Efeze 5:8 - Mbeti ti Nzapa - Tënë so amu fini

⁸ Ando, ala yeke na ya ti vukongo ndo. Ndali ti so ala ga oko na *Kota Gbia, fadeso ala yeke na ya ti lumiere. Ayeke nzoni sarango ye ti ala ayeke tongana ti azo so ayeke na ya ti lumiere.

Efeze 5:8 ပူးပေါင်းရင်းမြစ်များ

Abia (Psaumes) 74:20

Baa ndo na tënë ti mbuki ti mo si! Na ndo so avuko vukongo na ya ti kodro ni, azo ahonde tere ti ala ti sara ngangu na amba ti ala.

Ésaïe 2:5

*Ahale ti Jacob, ala ga e tambula na ya ti lumiere ti KOTA GBIA!

Ésaïe 42:16

Mbi yeke sara si awaziba atambula na ndö ti lege so ala hinga pepe; mbi yeke sara si ala hon na ndö ti alege so ala hinga pepe. Na dawa ti ala, mbi yeke sara si vukongo ndo aga lumiere, lege so aba bango aluti mbirimbiri. Apialo so, fade mbi yeke sara ni, mbi yeke zia ni oko pepe.

Ésaïe 49:6

Lo tene na mbi: “Titene mo ga gi zo ti kua ti mbi ti yo azo ti mara ti Jacob na nduzu, ti mu tanga ti azo ti Israel so angba na fini ti ga na ala, so alingbi pepe. Mbi yeke sara titene mo ga lumiere ti amara kue, tongaso si mbi yeke soo azo na kuâ ngbii asi na nda ti sese kue.”

Ésaïe 49:9

Mbi tene na azo ti kanga: ‘Ala sigigi!’ Mbi tene na azo so aduti na ya ti vukongo ndo: ‘Ala sigigi, ala ga na ya ti lumiere!’ Ala yeke duti tongana ataba so ayeke te pere na tere ti lege, ala yeke wara kobe ti ala na ndö ti ahoto kue.

Ésaïe 50:10

Mbeni zo ti kpengo mbeto ti *KOTA GBIA ayeke na popo ti ala? Alingbi lo ma yanga ti zo ti kua ti lo. Tongana mbeni zo ayeke tambula na ya ti vukongo ndo si lumiere oko ayeke daa pepe, alingbi lo zia be ti lo na ndö ti KOTA GBIA wani, lo luti na ndö ti Nzapa ti lo.

Ésaïe 9:2

*KOTA GBIA, mo sara si azo awara ngia mingi, mo sara si ngia ti ala asi singo. Ala sara ngia na dawa ti mo tongana ti so azo ayeke sara ngia na ngoi ti fango ale ti kobe; ala sara ngia tongana ti so azo ayeke dekongo na ngia na ngoi so azo ayeke kangbi aye so ala gbu na peko ti bira.

Jérémie 13:16

Ala gonda KOTA GBIA, Nzapa ti ala kozo titene lo tokua vukongo ndo, kozo titene ala pika gere ti ala na li ti ahoto so ndo avuko daa. Ala yeke ku vurungo ndo, me KOTA GBIA asara si vurungo ndo ni aga ndo so avuko pitipiti; lo sara si aga vuko mbinda.

Matthieu 3:8

Ala sara ye so afa atene, ala zia ngbene lege ti sarango ye ti ala awe!

Matthieu 4:16

Azo so aduti na ya ti vukongo ndo abaa kota lumiere! Ndo ahan na ndö ti azo so aduti ando na ya ti vukongo ndo, na kodro ti akuâ.”

Nzoni Tënë so Luc asu na mbeti 1:79

Fade lâ ni ayeke su na ndö ti azo so aduti na ya ti vukongo ndo ti kuâ, ti fa na e lege ti siriri si e tambula daa.”

Nzoni Tënë so Luc asu na mbeti 16:8

Kota zo ni agonda ndombe ti nzi so, ngbanga ti so lo sara ye ti lo na kode. Taa-tënë, azo ti dunia so ayeke sara ye na kode na amba ti ala, ahon azo ti Nzapa so ayeke na ya ti lumiere.”

Jean 1:9

Tënë ni ayeke taa lumiere so aga na ndö ti dunia so; lo za si zo oko oko abaa ndo polele.

Jean 12:35

Jésus atene na ala: “Lumiere ade na popo ti ala ndali ti kete ngoi. Ayeke nzoni ala tambula na ndembe so lumiere ni ayeke na tere ti ala, tongaso si vukongo ndo awara ala pepe, ngbanga ti so zo so atambula na ya ti vukongo ndo ahinga ndo so lo yeke gue daa pepe.

Jean 12:36

Na ngoi so lo so lo yeke lumiere ayeke na tere ti ala, ayeke nzoni ala ma na be na lo si ala ga azo so ayeke duti na ya ti lumiere.” Na peko ti tënë so Jésus ahon, lo honde tere ti lo si ala baa lo pepe.

Jean 12:46

Mbi so mbi yeke lumiere, mbi ga na ndö ti dunia so. Tongaso, zo so ama na be na mbi, lo yeke ngba na ya ti vukongo ndo pepe.

