Ésaïe 4:2 - Mbeti ti Nzapa - Tënë so amu fini

² Na lango ni so, fade *KOTA GBIA ayeke sara titene mbeni kete keke asigigi pendere si aga ye ti gonda. Ye so kodro ni ayeke le ayeke ga ye ti nengo ndali ti azo ti Israel so angba na fini nga na ye ti mungo gonda na ala.

Ésaïe 4:2 ပူးပေါင်းရင်းမြစ်များ

Abia (Psaumes) 67:6

Nzapa, ayeke nzoni azo amu singila na mo, ayeke nzoni azo kue legeoko amu singila na mo!

Abia (Psaumes) 72:16

Ayeke nzoni ale ti *ble asi singo na ya ti kodro ni, ayeke nzoni ale ti ble ni asigigi gbani gbani, amu li ti ahoto tongana ti so keke ayeke mingi na li ti hoto ti Liban! Ayeke nzoni gbata ni amai tongana pere so amu ndö ti sese!

Sigingo 28:2

Fade mo yeke mu yanga titene a fu abongo ti awayango-sandaga ndali ita ti mo Aaron. Ayeke nzoni abongo ni alingbi na gonda ti lo nga na nengo ti lo.

Ésaïe 11:4

Me azo so ye atia ala, lo yeke fâ ngbanga ti ala mbirimbiri; awayere so ayeke na ya ti kodro, lo yeke leke tënë ti ala na legeni. Tënë ti yanga ti lo ayeke pika kodro ni tongana keke so ayeke pika ye, pupu ti yanga ti lo ayeke fâ azo ti sioni.

Ésaïe 26:1

Na lango ni so, na kodro ti Juda, azo ayeke he bia so: “Gbata ti e ayeke ngangu gbata. *KOTA GBIA asara gbagba ti ya ni na gbagba ti use ni na tere ni ti bata na e.

Ésaïe 27:6

Na ya ti angoi so ayeke ga, fade mara ti Jacob ayeke ga tongana keke so agunda ni asigigi, Israel ayeke ga tongana keke so kugbe asigigi daa, akongo ni asigigi; ale ti keke ni ayeke mu ndö ti dunia kue.

Ésaïe 30:23

Fade KOTA GBIA ayeke tokua ngu-Nzapa na ndö ti ale ti kobe so mo lu. Kobe so sese ayeke mu na mo ayeke duti gbani gbani si ayeke nzere mingi. Na lango ni so, anyama ti mo ayeke gue ti te pere na ndo so akono.

Ésaïe 45:8

Ayayu, na nduzu kâ, ala sara si mbirimbiri atuku na ndö ti sese tongana ngu ti pere! Ambinda, ala sara si mbirimbiri asua tongana ngu-Nzapa so ayeke sua! Ayeke nzoni ya ti sese asuru si tënë ti songo zo na kuâ amu kongo, sarango ye ti mbirimbiri asigigi tongana fini keke! Mbi KOTA GBIA laa mbi sara ye so.”

Ésaïe 53:2

Na le ti KOTA GBIA, zo ti kua ni akono tongana mbeni kete keke so ayeke sigigi, tongana gunda ti keke so ayeke sigigi na ya ti holengo sese. Lo kpa zo pepe, pendere ti lo so ayeke gboto zo ti baa ndo na mbage ti lo ayeke daa pepe. Mbeni nzoni ye na tere ti lo so anzere na e ayeke daa pepe.

Ésaïe 60:15

Azo ado mo lani azia, azo ake mo, zo oko ahon na ndo ti mo pepe. Me fadeso mbi yeke sara titene mo ga gbata so azo ayeke pika kate ti ala ndali ni kpu na kpu, gbata so azo ti angoi kue ayeke duti na ngia ndali ni.

Ésaïe 60:21

Azo ti mo, ala kue ayeke duti azo ti mbirimbiri, sese ni ayeke ga ye ti ala kpu na kpu. Ala kpa kete keke so mbi lu; ala yeke azo so mbi wani, mbi sara ala na maboko ti mbi titene ala fa gonda ti mbi.

Ésaïe 61:11

Tongana ti so sese asara si kobe asigigi, tongana ti so yaka asara si le ti kobe so a lu asigigi, legeoko nga, fade KOTA GBIA Nzapa ayeke sara titene mbirimbiri na sepelango lo asigigi na dawa ti amara kue.

Jérémie 23:5

“So tënë ti yanga ti KOTA GBIA laa: Baa, mbeni lango ayeke ga so mbi yeke sara titene taa *hale ti David abaa gigi. Lo yeke sigigi tongana kete keke so asigigi na ya ti sese. Lo yeke le-gbia tongana nzoni gbia, lo yeke sara ye na lege ti ndara, lo yeke fâ ngbanga mbirimbiri si lo yeke sara ye ti mbirimbiri na ya ti kodro ni.

Jérémie 33:15

Na lango ni so, gi na ngoi ni so, mbi yeke sara titene taa *hale ti David abaa gigi. Lo yeke sigigi tongana kete keke so asigigi na ya ti sese, lo yeke fâ ngbanga mbirimbiri si lo yeke sara ye ti mbirimbiri na ya ti kodro ni.

