Ésaïe 41:2 - Mbeti ti Nzapa - Tënë so amu fini

² Mbeni zo alondo na mbage ti To si lo yeke ga; lo so benda na ndo so kue lo yeke hon daa. Zo wa laa azia lo na lege si lo ga so, zo wa? Zo wa laa azia amara nde na maboko ti lo, zo wa? Zo wa laa azia agbia na gbe ti komandema ti lo, zo wa? Yongoro zeme ti lo asara si ala ga tongana fuku ti sese, kokora ti lo asara si ala kangbi kirikiri tongana holengo pere so pupu amu ahon na ni.

Ésaïe 41:2 ပူးပေါင်းရင်းမြစ်များ

Tongo nda ti aye 11:31

Tera amu molenge ti lo Abram, na ata ti lo Lot, molenge ti Haran, na kogara ti lo Sarai, wali ti molenge ti lo Abram si lo na ala alondo na sese ti Babilonii, na gbata ti Ur ti gue na kodro ti Kanaan. Ala gue, asi na gbata ti Haran si ala sara kodro kâ.

Tongo nda ti aye 17:1

Abram ayeke na ngu balegumbaya na gumbaya si KOTA GBIA asi na lo; lo tene na lo: “Mbi yeke Nzapa so ngangu ti mbi ahon angangu kue. Tambula na lege so mbi ye; mo sara aye ti mo kue gi na legeni.

2 Samuel 22:43

Mbi nika ala tongana fuku ti sese; mbi do ala na gbe ti gere ti mbi tongana ti so zo ayeke do potopoto ti ndö ti lege.

2 Agbia 13:7

Na ndani, aturugu so angba na Yoakaz ayeke gi azo ti kpengo na mbarata baleoku, apusu ti mbarata baleoko na aturugu so ayeke tambula na gere saki baleoko. Biani, gbia ti Sirii afâ ambeni turugu ni mingi. Lo sara ala tongana fuku ti sese so zo ayeke do na gbe ti gere.

2 Mbai 36:23

“Tënë so mbi Sirus, gbia ti Perse, mbi tene ayeke so: KOTA GBIA, Nzapa ti yayu azia na gbe ti mbi akodro-gbia kue ti sese. Lo mu yanga na mbi ti leke na lo da na Jérusalem, na sese ti Juda. Azo so kue na popo ti ala ayeke azo ti lo, ayeke nzoni ala gue kâ. Ayeke nzoni KOTA GBIA, Nzapa ti ala aduti na ala!”

Esdras 1:2

“Tënë so mbi Sirus, gbia ti Perse, mbi tene ayeke so: KOTA GBIA, Nzapa ti yayu azia na gbe ti mbi akodro-gbia kue ti sese. Lo mu yanga na mbi ti leke na lo da na Jérusalem, na sese ti Juda.

Ésaïe 40:24

Ataa a iri ala na kua gi fafadeso, ataa ala gbu mbata ti kua ti ala gi fafadeso, ataa gere ti ala ade ti li sese pepe, mo ye ti baa, KOTA GBIA ahuru pupu na ndö ti ala. Tongaso, ala hole si ngangu pupu ahon na ala tongana holengo pere.

Ésaïe 41:25

Na mbage ti Banga kâ, mbi soro mbeni zo, mbi zia lo na lege si lo yeke ga. Na mbage ti To, mbi iri lo na iri ti lo; lo yeke do azo ti komandema na gere tongana ti so zo ayeke do potopoto, tongana ti so wasarango-ta ayeke do ya ti sese ti sarango na ta.

Ésaïe 41:3

Zo ni so ayeke tumba peko ti ala, lo yeke hon, mbeni sioni oko awara lo pepe, gere ti lo andu sese pepe.

Ésaïe 42:6

“Mbi KOTA GBIA laa mbi iri mo na lege ti mbirimbiri. Mbi gbu mo na maboko ti mo, mbi bata mo si mbi zia mo titene na lege ti mo, mbi na azo e ga *ambuki; mbi zia mo titene mo duti lumiere ti amara kue.

Ésaïe 45:1

Tënë so *KOTA GBIA atene na Sirus, gbia so lo soro lo ayeke so: “Mbi gbu mo na maboko ti mo ti koli ti kinda amara nde na gbe ti mo, ti zi na maboko ti agbia komandema ti ala, ti zi ayanga ti gbagba ti agbata so akanga kangango na dawa ti mo.

Ésaïe 45:13

Mbi laa mbi soro koli so na lege ti mbirimbiri. Alege so kue lo yeke hon daa, mbi yeke sara si aga kpangbara. Lo laa lo yeke kiri ti leke Jérusalem, gbata ti mbi. Azo ti mbi so a gbu ala, a gue na ala na kodro wande, lo laa lo yeke zia lege na ala ti kiri. Ala yeke mu na lo mbeni ye oko pepe, wala ala yeke futa nga lo pepe. Tënë so KOTA GBIA so ayeke na ndö ti dunia kue atene laa.”

Ésaïe 46:11

Na mbage ti To, mbi iri mbeni ndeke so ayeke te anyama. Yongoro na nda ti sese kâ, mbi iri mbeni zo, lo laa lo yeke sara si apialo ti mbi asi alingbi na ni. Tënë so mbi tene, ye ni ayeke si! Pialo so mbi leke, mbi yeke sara ni!

Ésaïe 48:15

Mbi, mbi oko laa mbi tene tënë ni. Mbi iri lo, mbi sara si lo ga; aye so lo yeke sara, fade ayeke ga nzoni.”

Abia ti demango tere 1:15

Kota Gbia atumba ala kue awe, angangu turugu so ayeke na tere ti mbi so; Kota Gbia airi gba ti aturugu ti tiri bira, lo iri ala ti ga ti nika aturugu ti mbi, ala so ade maseka so. Ae azo! Kota Gbia ado mbi na sese awe; mbi, maseka-wali ti mara ti Juda. Lo pete mbi tongana ale ti *vinye so ayeke na ya ti du ti sarango na vin.

Ahebro 7:1

Melkisedeke ayeke gbia ti gbata ti Salem, lo yeke nga wayango-sandaga ti Nzapa so ayeke na yayu kâ na ndö ti aye kue. Lani, Abraham ague ti tiri bira na agbia si lo kinda ala. Na kiringo ti lo na kodro, Melkisedeke ague, atengbi na lo na lege si Melkisedeke asara tufa na ndö ti lo.

Aye so Nzapa afa 16:12

Omene ange ni atuku ye ti ya ti kopo ti lo na ya ti bale ti Efrate. Ngu ni ahole ti leke lege na agbia so alondo na To si ayeke ga.

Aye so Nzapa afa 7:2

Mbi baa mbeni ange nde so alondo na mbage ti To si lo yeke gue na nduzu. Lo gbu na maboko ti lo ye ti kpongo na *nzoroko ti Nzapa, lo so lo yeke na fini. Lo dekongo ngangu na a-ange osio so awara ngangu ti buba sese na kota ngu-ingo so, lo tene: