Ésaïe 24:1 - Mbeti ti Nzapa - Tënë so amu fini

¹ *KOTA GBIA ayeke buba sese kue, lo yeke buba aye ti ndö ni kue. Lo yeke sara titene aye ti ndö ti sese asanze, lo yeke kangbi azo ti ndö ti sese ni kirikiri.

Ésaïe 24:1 ပူးပေါင်းရင်းမြစ်များ

2 Agbia 21:13

Fade mbi yeke buba gbata ti Jérusalem tongana ti so mbi buba ando gbata ti Samarii kue si mbi fâ azo ti sewa ti Akab kue so. Mbi yeke sara titene Jérusalem aga tongana sembe so zo asu ya ni si akuku ni na sese.

Néhémie 1:8

Mbi gbu gere ti mo, ayeke nzoni mo dabe ti mo na tënë ti mo so mo zia na yanga ti Moïse ti tene na e, mo tene: ‘Tongana ala ke ti zia be ti ala na ndö ti mbi, fade mbi yeke kangbi ala na popo ti amara nde.

Abia (Psaumes) 146:9

KOTA GBIA ayeke bata awande, lo yeke mu maboko na nyindu nga na wali-mua, me lo yeke sara si azo ti sioni agirisa lege.

Ésaïe 13:13

Ndani laa, fade yayu ayeke yingi si gere ti sese ayeke do na lege ti ngonzo ti KOTA GBIA so ayeke na ndö ti dunia kue, na lango so ngonzo ti lo ni ayeke londo tongana wâ.

Ésaïe 13:5

Aturugu ni alondo na kodro yongoro si aga, ala londo yongoro kâ na nda ti sese. KOTA GBIA na azo so ayeke fa ngonzo ti lo ayeke ga ti buba kodro ni kue.

Ésaïe 2:19

Na ndembe so KOTA GBIA ayeke londo ti zia mbeto na be ti azo ti sese so, ala yeke li na ya ti adu ti têne nga na ya ti adu ti sese ti kpe ngonzo ti lo, ti kpe gonda ti lo so ayeke kota ahon ndoni.

Ésaïe 24:19

Sese ayeke suru kirikiri, ayeke sungba si ayeke yingi ngangu.

Ésaïe 24:20

Sese ayeke hon mbage na mbage tongana zo so samba ahon ndö ti lo, ayeke yingi tongana mbeni kete da. Siokpari ti azo ane na ndö ti lo si lo ti, lo lingbi ti londo pepe.

Ésaïe 27:10

Gbata so a sara ngangu gbagba ti bira na tere ni, zo oko ayeke na ya ni mbeni pepe; azo ado azia si aga tongana benyama. Kâ, akete bagara ayeke ga ti te pere, ala yeke wu tere kâ si ala yeke te akugbe so asigigi.

Ésaïe 29:16

So buba tënë ti nyen laa ala yeke tene so! Fade a yeke mu wasarango-ta ti lingbi na sese ti sarango na ta ni? Ye so zo asara, fade ye ni atene na zo ti sarango lo, atene: “Lo laa lo sara mbi pepe”? Fade ta ti sese atene na zo ti sarango lo, atene: “Lo hinga ndo pepe”?

Ésaïe 29:2

me mbi KOTA GBIA, mbi yeke nika mo, Ariel. Fade demango tere na dema ayeke hon ndö ti mo si mo yeke ga tongana duke, ndo so a yeke gbi asandaga daa ndali ti mbi.

Ésaïe 30:32

Pika oko oko so KOTA GBIA ayeke pika ala, a yeke pika ngo na kundi na gbe ni. Tongana lo yeke yingi maboko ti lo, lo yeke tiri bira na ala.

Ésaïe 32:12

Ala zia maboko na ndö ti go ti ala ti fa vundu ti be ti ala, ala toto ndali ti apendere yaka ti ala, ndali ti akeke ti vinye so lani ayeke le mingi so,

Ésaïe 33:9

Sese ni ayeke na mua, ayeke hole holengo. Agbako ti Liban ahole kue si kamene ahon ndö ti ala. Lando ti Saron ahole kasakasa. Ahoto ti Bashan na ti Karmel, akeke ayeke daa mbeni pepe.

