Daniel 4:32 - Mbeti ti Nzapa - Tënë so amu fini

³² Lo baa azo ti sese kue na le ti lo tongana ye senge, lo yeke sara ye so be ti lo aye na aye so ayeke na yayu nga na azo ti sese. Ye so lo ye ti sara, zo oko alingbi ti kanga lege ni na lo pepe, wala zo oko ti tene na lo: ‘Nyen laa mo yeke sara so?’, zo ni ayeke daa pepe.

Daniel 4:32 ပူးပေါင်းရင်းမြစ်များ

2 Mbai 33:13

Lo voro KOTA GBIA ti baa mawa ti lo. KOTA GBIA azia ngonzo ti lo, lo ma toto ti lo si lo kiri na lo na Jérusalem titene lo kiri lo sara kua ti lo ti gbia. Tongaso Manase ahinga atene, KOTA GBIA laa ayeke taa Nzapa.

Mbeti ti Job 42:2

Mbi hinga so mo lingbi ti sara ye kue; mbeni pialo ti kara mo ayeke daa pepe.

Mbeti ti Job 9:12

Tongana lo gbu ye na ngangu, zo wa laa alingbi ti tene na lo: “Kiri na ni”, zo wa? Zo wa laa alingbi ti tene na lo: “Nyen laa mo sara so”?

Abia (Psaumes) 115:3

Nzapa ti e ayeke na yayu, lo yeke sara ye so kue be ti lo aye.

Abia (Psaumes) 135:6

Ye so kue be ti KOTA GBIA aye, lo yeke sara ni na yayu nga na sese, na ya ti akota ngu-ingo nga na ya ti akota du so ali mingi.

Sigingo 8:10

Azo abongbi kuâ ti ala gbani gbani, na ndö ti tere, na ndö ti tere si ya ti kodro ni kue afun sioni sioni.

Sigingo 9:14

Taa ti so ni, mbi yeke tokua mara ti angangu kpale kue na ndö ti mo wani, na ndö ti azo ti gbe ti mo nga na ndö ti azo ti kodro ti mo, tongaso si mo yeke hinga, mo tene, na ndö ti sese so, mbeni zo oko ti lingbi na mbi ayeke daa pepe.

Sigingo 9:29

Moïse akiri tënë na lo: “Gi so mbi yeke sigigi na ya ti gbata ni, mbi yeke yoro maboko ti mbi na mbage ti KOTA GBIA ti sambela lo. Fade bekpa na pembe ti bekpa ni ayeke kai. Tongaso, mo yeke hinga, mo tene, sese ayeke ti KOTA GBIA.

Ésaïe 37:20

Me mo KOTA GBIA, Nzapa ti e, soo e na maboko ti Senakerib; tongaso si akodro-gbia ti sese kue ahinga atene, gi mo oko KOTA GBIA laa mo yeke Nzapa.”

Ésaïe 40:15

Na le ti lo, amara nde ayeke tongana kete kete ngu so alondo na ya ti tawa si ati! Ala yeke tongana le ti fuku ti sese so a zia na ndö ti kilo. Azo so ayeke na yongoro ndo ayeke tongana kete le ti fuku ti sese so ane pepe.

Ésaïe 40:17

Na le ti KOTA GBIA, azo ti mara kue ayeke ye oko pepe; ala yeke gi senge senge ye, ala yeke tongana pupu senge.

Ésaïe 45:3

Mbi yeke mu na mo amosoro so alu na gbe ti sese nga na amosoro so ahonde. Tongaso si mo hinga, mo tene, mbi laa mbi yeke KOTA GBIA. Sirus, mbi iri mo taa na iri ti mo, mbi so mbi yeke Nzapa ti Israel.

Jérémie 27:5

Mbi laa mbi sara sese, azo na anyama so kue ayeke na ndö ti sese na lege ti kota ngangu ti mbi, na lege ti maboko ti mbi so mbi yoro. Mbi mu ala na zo so be ti mbi aye.

Daniel 2:21

Lo laa lo yeke leke angoi nde nde; lo yeke leke akapa ti aye nde nde; lo yeke tumba agbia na ndö ti mbata si lo yeke zia ala na ndö ti mbata. Lo laa lo yeke mu ndara na azo ti ndara si lo yeke sara titene zo ahinga ndo.

Daniel 4:31

“So ngoi ni so ahon awe, mbi Nabukodonosor, mbi yo le ti mbi na nduzu si ndara ti mbi ti zo akiri daa. Mbi mu singila na Nzapa so ayeke na yayu kâ na ndö ti aye kue, mbi sepela lo si mbi gonda lo so angba lakue lakue: lo yeke gbia lakue lakue, kodro ti lo ayeke ngba kpu na kpu.

Daniel 5:21

Azo atumba lo na popo ti ala, be ti lo ti zo aga tongana ti nyama si lo yeke lango gi na popo ti alele ti ngonda; lo yeke te gi apere tongana bagara si ngu ti pere amu tere ti lo kue. Lo ngba tongaso ngbii asi na lango so lo yeda atene, Nzapa so ayeke na ndö ti aye kue laa ayeke gbia na ndö ti akodro ti azo, lo laa lo yeke zia zo so be ti lo aye na li ti kodro.

Josué 4:24

Lo sara tongaso titene azo ti ndö ti sese kue ahinga atene, maboko ti KOTA GBIA ayeke ngangu; tongaso si ala, azo ti Israel, ala kpe mbeto ti KOTA GBIA, Nzapa ti ala lakue.’ ”