Awatokua 7:38 - Mbeti ti Nzapa - Tënë so amu fini

³⁸ Na ndembe so azo ti Israel abongbi tere na benyama, Moïse laa ayeke ando zo ti tokua na popo ti ange so atene tënë na lo na ndö ti hoto ti Sinai nga na akotara ti e; lo laa lo wara atënë so ayeke mu fini na zo titene lo fa ni na e.

Awatokua 7:38 ပူးပေါင်းရင်းမြစ်များ

Ésaïe 63:9

Na ya ti aye ti ngangu ti ala kue, lo soro mbeni zo wala mbeni watokua ti soo ala pepe, me lo wani laa lo soo ala. Na lege ti ndoye ti lo nga na lege nzoni be ti lo, lo zi ala; lo gbu ala si lo yo ala na ya ti angoi so kue ahon.

Jean 1:17

Nzapa amu ando *Ndia na e na lege ti Moïse, me nzoni be na taa-tënë aga na lege ti Jésus Christ.

Jean 6:63

Yingo ti Nzapa laa ayeke mu fini na zo; zo alingbi ti wara fini na ngangu ti lo wani pepe. Atënë so mbi tene na ala ayeke tënë ti Yingo na tënë ti fini.

Awatokua 7:30

“Ngu baleosio na pekoni, na ya ti benyama, nduru na hoto ti Sinai, mbeni *ange asi na Moïse na ya ti mbeni wâ so ayeke za na ya ti kete keke ti ki.

Awatokua 7:35

“Moïse so azo ti Israel ake lo si ala hunda ando lo, atene: ‘Zo wa laa azia mo makonzi ti fâ ngbanga na popo ti e?’, lo laa Nzapa atokua lo tongana makonzi na ndö ti azo ni ti zi ala na gbe ti ngbaa, na lege ti *ange so asi na lo na ya ti wâ so ayeke za na ya ti kete keke.

Awatokua 7:53

Ataa so ala wara ando *Ndia ti Nzapa na lege ti *a-ange, ala sara ye alingbi na Ndia ni pepe!”

Rome 3:2

Biani, ye ti nzoni ni ayeke kota na ya ti aye mingi. Kozo ye ni ayeke so Nzapa azia atënë ti lo na maboko ti azuife.

Rome 9:4

A-ita ti mbi ni ayeke azo ti Israel: Nzapa asara si ala ga amolenge ti lo, lo fa gonda ti lo na ala, lo leke *mbuki ndali ti ala, lo fa *Ndia ti lo na ala, lo fa lege ti vorongo lo na ala, lo mu azendo na ala,

Galasii 3:19

Tongaso, kua ti Ndia ayeke nyen? Nzapa azia Ndia na tere ti mbuki ni titene e hinga ye so ake Ndia. Nzapa amu Ndia ti ku na gango ti hale ti Abraham, lo so Nzapa amu zendo ti mungo ye ni na lo. *A-ange laa amu Ndia ni aga na ni na azo si mbeni zo ayeke walekengo-songo.

Ndia ti fani use ni 33:4

Ndia so Moïse amu na e aga ye so ayeke ti bongbi ti azo ti Jacob.

Ahebro 2:2

Tënë so Nzapa afa ando na lege ti *a-ange, aga taa-tënë. Azo so kue ake tënë ni, wala ala so aye ti ma ni pepe, Nzapa afâ ngbanga na li ti ala alingbi mbirimbiri na ye so ala sara.

Ahebro 4:12

Tënë ti Nzapa ayeke na fini si ayeke na ngangu ti sara ye. Tënë ni ayeke kpo be ti zo ahon yongoro zeme so yanga ni aza mbage na mbage. Tënë ni ayeke gue ngbii akangbi popo ti be ti zo na yingo ti zo. Tënë ni ayeke kangbi popo ti mafuta ti ya ti bio nga na ndo so abio atengbi tere daa. Tënë ni ayeke sigigi na tënë ti be ti zo nga na aye so kue nzara ni ayeke na be ti zo.

Ahebro 5:12

Ngoi ahon mingi so ala lingbi fade ti ga awafango-ye! Me ala kiri aga azo titene a kiri a fa na ala akozo tënë ti Nzapa. So aye ti fa atene, ala de ti kpengba titene a mu na ala kpengbango kobe pepe, ala ngba ti nyon me.

1 Pierre 4:11

Tongana mbeni zo ayeke fa tënë, alingbi lo fa gi tënë ti Nzapa. Tongana mbeni zo ayeke sara kua ndali ti amba ti lo, alingbi lo sara ni na ngangu so Nzapa amu na lo, tongaso si na ya ti aye kue, azo agonda Nzapa na lege ti Jésus Christ. Gonda na ngangu ayeke ti Nzapa, kpu na kpu! Amen.