Ésaïe 34:10

Na bi wala na kota lâ, gudron ni ayeke mingo pepe. Guru ti wâ ayeke londo daa lakue lakue. Ngu na ngu, kodro ni ayeke ngba benyama, zo oko ayeke kiri ti hon na ya ni pepe.

Ésaïe 34:2

Ngonzo ti *KOTA GBIA ayeke tuku na ndö ti amara kue, sioni ngonzo ti lo ayeke tuku na ndö ti aturugu ti ala kue. Lo zia ala titene a fâ ala, ahunzi ala, lo zia ala titene a fâ ala kue.

Ésaïe 42:15

Mbi yeke buba ahoto na akete hoto; mbi yeke sara si apere ni ahole, mbi yeke sara si *abale aga kuru sese; mbi yeke sara si ngu ti *alende ahole.

Ésaïe 5:6

Fade mbi yeke zia yaka ni aga ngonda; zo ti fango *aguruma ni ayeke daa pepe, zo ti sukulango gbe ni ayeke daa pepe; aki na asioni kamba ti aki ayeke suku amu ndö ni kue. Fade mbi yeke mu yanga na ambinda ti gbanzi ngu ti pika na ndö ti yaka ni.”

Jérémie 4:7

Bamara alondo na ya ti gbako ti lo si ayeke sigigi. Zo ti bubango kodro ti amara nde alondo awe, lo yeke ga. Lo londo na ndo ti lo si lo yeke ga ti buba kodro ti mo; fade lo yeke sara si agbata ti mo aga ngonda si zo ayeke daa mbeni pepe.

Jérémie 40:15

Andaa Yohanan aga lani abaa Gedalia na hondengo ni na gbata ti Mispa si atene na lo: “Mbi gbu gere ti mo, zia na mbi lege titene mbi gue, mbi fâ Ismael, molenge ti Netania. Fade zo oko ayeke ma tënë ni pepe. Mo ye titene lo fâ mo ngbanga ti nyen? Tongana lo fâ mo, azo ti Juda so kue abongbi na tere ti mo, fade ala yeke kiri ti kangbi kirikiri si tanga ti azo ti Juda so angba, fade ala yeke kui!”

Jérémie 50:17

Israel ayeke lani tongana taba so agirisa si abamara ayeke tumba peko ti lo. Kozo bamara so ate Israel ayeke gbia ti Asirii. Na pekoni Nabukodonosor, gbia ti Babilone aga, lo kungbi abio ti lo.

Jérémie 51:34

“Nabukodonosor, gbia ti Babilone ate mbi awe, lo pete ya ti mbi kue, lo do mbi, lo zia tongana sembe so ya ni angba senge. Lo mene mbi tongana kota ngbo so amene ye; lo sara si ya ti lo asi na anzerengo ye ti tere ti mbi; na pekoni lo bi tanga ni na ngonda.

Jérémie 9:16

Tënë so KOTA GBIA so ayeke na ndö ti dunia kue atene laa. “Ala gbu li ti ala si! Ala iri awali ti totongo kuâ ti ga! Ala iri awali so kua ti ala ayeke gi totongo kuâ.

Ezekiel 12:20

Agbata so azo ayeke lango daa ayeke ti biani si kodro ni ayeke ga benyama. Tongaso, fade ala yeke hinga atene, mbi laa mbi yeke KOTA GBIA.’ ”

Ezekiel 24:11

Mo zia tawa ni, ya ni senge, na ndö ti ale ti wâ ni titene tawa ni amu wâ si bengba wen ni abe. Tongaso, fade azende so ayeke na ya ni aga ngu si soko ni agbi.’

Ezekiel 35:14

“Tënë so mbi Kota Gbia NZAPA, mbi tene ayeke so: Na ndembe so azo ti kodro kue ayeke duti ande na ngia, mbi yeke sara si mo ga benyama.

Ezekiel 5:14

Jérusalem, mbi yeke sara si mo buba kue, mbi yeke zia kamene na le ti mo na popo ti amara so angoro mo nga na le ti azo so kue ahon na lege.

