Daniel 5:7 - Mbeti ti Nzapa - Tënë so amu fini

⁷ Lo dekongo ngangu si lo mu yanga titene azo airi azo ti nganga ti Babilone, azo ti mazi, azo ti yoro na azo ti bango nda ti aye ti ga. So azo ti bango nda ti aye ni aga awe, gbia atene na ala, atene: “Zo so ayeke diko mbeti so si lo fa na mbi nda ni, fade a yeke yu na lo bongo ti agbia so abe bengo; a yeke zia na go ti lo ye ti go so ayeke na lôro si lo yeke duti oko ti akota zo ota ti ya ti govoroma ti kodro ni.”

Daniel 5:7 ပူးပေါင်းရင်းမြစ်များ

Tongo nda ti aye 41:8

So ndo ahan awe, be ti Faraon agi lo mingi. Tongaso lo tokua titene a iri azo ti nganga kue ti Ezipte nga na azo ti ndara. Lo fa peko ti abango-li ti lo ni na ala, me zo oko ti fango na lo nda ni ayeke daa pepe.

Esther 3:1

Na peko ti aye so, gbia Zerses amu nengo mingi na Haman, molenge ti Hamedata, mbeni *hale ti Agag. Gbia azia Haman na kota ndo si lo ga kozo gbenyogbia.

Sigingo 7:11

Me gbia Faraon airi azo ti hingango nda ti aye nga na anganga; azo ti mazi ti Ezipte so asara gi mara ti ye so na lege ti mazi ti ala.

Amato 1:9

Fade aye ni ayeke duti tongana pendere kpoto na li ti mo wala tongana pendere ye ti go na go ti mo.

B. ti abia 1:10

So pendere ngbangba laa mo yeke na ni na popo ti aye ti mê so! So pendere go laa mo yeke na ni na popo ti aye ti go so!

Ésaïe 47:13

Mo woko awe na bango azo ti gingo nda ti atongoro! Ala yeke baa le ti nduzu si nze na nze ala yeke fa ye so alingbi ti si na mo. Ayeke nzoni ala ga, ala soo mo!

Jérémie 50:35

“Bira aga na tere ti Babilone, na tere ti azo ti Babilone, na akota zo ti kodro ti ala nga na azo ti ala so ayeke na ndara! So tënë ti yanga ti *KOTA GBIA laa.

Ezekiel 16:11

Mbi yu mo na aye ti pendere nde nde, mbi yu na mo aye ti maboko na aye ti go.

Daniel 1:20

Lakue gbia ayeke hunda na ala atënë so ahunda ndara na hingango ye. Nilaa lo baa amaseka-koli osio so ahinga ye fani baleoko ahon azo ti nganga na azo ti yoro so kue ayeke na ya ti kodro ti lo.

Daniel 1:4

Alingbi mbeni ye ti tere ti amaseka-koli ni oko abuba pepe; ala yeke pendere mingi; ala si singo na ndara, ala yeke azo ti hingango mbeti na azo ti hingango ndo. Tongaso, fade ala yeke sara kua na yangbo ti gbia; fade a yeke fa na ala agere ti mbeti nga na yanga ti kodro ti azo ti Babilone.

Daniel 2:2

Tongaso lo mu yanga titene a iri azo ti nganga, azo ti mazi, azo ti yoro na azo nde nde so ayeke baa nda ti aye. Lo iri ala titene ala fa na lo bango-li so lo baa so. So ala si awe, ala gue na dawa ti gbia

Daniel 2:27

Daniel akiri tënë na lo, atene: “Ye ti ndima so gbia ayeke tene tënë ni so, ataa azo ti nganga, ataa azo ti mazi, ataa azo ti yoro, azo ti bango nda ti aye, ala lingbi ti fa ni pepe.

