Ésaïe 27:10 - Mbeti ti Nzapa - Tënë so amu fini

¹⁰ Gbata so a sara ngangu gbagba ti bira na tere ni, zo oko ayeke na ya ni mbeni pepe; azo ado azia si aga tongana benyama. Kâ, akete bagara ayeke ga ti te pere, ala yeke wu tere kâ si ala yeke te akugbe so asigigi.

Ésaïe 27:10 ပူးပေါင်းရင်းမြစ်များ

Ésaïe 17:2

Agbata so ayeke na gbe ti Damas, fade ayeke ngba senge senge biani biani. Agbata ni ayeke ga ndo so ataba na angasa ayeke te pere daa si ala yeke lango daa, zo oko ti zia mbeto na be ti ala ayeke daa pepe.

Ésaïe 17:9

Na lango ni so, agbata so a sara gbagba ti bira na tere ni, fade azo ayeke do ni azia tongana ti so azo ado ando agbako nga na ali ti ahoto azia na gango ti azo ti Israel. Agbata ni ayeke ga ngonda.

Ésaïe 24:10

Gbata so abuba kue so ati awe, lege ti li na ya ti ada ayeke daa mbeni pepe.

Ésaïe 25:2

Mo sara si gbata ni aga gba ti atêne. Gbata so a sara ngangu gbagba na tere ni, mo sara si abuba kue. Yangbo ti awande akpa gbata mbeni pepe, zo ayeke kiri ti leke ni laoko pepe.

Ésaïe 32:19

Fade *pembe ti bekpa ayeke ti na ndö ti gbako, gbata ayeke ti.

Ésaïe 35:1

Ayeke nzoni benyama na kuru sese aduti na ngia! Ayeke nzoni lando so ngu ayeke daa pepe adodo na ngia, lo du apendere kongo!

Ésaïe 49:21

Tongaso, fade mo yeke hunda tere ti mo, mo tene: ‘Amolenge so kue so, zo wa laa adu ala na mbi, zo wa? A gbanzi mbi lani na amolenge, mbi yeke wali ti dungo ni pepe, a gbu mbi lani, a gue na mbi na kodro wande, a zia gi mbi oko. Zo wa laa abata ala so, zo wa? Mbi ngba lani gi mbi oko, amolenge so, ala yeke lani na ndo wa?’ ”

Ésaïe 64:10

Pendere kota da so ayeke nde si ayeke nzoni kue, ndo so akotara ti e ayeke he ando bia daa ti sepela na mo, wâ agbi ni awe. Aye so kue e ye ni mingi abuba kue.

Ésaïe 7:21

Na lango ni so nga, zo oko oko ayeke bata mama ti bagara oko na amama ti ngasa use.

Ésaïe 7:25

Ti yaka so ayeke na li ti ahoto so azo ayeke de lani na kpoka, fade mbeto ayeke sara azo ti gue kâ ndali ti aki na akamba ti ki. Biani, yaka ni ayeke ga ndo so abagara ayeke te pere daa, ndo so ataba ayeke fono daa.

Jérémie 25:37

Ndali ti ngonzo ti wâ ti KOTA GBIA, gbagba ti ataba so ya ni ayeke fade na siriri, fadeso ya ni ade ngii,

Jérémie 26:18

“Na ngoi so Ezekias ayeke gbia ti Juda, Mishe ti gbata ti Moreshet ayeke daa; lo yeke mbeni wayanga-Nzapa. Mishe atene na azo ti Juda kue, lo tene: Tënë so KOTA GBIA so ayeke na ndö ti dunia kue atene ayeke so: ‘Fade *Sion ayeke ga tongana yaka so a de ni awe, Jérusalem ayeke ti kue na sese si hoto so kota da ti Nzapa ayeke daa, ndö ni ayeke ga ngonda.’

Jérémie 26:6

Tongana ala ma pepe, fade mbi yeke buba kota da ti Nzapa so, tongana ti so mbi buba ti Silo. Mbi yeke sara si gbata ti Jérusalem aga tapande ti dengo ba ndali ti amara ti sese kue.’ ”

Jérémie 52:27

Gbia ti Babilone afâ ngbanga ti kuâ na li ti ala si lo fâ ala na Ribla, na sese ti Hamat. Lege so a gbu azo ti Juda a gue na ala na kodro wande, yongoro na sese ti ala laa.

Abia ti demango tere 1:4

Alege ti guengo na *Sion ade dengo; ala kue ayeke na mua; zo ti gue na matanga ti Nzapa ayeke daa pepe. Ayanga ti gbagba ti gbata ni abuba kue; awayango-sandaga ayeke dema gi demango. Amaseka-wali ti gbata ni angba na vundu; be ti azo ti gbata ni afâ si ala duti na ya ti kota mawa.

Abia ti demango tere 5:18

Ndani ayeke so: hoto ti Sion aga ngonda; hoto ni aga ndo ti fonongo ti anyama ti gbungo kondo.

Ezekiel 36:4

Ndani laa, ala ahoto ti Israel, ala ma tënë ti Kota Gbia NZAPA! Tënë so mbi Kota Gbia NZAPA, mbi tene ayeke so: Akota hoto, akete hoto, akete ngu so ayeke sua, apopo-hoto, akodro so abuba awe si aga benyama, agbata so azo ado azia, agbata so azo anzi aye ti ya ni kue si azo ti amara nde so angoro ni ahe ni na ngia,

Mishe 3:12

Ndani laa, ndali ti ala, fade Sion ayeke ga tongana yaka so a de ni awe, Jérusalem ayeke ti kue na sese si hoto so kota da ti Nzapa ayeke daa, ndö ni ayeke ga ngonda.