Ésaïe 21:9 - Mbeti ti Nzapa - Tënë so amu fini

⁹ Ala baa, mbeni koli ayeke ga, lo duti na ndö ti pusu ti mbarata so ambarata use laa ayeke gboto ni. Lo kiri lo dekongo, lo tene: ‘Babilone ati awe! Babilone ati awe! Ayanda kue ti anzapa so ayeke na ya ti gbata ni ayeke lango na sese; ya ni afâ kete kete.’ ”

Ésaïe 21:9 ပူးပေါင်းရင်းမြစ်များ

Ésaïe 13:19

Babilone, gbata so apendere ahon ambeni gbata ti kodro ni, azo ti Babilone ayeke pika kate ti ala ndali ni, fade Nzapa ayeke buba ni tongana ti so lo buba ando agbata ti Sodome na Gomore.

Ésaïe 14:4

Fade mo yeke he bia so na iri ti gbia ti Babilone, mo tene: Ye ni tongana nyen! Zo ti sarango ngangu na azo ayeke fadeso na ndo wa? Ngangu so lo yeke sara na azo so ahunzi awe!

Ésaïe 2:18

Fade ayanda kue ayeke daa mbeni pepe.

Ésaïe 21:7

Tongana lo baa pusu ti mbarata so ambarata use laa ayeke gboto ni, wala lo baa mbeni zo na ndö ti lele, wala lo baa mbeni zo na ndö ti *zambala, alingbi sanziri ni asara hange, le ti lo akpengba nganganga!”

Ésaïe 47:5

Mo gbata ti azo ti Babilone, mo duti, mo kai kpoo, mo honde tere ti mo na ya ti vukongo ndo. Biani, fade a yeke kiri ti iri mo pepe: “Gbia-wali so ayeke na ndö ti akodro-gbia”.

Ésaïe 47:9

Baa, fade aye ti mawa use so ayeke si na mo: gi hio tongaso, na ya ti lango oko, amolenge ti mo ayeke kui, mo yeke ga nga wali-mua. Ataa gba ti azo ti mo ti yoro, ataa ngangu ti azo ti mazi ti mo, fade aye so kue ayeke si na mo.

Ésaïe 48:14

Ala kue, ala bongbi tere ti ala, ala ma! Mbi yeke na mbeni zo so mbi ye lo mingi. Lo laa lo yeke sara ande titene ye so mbi ye ti sara na Babilone aga taa-tënë; lo laa lo yeke sara si azo ti Babilone ahinga ngangu ti mbi. Me na popo ti ala, zo wa laa afa tënë so, zo wa?

Jérémie 50:29

Ala iri azo ti pikango kokora kue, ala so ahinga ti pika kokora nzoni ti ga ti tiri bira na Babilone. Ala sara bâbâ ti ala angoro Babilone kue; ala sara si zo oko asigigi akpe pepe! Ala kiri na lo peko ti sioni so lo sara, ala futa lo alingbi na ye so lo sara na amba ti lo! Biani, lani lo sara kuru baba mingi ti ke KOTA GBIA, Nzapa ti Israel so ayeke nde si ayeke nzoni kue.

Jérémie 50:38

Bira aga na tere ti angu ti lo! Ayeke nzoni angu ni ahole kue! Biani, Babilone ayeke kodro ti ayanda; afungo nzapa ti ala asara si li ti azo ti vorongo ala aga kirikiri.

Jérémie 50:42

Ala gbu akokora na alikongo na maboko ti ala, ala yeke sioni mingi si ala yeke baa mawa ti zo pepe. Toto ti ala ayeke tongana toto ti kota ngu-ingo. Ala ko na ndö ti ambarata si ala leke tere ti ala tongana akoli ti tiri bira na mo, maseka-wali Babilone!

Jérémie 50:9

Biani, mbi yeke sara si azo ti amara nde gbani gbani abongbi, mbi yeke tokua ala ti gue ti tiri bira na Babilone. Azo ni ayeke londo na mbage ti Banga ti ga, ala yeke leke tere ti ala ti tiri bira na Babilone si ala yeke mu ni. Ale ti kokora ti azo ni ayeke kiri senge pepe tongana ti so ngangu turugu so ahinga kua ti lo, lo yeke kiri ka na kodro maboko senge pepe.

Jérémie 51:27

Ala azo, ala yo mbeni bendere na nduzu na ya ti kodro ni, ala huru didi na popo ti amara nde! Ala bongbi amara ti ga na tere ti Babilone; ala iri azo ti akodro-gbia ti Arara, ti Mini na ti Ashekenaz ti ga na tere ti lo. Ala mu ambeni turugu ti kota kamba azia ala titene ala mu aturugu na kua, tongaso si ala tiri bira na Babilone. Ala tokua ambarata gbani gbani tongana agbadola ti gue ti tiri bira na lo.

Jérémie 51:44

KOTA GBIA atene: “Mbi yeke ga na tere ti Bel, nzapa ti Babilone. Ye so Bel angba ti mene, mbi yeke zi ni na yanga ti lo. Amara nde ayeke kiri ti gue gbani gbani na mbage ti lo pepe. Gbagba ti Babilone ati awe.

Jérémie 51:47

Ambeni lango ayeke ga so mbi yeke ga na tere ti ayanda ti Babilone. Kodro ni kue ayeke duti na ya ti kamene. Azo so akui kuâ ti bira, ala yeke ngba ti lango na sese na ya ti gbata ni.

Jérémie 51:52

“Ndani laa, ambeni lango ayeke ga so mbi yeke ga na tere ti ayanda ti Babilone; so tënë ti yanga ti KOTA GBIA laa. Na ya ti kodro ni kue, azo so awara akota ka ayeke dema.

Jérémie 51:64

Na pekoni, fade mo yeke tene: ‘Babilone ayeke linda ngu biani biani legeoko tongaso; lo yeke kiri ti sigigi pepe, ngbanga ti aye ti ngangu so KOTA GBIA asara si aga na ndö ti lo.’ ” “Amara awoko kue na kua.” Atënë ti Jérémie ahunzi na ndo so.

Jérémie 51:8

Me gi hio tongaso, Babilone ati, ya ti lo afâ kue. “Ayeke nzoni ala he bia ti totongo kuâ ndali ti lo. Ala zia mafuta na le ti aka ti lo; e hinga pepe, fade tere ti lo ayeke ga nzoni!”

Aye so Nzapa afa 14:8

Mbeni use ange aga na peko ti lo si atene: “Lo ti awe! Kota Babilone ati awe! Lo mu ngangu vin ti lo na amara kue titene ala nyon si ala sara asioni ye ti ndumba tongana lo.”

Aye so Nzapa afa 18:2

Lo dekongo ngangu, lo tene: “Lo ti awe! Babilone, kota gbata ati awe! Lo ga fadeso ndo ti duti ti asioni yingo, ti ayingo ti kirikiri; lo ga ndo ti hondengo tere ti asioni ndeke kue nga na andeke so azo ake ala.

Aye so Nzapa afa 18:21

Tongaso, mbeni ngangu ange amu mbeni ngbongboro têne so akono alingbi na têne ti nikango na ye, lo bi na ya ti kota ngu-ingo si lo tene: “A yeke bi Babilone, kota gbata ni na ngangu tongaso. Fade azo ayeke kiri ti baa ni pepe!