Awatokua 2:39 - Mbeti ti Nzapa - Tënë so amu fini

³⁹ Biani, Nzapa amu zendo ni ndali ti ala, ndali ti amolenge ti ala nga ndali ti gba ti azo so kue ayeke na yongoro ndo, ala so kue fade Nzapa, Kota Gbia ti e ayeke iri ala.”

Awatokua 2:39 ပူးပေါင်းရင်းမြစ်များ

Ésaïe 44:3

Biani, fade mbi yeke tuku ngu na ndö ti sese so ayeke na nzara ti ngu, mbi yeke sara titene akete ngu asua na ndö ti holengo sese. Mbi yeke tokua yingo ti mbi na ndö ti amolenge ti mo si mbi yeke sara tufa na ndö ti *ahale ti mo.

Ésaïe 54:13

Fade amolenge ti mo kue ayeke ga adisiple ti mbi, ala yeke duti na siriri ahon ndoni.

Ésaïe 57:19

fade mbi yeke zia bia ti sepela na yanga ti ala.” KOTA GBIA atene: “Siriri na zo so ayeke na yongoro ndo, siriri na zo so ayeke nduru! Biani, mbi yeke kai kobela ti azo ti mbi.”

Ésaïe 59:19

Tongaso, ti londo na To ngbii asi na Do, fade azo ayeke kpe mbeto ti iri ti KOTA GBIA, azo kue ayeke kpe mbeto ti gonda ti lo. Biani, fade lo yeke ga tongana *bale so asua ngangu si pupu ti KOTA GBIA ayeke pusu ni.

Ésaïe 59:20

KOTA GBIA ayeke ga ti zi Jérusalem nga na azo ti Israel so azia lege ti ngangu li ti ala. So tënë ti yanga ti KOTA GBIA laa.

Ésaïe 65:23

Ala yeke kiri ti baa pasi senge senge pepe, ala yeke kiri ti du amolenge pepe titene amolenge ni akui kuingo. Biani, ala yeke asewa so KOTA GBIA asara tufa na ndö ti ala, ala na amolenge ti ala.

Ezekiel 37:25

Ala yeke duti na sese so mbi mu na zo ti kua ti mbi Jacob, sese so akotara ti ala aduti ando daa. Ala yeke duti daa kpu na kpu, ala na amolenge ti ala, na amolenge ti amolenge ti ala. Fade David, zo ti kua ti mbi ayeke duti makonzi ti ala lakue lakue.

Awatokua 10:45

Azuife so ama na be si ala na Pierre aga so, li ti ala kue akpe, ngbanga ti so ala baa so Nzapa amu nga Yingo-Vuru ti lo na azo ti amara nde!

Awatokua 14:27

So ala si na Antioshe, ala bongbi azo ti Eglize ni si ala fa na ala peko ti aye so kue Nzapa asara na lege ti ala. Ala fa nga na azo ni lege so Nzapa azi lege na azo ti amara nde ti ma na be.

Awatokua 15:14

Simon afa na e fafadeso lege so Nzapa aleke na be ti lo kozoni ti soro ambeni zo na popo ti amara nde ti ga azo ti lo.

Awatokua 15:3

Azo ti Eglize ni amu aye na ala ndali ti lege. So ala yeke hon na ya ti sese ti Fenisii na ti Samarii, ala yeke fa na azo lege so azo ti amara nde akiri na mbage ti Nzapa. Tënë ni amu ngia na be ti a-ita, azo ti Christ kue.

Awatokua 15:8

Nzapa so ahinga be ti zo afa atene, lo ye azo ti amara nde; lo fa ni na lege so lo mu Yingo-Vuru na ala gi tongana ti so lo mu ni na e.

Rome 11:29

Biani, tongana Nzapa amu ye na zo awe, lo yeke kiri ti zi ni na maboko ti lo pepe; tongana Nzapa airi mbeni zo awe, lo yeke kiri ti ke lo pepe.

Rome 8:30

Azo so Nzapa aleke ye so kozoni na be ti lo ndali ti ala, lo iri nga ala, ala so lo iri ala, lo sara si ala ga nga mbirimbiri, ala so lo sara si ala ga mbirimbiri, lo gonda nga ala.

Rome 9:24

Azo ni ayeke e so lo iri e; ambeni, lo iri ala na popo ti azuife, gi ala oko pepe, me lo iri nga ambeni na popo ti azo ti amara nde.

