti lo, lo sara si dunia abaa gigi na lege ti ndara ti lo, lo gbara le ti nduzu na lege ti hingango ye ti lo.

Jérémie 27:5

Mbi laa mbi sara sese, azo na anyama so kue ayeke na ndö ti sese na lege ti kota ngangu ti mbi, na lege ti maboko ti mbi so mbi yoro. Mbi mu ala na zo so be ti mbi aye.

Jérémie 32:17

“Ae Kota Gbia NZAPA, mo laa mo sara yayu na sese na lege ti kota ngangu ti mo, na lege ti maboko ti mo so mo yoro. Mbeni ye so ayeke ngangu na mo ayeke daa pepe.

Jérémie 38:16

Me gbia Sedesias adeba yanga ti lo na hondengo ni na Jérémie, atene: “KOTA GBIA ayeke na fini! Lo so lo mu na e fini, fade mbi yeke fâ mo pepe. Azo so aye gi kuâ ti mo so, mbi yeke zia mo na maboko ti ala pepe.”

Ezekiel 18:4

Biani, fini ti azo kue ayeke ye ti mbi, ataa fini ti ababâ wala ti amolenge. Zo so asara siokpari, lo laa lo yeke kui.

Daniel 5:23

Mo londo ti ke Nzapa so ayeke na yayu: azo ague, amu aye ti da ti lo aga na ni si mo na akota zo ti mo, na awali ti mo so mo ne ala mingi nga na ala so mo ne ala mingi pepe, ala tuku samba na ya ni, ala nyon. Na pekoni, mo gonda anzapa so a sara na wen ti nginza na lôro, ala so a sara na bengba wen, na wen, na keke nga na têne. Anzapa ni ayeke baa ndo pepe, ala yeke ma tënë pepe si ala hinga ye pepe. Me mo ke ti gonda Nzapa so pupu ti ya ti mo ayeke na maboko ti lo si lo yeke bata tambula ti mo.

Amos 9:6

Lo so lo leke ndo ti dutingo ti lo na yayu kâ, lo gbara le ti nduzu na ndö ti sese; lo so lo iri angu ti kota ngu-ingo ti ga si lo tuku ni na ndö ti sese, iri ti lo ayeke *KOTA GBIA.

Zakarii 12:1

Nengo tënë. So ayeke tënë so *KOTA GBIA atene na ndö ti azo ti Israel. So tënë ti yanga ti KOTA GBIA laa, lo so lo gbara le ti nduzu si lo lu gere ti sese, lo so lo zia pupu na ya ti zo, lo tene:

Awatokua 17:24

Nzapa, lo so asara dunia na aye kue ti ndö ni, lo laa lo yeke *Kota Gbia ti yayu na sese. Lo yeke lango pepe na ya ti da so azo laa asara ni.

Awatokua 17:25

Lo yeke ku titene maboko ti azo laa asara ye na lo pepe, ngbanga ti so lo laa lo yeke mu fini na azo, lo laa lo yeke sara titene azo awu pupu, lo laa lo mu aye kue na azo.

Ahebro 1:2

Me na ngoi ti ndani so e yeke daa, lo tene tënë na e na lege ti Molenge ti lo. Nzapa asara dunia mobimba na lege ti Molenge si lo zia Molenge ni titene aye kue aga ti lo.