Ésaïe 22:4 - Mbeti ti Nzapa - Tënë so amu fini

⁴ Ndani laa mbi tene na ala: “Ala zia mbi, mbi toto ngangu mingi. Kota kpale asi na azo ti mbi, ala tara ti de be ti mbi pepe.

Ésaïe 22:4 ပူးပေါင်းရင်းမြစ်များ

Esther 4:1

So Mardochée ama tënë ti ye so kue asi so, lo suru bongo na tere ti lo, lo yu bongo ti mua si lo tuku mburu ti wâ na li ti lo. Lo tambula na ya ti gbata ti Suze kue, na kota mawa na be ti lo, lo yeke dekongo.

Abia (Psaumes) 77:2

Mbi iri Nzapa, mbi toto na lo; mbi iri Nzapa, fade lo yeke ma mbi.

Ésaïe 15:3

Na ndö ti abalabala, azo ayu bongo ti mua. Na li ti ada nga na ndo so gba ti azo ayeke wara tere daa, azo kue ayeke he abia ti demango tere si ala yeke toto.

Ésaïe 33:7

Baa, azo ti Ariel laa ayeke dekongo na ndö ti lege so. Awatokua ti siriri laa ayeke toto ngangu mingi so.

Jérémie 13:17

Tongana ala ma tënë so pepe, mbi yeke toto na hondengo ni ndali ti baba ti ala so ahon ndö ni so. Ngu ti le ti mbi ayeke sua gbani gbani, ngbanga ti so a yeke gue na ataba ti KOTA GBIA na kodro wande.

Jérémie 31:15

Tënë so KOTA GBIA atene ayeke so: “A yeke ma dekongo na toto ti kota vundu na kodro ti Rama. Rachel laa ayeke toto ndali ti amolenge ti lo; lo ke ti ma awango so alingbi ti de be ti lo, ngbanga ti so amolenge ni ayeke daa mbeni pepe.”

Jérémie 4:19

Ae ya ti mbi! Ya ti mbi! Ya ti mbi ayeke so mbi sioni; be ti mbi kue ayeke so mbi! Ya ti mbi ni ayeke kporo kporongo. Lege titene mbi kanga yanga ti mbi ayeke daa pepe, ngbanga ti so mbi ma gi toto ti didi na dekongo ti azo ti bira.

Jérémie 6:26

“Ala azo ti mbi, ayeke nzoni ala yu bongo ti mua, ala rule tere ti ala na ya ti fuku ti sese, ala sara aye so kue zo ayeke sara na ngoi ti mua, ala toto na ngu ti le tongana ti so zo ayeke toto ndali ti oko molenge ti lo ti koli so akui. Biani, gi hio tongaso, wato ayeke ga ti hunzi e kue!”

Jérémie 8:18

Vundu ti be ti mbi ahon ndoni, yoro ni ayeke daa pepe; na ya ti be ti mbi kâ, mbi yeke baa pasi mingi.

Jérémie 9:1

Tongana a mu na mbi fade mbeni ndo ti azo ti lege kâ na benyama titene mbi lango daa, ka mbi yeke zia azo ti kodro ti mbi, mbi hon yongoro na tere ti ala! Ala kue ayeke azo ti gingo akoli wala awali ti azo; ala ayeke bongbi ti azo so ake Nzapa awe.

Jérémie 9:18

Na mbage ti *Sion, a yeke ma go ti mbeni zo so ayeke dema tere: “Ae, azo ahunzi e kue awe! So ye ti kamene na e titene e zia kodro ti e ti hon! So ye ti kamene na e so azo akungbi ada ti e kue na sese awe so!”

Abia ti demango tere 2:11

Mbi toto ngbii, le ti mbi avuko kue; akamba ti ya ti mbi ayeke do dongo. Tongana mbi baa akpale so asi na azo ti kodro ti mbi, mbi woko kue. Mbi baa akete molenge na ala so angba ti nyon me; ala woko kue si ala ti kirikiri na be ti lege ti gbata ni.

Ezekiel 21:11

Ti mo, molenge ti zo, mo ba li ti mo na sese na kota mawa na be ti mo, mo dema! Fade mo yeke dema na le ti azo kue.

Ezekiel 27:31

Ndali ti mo, azo ni ayeke kio kua ti li ti ala si ala yeke yu bongo ti mua. Ala yeke toto na ndö ti mo na vundu na be ti ala; ala yeke dema tere na mawa.

Mishe 1:8

Ndani laa, fade mbi, Mishe, mbi yeke toto si mbi yeke dema tere ti mbi. Mbi yeke tambula gere senge, mbi yeke tambula tere ti mbi senge. Mbi yeke toto tongana *anzagua, mbi yeke he bia ti totongo kuâ tongana ti so *anaamo ayeke toto so.

Matthieu 2:18

“A ma mbeni go na kodro ti Rama, toto na demango tere ahon ndoni: Rachel laa ayeke toto amolenge ti lo; lo ke ti ma awango so alingbi ti de be ti lo, ngbanga ti so amolenge ni ayeke daa mbeni pepe.”

Matthieu 26:75

Pierre adabe ti lo na tënë so Jésus atene lani na lo, atene: “Kozo titene koli-kondo atoto, fade mo yeke bere tënë ti mbi fani ota.” Lo sigigi si lo toto ngangu mingi.

Nzoni Tënë so Luc asu na mbeti 1:2

ala su ni na mbeti ti fa peko ti tënë ti azo so abaa ye ni na le ti ala, ngbene ye na tongo nda ni si ala ga azo ti fango tënë ti Nzapa.

Nzoni Tënë so Luc asu na mbeti 19:41

Jésus asi nduru na Jérusalem, lo baa gbata ni si lo toto ndali ni.