Jérémie 44:14

Na popo ti tanga ti azo ti Juda so angba si aga ti honde tere ti ala na Ezipte, fade mbeni oko ayeke kpe pepe, mbeni oko ayeke ngba na fini pepe. Kodro ti Juda so ala yeke sara nzara ti kiri ti duti daa, zo oko ayeke kiri kâ pepe. Biani, ala yeke kiri kâ pepe, me gi ambeni zo oko oko so akpe.’ ”

Jérémie 44:28

Gi ambeni kete laa ayeke wara lege ti kpe bira ni si ala londo na Ezipte ti kiri na Juda. Ndo so laa, azo ti Juda so angba na fini, ala so aga lani ti honde tere ti ala na Ezipte ayeke hinga atene, tënë ti mbi laa aga taa-tënë, wala ti ala.

Ezekiel 34:29

Mbi yeke mu na ala yaka so azo ama sango ni ndali ti nzoni lengo ti lo. Na ya ti kodro ni, fade azo ayeke kiri ti kui nzara pepe; amara nde ayeke kiri ti zia kamene na le ti ala pepe.

Ezekiel 36:8

Ti ala, ahoto ti Israel, fade amaboko ti akeke ti ala ayeke sigigi, akeke ni ayeke le ndali ti azo ti Israel so ayeke azo ti mbi. Biani, ala ga nduru ti kiri na sese ti ala awe.

Ezekiel 7:16

Azo so ayeke ngba na fini ayeke kpe ti gue na li ti ahoto. Tongana ti so *ambipa ti apopo-hoto so ayeke dema, zo oko oko ayeke dema ndali ti sioni ti lo.

Abdias 1:17

Me azo so akpe si angba na fini, fade ala ayeke honde tere ti ala na ndö ti hoto ti *Sion; hoto ni ayeke kiri ti ga ndo so ayeke nde si ayeke nzoni kue. Fade *ahale ti Jacob ayeke kiri ti mu sese ti ala na maboko ti azo so amu ni lani so.

Zakarii 3:8

“Yeshua, kota wayango-sandaga, mo ma mbi! Ala awayango-sandaga, ala so ala na lo ayeke sara kua so, ala ma mbi! Biani, ala awayango-sandaga, ala yeke tongana ye so ayeke fa na azo tënë ti mbeni ye so ayeke si ande. Mbi yeke sara si zo ti kua ti mbi aga, lo so iri ti lo ayeke ‘Kete keke so asigigi’.

Zakarii 6:12

Na pekoni, mo tene na lo, mo tene: Tënë so KOTA GBIA so ayeke na ndö ti dunia kue atene ayeke so: Mbeni koli ayeke ge, iri ti lo ayeke: ‘Kete keke so asigigi’. Na ndo so kue lo yeke daa, akeke ayeke sigigi, fade lo yeke kiri ti leke kota da ti mbi.

Zakarii 9:17

So nzoni dutingo na ala ande! So pendere na ala! Fade ale ti *ble ayeke mu ngangu na amaseka-koli, fini vin ayeke mu ngangu na amaseka-wali.

Malashii 3:17

Na pekoni, tënë so KOTA GBIA so ayeke na ndö ti dunia kue atene laa: “Na lango so mbi yeke fa ngangu ti mbi, azo ni ayeke ga azo ti mbi, ala yeke ga ye ti mbi wani. Fade mbi yeke sara nzoni be na ala tongana ti so babâ ayeke sara nzoni be na molenge ti lo ti koli so ayeke sara kua na lo.

Matthieu 24:22

Tongana Nzapa azi fade ambeni lango ti pasi ni pepe, ka zo oko ti soo kuâ ayeke daa pepe. Me lo zi ambeni lango ni ndali ti azo so lo soro ala.

Nzoni Tënë so Luc asu na mbeti 21:36

Tongaso ala lango pepe! Ala ngba ti sambela lakue si ala wara ngangu ti sigigi na ya ti aye so ayeke si ande so si ala wara lege ti luti na nduzu na dawa ti *Molenge ti Zo.”

Jean 1:14

Tënë ni aga zo si lo duti na popo ti e, nzoni be na taa-tënë ti lo ahon ndoni. E baa gonda ti lo, gonda so Babâ amu na oko Molenge ti lo.

2 Korente 4:6

Nzapa so atene ando, atene: “Ayeke nzoni lumiere aza na ya ti vukongo ndo”, lo wani laa lo za na be ti e titene le ti e azi si e hinga gonda ti lo so ayeke za na ndö ti le ti Christ.

2 Pierre 1:16

Biani, na lege ti ambeni tënë ti ya ti li ti azo wani, atënë so ala sigigi na ni na lege ti kode laa e fa tënë ti ngangu ti *Kota Gbia ti e Jésus Christ na tënë ti gango ti lo pepe. Me e baa kota gonda ti lo kue na le ti e wani.