Daniel 2:48

Na pekoni, gbia asara si Daniel aga kota zo mingi. Lo mu na lo gba ti anzoni ye, lo zia lo ti sara komandema na ndö ti kodro ti Babilone kue. Lo zia nga lo makonzi na li ti azo ti nganga so kue ayeke na Babilone.

Daniel 2:6

Me tongana ala fa na mbi bango-li ni si ala fa na mbi nda ni, fade mbi yeke mu na ala gba ti amatabisi, mbi yeke futa ala si mbi yeke sara titene azo agonda ala mingi. Tongaso, ayeke nzoni ala fa na mbi bango-li ni si ala fa nda ni na mbi.”

Daniel 4:14

‘Ngbanga so aga na lege ti mbela ti asanziri; tënë so aga na lege ti ndia ti ala so ayeke nde si ayeke nzoni kue; tongaso si aye so kue ayeke na fini ahinga atene, Nzapa so ayeke na yayu kâ na ndö ti aye kue laa ayeke gbia na ndö ti akodro ti azo. Lo laa lo yeke zia zo so be ti lo aye na li ti kodro; lo lingbi nga ti zia mbumbuse zo na li ti kodro ni.

Daniel 5:11

Na ya ti kodro ti mo so, mbeni koli ayeke daa so yingo ti anzapa so ayeke nde si ayeke nzoni kue asi lo singo. Lani so babâ ti mo angba gbia, azo abaa lo tongana zo so le ti lo ahan mingi, so ahinga ye mingi si ayeke na ndara tongana anzapa. Ndani laa, babâ ti mo Nabukodonosor azia lo makonzi na li ti azo ti nganga, azo ti yoro, azo ti mazi na azo ti bango nda ti aye.

Daniel 5:15

Fafadeso, a ga na mbi azo ti ndara na azo ti mazi titene ala diko mbeti so a su na tere ti da so awe. Mbi ye nga fade titene ala fa na mbi nda ni, me ala ha gbaa.

Daniel 5:16

Me ti mbi, mbi ma a tene, mo lingbi ti fa nda ti aye so akara azo na nda ti aye so ahonde. Fadeso, tongana mo diko mbeti so si mo fa nda ni na mbi, fade a yeke yu na mo bongo ti agbia so abe bengo; a yeke zia na go ti mo ye ti go so a sara na lôro si mo yeke duti oko ti akota zo ota ti ya ti govoroma ti kodro ni.”

Daniel 5:29

Biaku na pekoni, Baltazar amu yanga na azo ti gbe ti lo titene ala yu Daniel na bongo ti gbia so abe bengo; ala zia na go ti lo ye ti go so ayeke na lôro. Lo mu yanga titene ala to mbela ti tene na azo atene, fade a yeke zia Daniel ti duti oko ti akota zo ota ti ya ti govoroma ti kodro ni.

Wungo ti azo 22:17

Fade mbi yeke mu gba ti aye na mo, ye so kue mo yeke hunda na mbi, mbi yeke sara na mo. Mbi gbu gere ti mo, ga, mo deba azo so na mbi!”

Wungo ti azo 22:7

Azo ti tokua ni, akangba ti Moab na ti Madian ague, amu ambeni ye na maboko ti ala ti futa na zo ti bango nda ti aye ni. Ala gue, asi na ndo ti Balaam si ala tene na lo peko ti tokua ti Balak.

Wungo ti azo 24:11

So ye ni aga tongaso so, londo mo kiri na kodro ti mo! Mbi tene lani, mbi tene, fade mbi yeke mu gba ti anzoni ye na mo; me KOTA GBIA agbanzi mo na ni awe!”

1 Samuel 17:25

Zo oko oko ayeke tene: “Ala baa koli so ayeke ga so pepe? Lo yeke ga ti gi yanga ti azo ti Israel laa! Zo so ayeke fâ lo, fade gbia ayeke mu na lo gba ti mosoro. Gbia ayeke mu molenge ti lo ti wali ti ga wali ti lo si gbia ayeke zia sewa ti lo afuta lapo mbeni pepe.”