Ezekiel 5:2

Tongana lango so awato angoro gbata ni ti mu na bira alingbi awe, fade mo yeke mu kozo mbage ni, mo gbi ni na be ti gbata ni. Mo yeke mu use mbage ni, mo fâ ya ni na yongoro zeme, mo ngoro na gbata ni kue. Mo yeke mu ota mbage ni, mo tuku ni na le ti nduzu si pupu amu ahon na ni; ti mbi, fade mbi yeke gboto yongoro zeme ti mbi ti tumba na peko ni.

Ezekiel 6:14

Mbi yeke yoro maboko ti mbi ti pika ala. Kodro so kue ala yeke lango daa, ti londo na benyama na mbage ti Mbongo ngbii asi na gbata ti Ribla na mbage ti Banga, mbi yeke hunzi azo ti ya ti agbata ni kue si agbata ni ayeke ga ngonda. Tongaso si ala hinga atene, mbi yeke KOTA GBIA.”

Ezekiel 6:6

Na ndo so kue ala yeke lango daa, fade agbata ayeke buba, ando so ala leke na nduzu ti voro anzapa ti ala daa, ayeke buba kue. Azo ayeke kungbi na sese agbalaka ti ala si ayeke ga senge ye, ya ti ayanda ti ala ayeke kungbi kete kete si mbeni ye oko ayeke ngba pepe. Azo ayeke fâ ya ti aye ti zongo na ayombo ti ala si ye so maboko ti ala asara, peko ni ayeke ngba pepe.

Ezekiel 7:12

Ngoi ni alingbi awe! Lango ni aga nduru awe! Ayeke nzoni zo ti vongo ye akai ngia ti lo, zo ti kango ye aduti na vundu pepe, ngbanga ti so ngonzo ti mbi ti wâ ayeke londo na tere ti azo ti kodro ni kue.

Ezekiel 7:14

Ataa a huru tatalita, ataa a leke ye kue ndali ti bira, zo oko ti gue na bira ni ayeke daa pepe, ngbanga ti so ngonzo ti mbi ti wâ alondo na tere ti azo ti kodro ni kue awe.”

Nahum 1:5

Akota hoto ayeke yingi na dawa ti lo si akete hoto aga tongana ngu. Na dawa ti lo, sese ayingi si dunia na azo ni kue ado.

Nahum 2:10

Ala azo, ala nzi nginza na lôro ahon na ni! Amosoro asi singo na ya ti gbata ni, apendere ye ayeke daa gbani gbani.

Nzoni Tënë so Luc asu na mbeti 21:24

Fade a yeke fâ azo ni na yongoro zeme, a yeke gbu ala ti gue na ala na ya ti akodro kue. Amara kue ayeke buba gbata ti Jérusalem kue ngbii ngoi ti ala ahunzi si.”

Awatokua 17:6

So ala wara Paul na Silas pepe, ala gbu Yason na ambeni ita, azo ti Christ si ague na ala na gbe ti akota zo ti gbata ni. Ala to nda ti dekongo, atene: “Azo so abi wusuwusu na ya ti dunia kue, fadeso ala si ge awe.

Ndia ti fani use ni 28:64

Fade KOTA GBIA ayeke kangbi ala na popo ti amara kue, ti londo na mbeni nda ti sese ti si na mbeni nda ni. Kâ, ala yeke voro ambeni nzapa so ala wani ahinga ala pepe, akotara ti ala nga ahinga ala pepe; a sara anzapa ni so na keke wala na têne.

Ndia ti fani use ni 32:26

Mbi tene: ‘Mbi leke na be ti mbi ti fâ ala kue ti hunzi ala, mbi ye titene zo akiri adabe ti lo na mara ti ala pepe na ndö ti sese so.

Ndia ti fani use ni 4:27

Fade KOTA GBIA ayeke kangbi ala kirikiri na popo ti amara nde; wungo ti ala ayeke ngba gi kete na ya ti akodro so KOTA GBIA ayeke tumba ala daa.

Jacques 1:1

Mbi Jacques, zo ti kua ti Nzapa na ti *Kota Gbia Jésus Christ; mbi tokua mbeti so na amara baleoko na use ti azuife so akangbi na ya ti akodro nde nde. Mbi bara ala kue.