Ésaïe 30:22 - Mbeti ti Nzapa - Tënë so amu fini

²² Anzapa ti mo so a leke na keke si a zia wen ti nginza na tere ni, ayanda ti mo so a kporo lôro si a zia na tere ni, fade mo yeke baa ni tongana ye so ayeke sioni. Mo yeke tuku ni tongana fungo ye si mo yeke tene: “Ala hon kâ!”

Ésaïe 30:22 ပူးပေါင်းရင်းမြစ်များ

2 Mbai 31:1

So matanga ni ahunzi awe, azo ti Israel so kue ayeke kâ ague na ya ti agbata ti Juda, ala fâ ya ti angbongboro têne so a leke si aluti na nduzu, ala kungbi na sese akeke so a leke si aluti na nduzu ndali ti nzapa-wali *Ashera, ala buba ando so azo aleke na ndö ti ahoto ti voro anzapa nde daa, ala buba nga agbalaka ti ando ni. Ala sara gi oko ye so na sese ti Juda kue, ti Benjamin, ti Efraim na ti Manase. Na pekoni, azo ti Israel kue akiri na ya ti agbata ti ala, zo oko oko na ndo ti lo.

Ésaïe 27:9

Lege so a yeke zi sioni na li ti Jacob laa; ye so ayeke si na peko ti zingo siokpari na li ti lo ni ayeke so: fade a yeke nika atêne kue ti agbalaka tongana ti so a yeke nika mbamba si aga fuku. Akeke so azo aleke aluti na nduzu si ala yeke voro ni, wala ata ti wen so ala zia nde titene ala zö dukani na ya ni ayeke kiri ti ngba na nduzu pepe.

Ésaïe 31:7

Na lango ni so, zo oko oko ayeke bi anzapa ti lo so lo sara na wen ti nginza wala na lôro, anzapa so maboko ti lo ti siokpari asara ni so.

Ésaïe 40:19

Yanda? Wakode-kua laa akporo wen si asara na ni; zo ti sarango ye na kode azia lôro na tere ni, lo zia na go ti lo aye ti go so a sara na wen ti nginza.

Ésaïe 46:6

Ambeni zo ayeke sigigi na lôro ti bozo ti ala kue, ala yeke haka wen ti nginza na kilo, ala yeke futa mbeni wakode-kua ti kporo lôro ti sara na mbeni nzapa. Na pekoni, ala yeke kuku na gbe ti lo ti voro lo.

Abia ti demango tere 1:17

Sion ayoro maboko ti lo na demango tere; me mbeni zo ti de be ti lo ayeke daa pepe. Amara so alango nduru na azo ti Israel so, KOTA GBIA amu yanga titene ala ga awato ti Israel ni; Jérusalem aga mbeni sarate ye na popo ti ala.

Ezekiel 14:6

Ndani laa, alingbi mo tene na azo ti Israel, mo tene: ‘Tënë so Kota Gbia NZAPA atene ayeke so: ala zia ngbene lege ti sarango ye ti ala, ala zia lege ti ayanda ti ala, ala zia peko ti ala na asioni sarango ye ti ala so zo alingbi ti baa na le ti lo fani use pepe so!’

Ezekiel 18:6

Lo yeke te akobe ti anzapa nde na li ti ahoto pepe, lo yeke yo le ti lo na mbage ti ayanda ti azo ti Israel pepe. Lo yeke lango na wali ti mba ti lo pepe; wali so ayeke baa ya ti lo, lo yeke duti na lo koli na wali pepe.

Ezekiel 36:31

Na ndembe ni so, fade ala yeke dabe ti ala na sioni lege ti dutingo ti ala nga na asioni sarango ye ti ala; fade li ti ala ayeke ne na kamene ndali ti asiokpari ti ala nga ndali ti asioni ye so ala sara si zo alingbi ti baa na le ti lo fani use pepe so.

Ezekiel 7:19

Ala yeke tuku nginza ti ala na ndö ti alege, lôro ti ala ayeke ga tongana zende na le ti ala. Na lango ti ngonzo ti KOTA GBIA, nginza na lôro ti ala alingbi ti soo ala pepe. Ala yeke wara kobe ti kai na nzara ti ala pepe, ala yeke kui nzara, ngbanga ti so nginza na lôro laa abi ala na ya ti siokpari.

Ezekiel 7:20

Ala sara baba ndali ti aye ti pendere ti ala. Ala mu aye ni, ala sara na angbongboro nzapa, afungo yanda ti ala so zo alingbi ti baa na le ti lo fani use pepe so. Ndani laa mbi yeke sara si aye ni so aga tongana zende na le ti ala.

Osée 14:8

Azo ti mbi ayeke kiri ti duti na gbe ti de ti lo, ala yeke kiri ti lu ale ti *ble, ala yeke mai tongana keke ti vinye; sango ti ala ayeke mu ndo kue tongana ti pendere vin ti Liban.

Awayango-sandaga 13:52

Tongaso wayango-sandaga ayeke gbi bongo ni, mapia-bongo ni nga na bongo so a sara na kua ti tere ti taba wala na len si a kpo ni kpongo so, wala ye so kue a sara na poro ti nyama. A yeke gbi aye ni, ngbanga ti so asioni gugu so asigigi daa so ayeke gbu tere ti ye biani biani.

Zakarii 13:2

So tënë ti yanga ti *KOTA GBIA so ayeke na ndö ti dunia kue laa: “Na lango ni so, fade mbi yeke zi ayanda so ayeke na ya ti kodro ni, zo ayeke kiri ti di iri ti ala pepe. Mbi yeke tumba nga awayanga-nzapa ti mvene nga na yingo ti sarango sioni ye so ala yeke na ni.

Matthieu 4:10

Jésus atene na lo: “Hon kâ, Satan! Mbeti ti Nzapa atene: ‘Mo voro Kota Gbia, Nzapa ti mo si mo sara kua gi na lo oko!’ ”

Ndia ti fani use ni 7:25

Fade ala, azo ti Israel, ala yeke gbi na wâ ayanda ti azo ti amara ni. Alingbi nzara ti wen ti nginza na lôro so azo ni azia na tere ti ayanda ni asara ala pepe; ala mu aye ni so pepe ti ga ti ala, ngbanga ti so aye ni ayeke sioni mingi na le ti KOTA GBIA Nzapa ti ala. Tongana ala mu ni, fade ayeke ga kuku ti gbungo ala.

Aye so Nzapa afa 19:20

A gbu nyama ni na wayanga-nzapa ti mvene so asara aye ti kpene na dawa ti lo so. Na lege ti aye ti kpene laa lo wara lege ti handa azo so awara nzoroko ti nyama ni si avoro limo so akpa nyama ni so. A mu ala use kue si a bi ala na fini le ti ala na le ti kota wâ ti *sufre.