Daniel 4:14 - Mbeti ti Nzapa - Tënë so amu fini

¹⁴ ‘Ngbanga so aga na lege ti mbela ti asanziri; tënë so aga na lege ti ndia ti ala so ayeke nde si ayeke nzoni kue; tongaso si aye so kue ayeke na fini ahinga atene, Nzapa so ayeke na yayu kâ na ndö ti aye kue laa ayeke gbia na ndö ti akodro ti azo. Lo laa lo yeke zia zo so be ti lo aye na li ti kodro; lo lingbi nga ti zia mbumbuse zo na li ti kodro ni.

Daniel 4:14 ပူးပေါင်းရင်းမြစ်များ

Mbeti ti Job 24:20

Be ti amama ti dungo ala ayeke girisa ala, azo ni ayeke ga nzoni kobe ti angusu. Be ti azo ayeke girisa na ala biani biani; sioni sarango ye ti ala ahunzi awe tongana keke so akungbi.

Jérémie 27:5

Mbi laa mbi sara sese, azo na anyama so kue ayeke na ndö ti sese na lege ti kota ngangu ti mbi, na lege ti maboko ti mbi so mbi yoro. Mbi mu ala na zo so be ti mbi aye.

Jérémie 51:6

Ala azo, ala sigigi na ya ti Babilone, ala kpe ahon! Ayeke nzoni zo oko oko asoo fini ti lo; tongaso si ala kui ndali ti sioni ti lo pepe. Biani, ndembe titene KOTA GBIA akiri na kodro ni peko ti sioni ti lo alingbi awe. Lo futa kodro ni alingbi na ye so lo sara.

Jérémie 51:9

– “E ye ti kai kobela na tere ti Babilone, me tere ti lo aga nzoni pepe. Ayeke nzoni e zia lo, zo oko oko akiri na kodro ti lo. Biani, ngbanga so ati na ndö ti lo ayeke ngangu mingi; ague ngbii asi na le ti nduzu, ague ngbii asi na ambinda.

Ezekiel 31:10

“Ndani laa, tënë so mbi Kota Gbia NZAPA, mbi tene ayeke so: Keke ti sedre ni akono awe, lo yo na nduzu ngbii li ti lo asi na ya ti ambinda si baba ahon ndö ti lo ndali ti yongo ti lo ni.

Daniel 2:21

Lo laa lo yeke leke angoi nde nde; lo yeke leke akapa ti aye nde nde; lo yeke tumba agbia na ndö ti mbata si lo yeke zia ala na ndö ti mbata. Lo laa lo yeke mu ndara na azo ti ndara si lo yeke sara titene zo ahinga ndo.

Daniel 3:4

Zo ti batango bongbi ni adekongo ngangu, atene: “Ala azo kue, azo ti amara nde nde kue na ala, azo ti ayanga ti kodro nde nde kue, ala ma tënë so gbia atene. Lo mu yanga, lo tene:

Daniel 4:12

Me kota gere ni na agunda ni, ala zia ni angba na ya ti sese. Fade angba na ya ti zingiri ti wen na ti bengba wen; fade angba na popo ti apere ti ngonda. Fade ngu ti pere ayeke mu tere ni kue si lo na anyama ayeke te pere.

Daniel 4:23

Kota gere ni na agunda ni so angba na ya ti sese aye ti tene: Fade kodro ni ayeke kiri ti ga ti mo gi na ndembe so mo yeke hinga, mo tene, lo so ayeke na yayu si ayeke taa gbia.

Daniel 4:29

Fade azo ayeke tumba mo na popo ti ala. Mo yeke lango na popo ti anyama ti ngonda si mo yeke te gi pere tongana bagara. Mo yeke ngba tongaso na ya ti ngu mbarambara ngbii mo yeke hinga, mo tene, Nzapa so ayeke na yayu kâ na ndö ti aye kue laa ayeke gbia na ndö ti akodro ti azo. Lo laa lo yeke zia zo so be ti lo aye na li ti kodro.’ ”

Daniel 5:20

Me na pekoni, pikango kate ahon ndö ti lo si lo baa tere ti lo kota ahon azo kue. Tongaso Nzapa azi lo na ndö ti mbata ti gbia si azo akiri ane lo pepe.

Daniel 5:21

Azo atumba lo na popo ti ala, be ti lo ti zo aga tongana ti nyama si lo yeke lango gi na popo ti alele ti ngonda; lo yeke te gi apere tongana bagara si ngu ti pere amu tere ti lo kue. Lo ngba tongaso ngbii asi na lango so lo yeda atene, Nzapa so ayeke na ndö ti aye kue laa ayeke gbia na ndö ti akodro ti azo, lo laa lo yeke zia zo so be ti lo aye na li ti kodro.

Matthieu 3:10

Do ayeke na gunda ti akeke ti de ni: keke so kue ale nzoni lengo pepe, fade ayeke de ni ti bi na wâ.

Matthieu 7:19

Keke so kue ale nzoni pepe, fade a yeke de ni si a tuku ni na le ti wâ.

Nzoni Tënë so Luc asu na mbeti 3:9

Fadeso, do ayeke na gunda ti akeke ti de ni: keke so kue ale nzoni lengo pepe, fade a yeke de ni ti bi na le ti wâ.”

Aye so Nzapa afa 10:3

Lo dekongo ngangu tongana bamara so ayeke toto. Na peko ti dekongo ti lo, abekpa mbarambara asungba.

Aye so Nzapa afa 18:2

Lo dekongo ngangu, lo tene: “Lo ti awe! Babilone, kota gbata ati awe! Lo ga fadeso ndo ti duti ti asioni yingo, ti ayingo ti kirikiri; lo ga ndo ti hondengo tere ti asioni ndeke kue nga na andeke so azo ake ala.