Jean 8:12

Jésus akiri atene na gba ti azo ni, atene: “Mbi yeke lumiere ti dunia so. Zo so amu peko ti mbi, fade lo yeke tambula na ya ti vukongo ndo pepe, me lo yeke wara lumiere so ayeke mu fini na zo.”

Awatokua 17:30

Me ngoi so zo ahinga ye pepe, Nzapa abaa ni senge. Fadeso, lo yeke iri azo kue, na ndo kue titene ala zia ngbene lege ti sarango ye ti ala.

Awatokua 26:18

Mbi tokua mo ti zi le ti ala, ti mu ala na ya ti vukongo ndo ti sigigi na ala na ya ti lumiere; mo yeke zi ala na gbe ti ngangu ti Satan ti gue na ala na Nzapa. Tongana ala ma na be na mbi, fade a yeke zi siokpari na li ti ala si ala yeke wara ndo na popo ti azo ti Nzapa.’ ”

Rome 1:21

Ataa so ala hinga Nzapa, ala gonda lo pepe, ala mu singila na lo pepe so alingbi na Nzapa. Me gbungo-li ti ala aga kirikiri, ala hinga ndo pepe si ala yeke duti na ya ti vukongo ndo.

Rome 13:12

Ndo avuko aninga awe, ndo aga nduru ti han. Tongaso, e zia lege ti sarango aye ti vukongo ndo, e yu aye ti bira ti kota lâ.

Rome 2:19

Mo tene na be ti mo, mo tene, mo yeke zo ti fango lege na awaziba si mo yeke lumiere ndali ti azo so ayeke na ya ti vukongo ndo,

1 Korente 1:30

Me Nzapa asara si ala, a-ita, ala ga oko na Jésus Christ si lo sara titene Christ aga ndara ti e. Na lege ti Christ, Nzapa asara si e ga mbirimbiri na le ti lo, e ga azo so ayeke duti nde ndali ti so lo laa lo zi e na ya ti siokpari.

2 Korente 3:18

E so kue a zi bongo ni na le ti e awe, azo ayeke baa gonda ti Kota Gbia na ndö ti le ti e tongana ti so zo ayeke baa ye na ya ti tatara. Yingo ti Kota Gbia ayeke sara titene e ga nde, e kpa Kota Gbia si gonda ti e ayeke gue guengo lakue na nduzu.

2 Korente 4:6

Nzapa so atene ando, atene: “Ayeke nzoni lumiere aza na ya ti vukongo ndo”, lo wani laa lo za na be ti e titene le ti e azi si e hinga gonda ti lo so ayeke za na ndö ti le ti Christ.

2 Korente 6:14

Azo so ama na be pepe, ala bongbi oko na ala ti sara kua pepe. Ye ti mbirimbiri na ye ti sioni ayeke bongbi oko tongana nyen? Zango ndo na vukongo ndo ayeke duti na ndo oko?

Galasii 5:25

Yingo laa asara si e duti na fini, nilaa ayeke nzoni e mu lege na lo ti fa lege na fini ti e.

Efeze 2:2

Ala yeke sara ye ando tongana ti azo ti dunia so; ala yeke ma gi yanga ti makonzi ti asioni yingo so ayeke na popo ti nduzu na sese, yingo so laa ayeke sara kua na be ti azo so ake ti ma yanga ti Nzapa.

Efeze 4:18

Hingango ndo ti ala ayeke na ya ti vukongo ndo; fini so Nzapa ayeke mu na zo, ala wara ni pepe, ngbanga ti so be ti ala akpengba si ala hinga ndo pepe.

Efeze 5:2

Ala sara ye na lege ti yengo tere tongana ti so Christ aye e si lo mu tere ti lo wani na Nzapa ndali ti e tongana *sandaga so fion ni afun nzoni si anzere na be ti Nzapa.

Efeze 6:12

Biani, e yeke tiri bira ni na azo pepe, me na ayingo so ayeke na komandema, ala so ayeke na ngangu na ndö ti dunia so ayeke na ya ti vukongo ndo, so ti tene asioni yingo so ayeke na le ti nduzu.

Kolose 1:12

Na ngia na be, ala mu singila na Nzapa Babâ so asara si ala lingbi ti wara anzoni ye so lo leke ndali ti azo ti lo na ya ti lumiere.

Kolose 1:13

Nzapa azi e na gbe ti ngangu ti makonzi ti vukongo ndo si lo zia e na ndo so Molenge ti lo so lo ye lo mingi ayeke gbia daa.

Tite 3:3

E nga, e yeke ando azo so li ti e ayeke daa pepe, azo ti ngangu li, azo so agirisa lege. Ando, e mu be ti e kue ti sara aye so anzere na be ti e si nzara ti aye nde nde ahon ndö ti e; e yeke azo ti sioni si e yeke sara kota be na tere ti amba ti e. Azo ayeke ke e; e nga, e yeke ke tere na popo ti e.

1 Jean 1:7

Me tongana e yeke tambula na ya ti lumiere tongana ti so Nzapa wani ayeke na ya ti lumiere, andaa e yeke na beoko na amba ti e si mene ti Jésus, Molenge ti lo, ayeke *sukula asiokpari ti e kue.