Rome 9:4

A-ita ti mbi ni ayeke azo ti Israel: Nzapa asara si ala ga amolenge ti lo, lo fa gonda ti lo na ala, lo leke *mbuki ndali ti ala, lo fa *Ndia ti lo na ala, lo fa lege ti vorongo lo na ala, lo mu azendo na ala,

1 Korente 7:14

Biani, koli so ama na be pepe aga nduru na Nzapa na lege ti wali ti lo si wali so ama na be pepe aga nduru na Nzapa na lege ti koli ti lo. Tongana ye ni ayeke tongaso pepe, ka amolenge ti ala ayeke yongoro na Nzapa; andaa amolenge ni ayeke nduru na lo.

Efeze 1:18

Mbi hunda nga titene lumiere ti Nzapa aza na ya ti hingango ndo ti ala, tongaso si ala lingbi ti hinga ye so lo iri ala ngbanga ni si lo yeke leke ti ku na ala so. Tongaso, fade ala hinga atene, aye so lo bata ndali ti azo ti lo ayeke anzoni ye ahon ndoni,

Efeze 2:12

ando, ala yeke yongoro na Christ, mbeni ye ti ala oko so ala lingbi ti wara na popo ti azo ti Israel ayeke daa pepe. Nzapa asara si azo so lo mu zendo na ala, lo sara *ambuki na ala; me ala azo ti amara nde, ala yeke na ya ti ambuki so pepe. Mbeni ye so ala lingbi ti zia be ti ala daa ti ku na dunia so ayeke daa pepe; ala hinga Nzapa pepe.

Efeze 4:4

E kue, e yeke gi tere oko si Yingo ayeke nga gi oko; legeoko nga, gi ye oko laa Nzapa airi ala titene ala zia be ti ala ti ku ni.

Ndia ti fani use ni 29:15

Ala, azo ti Israel, ala hinga lege so e duti na ni na sese ti Ezipte; nga na lege so e hon na popo ti amara nde so e fâ ya ti sese ti ala ti hon.

2 Tesalonike 1:11

Ndani laa e yeke sambela lakue ndali ti ala titene Nzapa ti e asara si ala lingbi na iringo so lo iri ala. E hunda titene na lege ti ngangu ti lo, ala sara aye ti nzoni so kue ala yeke na nzara ti sarango ni si kua so ala yeke sara na lege ti mabe asi na ndani.

2 Timothée 1:9

Nzapa asoo e na kuâ, lo iri e ti ga azo so lo zia e nde ndali ti lo si e yeke nzoni kue. Mbeni ye ti nzoni so e sara titene lo soo e si lo iri e ndali ni ayeke daa pepe, me lo sara ni ndali ti so lo leke na be ti lo wani awe na lege ti nzoni be ti lo. Kozoni titene aye kue abaa gigi, Nzapa aleke na be ti lo ti sara nzoni be na e na lege ti Jésus Christ.

Ahebro 3:1

Tongaso, a-ita azo ti Nzapa, ala so lo iri ala ti ga azo ti lo, ayeke nzoni ala baa ndo na Jésus, lo so Nzapa atokua lo titene lo ga kota wayango-sandaga ti mabe so e yeke fa tënë ni.

Ahebro 9:15

Ndani laa, Christ ayeke zo ti lekengo songo na popo ti azo na Nzapa na lege ti mbeni fini mbuki. Azo so Nzapa airi ala alingbi ti wara anzoni ye so ayeke ngba ande lakue lakue, aye so Nzapa amu zendo ni. Azo ni so alingbi ti wara aye ni, ngbanga ti so Christ akui awe si na lege ti kuâ ti lo, azo so asara siokpari na ndembe so ala ngba na gbe ti kozo mbuki, lo lingbi ti zi ala na ya ti siokpari.

1 Pierre 5:10

Pasi so ala yeke baa so ayeke ndali ti kete ngoi. Me Nzapa so ayeke sara nzoni be mingi na azo, lo iri ala titene ala li na ya ti gonda ti lo so ayeke ngba lakue lakue, ngbanga ti so ala ga oko na Christ awe. Tongaso, lo yeke sara titene ala ga nzoni kue, ala kpengba, ala wara ngangu si mbeni ye ayingi ala pepe.

2 Pierre 1:10

Ndani laa, a-ita, ayeke nzoni ala kiri asara ngangu ahon ti kozoni ti ngba na lege ti iringo so Nzapa airi ala, nga na lege ti sorongo so lo soro ala. Tongana ala sara tongaso, mbeni ye ti sara si ala ti ande ayeke daa oko pepe.

2 Pierre 1:3

Na lege ti ngangu ti lo, Christ amu na e aye so kue alingbi na e titene e duti na fini si e ngba ti gbu tënë ti Nzapa ngangu. Christ afa na e ti hinga Nzapa so airi e ti wara mbage ti gonda ti lo na ti nzoni ye so lo sara.

Aye so Nzapa afa 17:14

Fade ala yeke tiri na Molenge ti Taba, me Molenge ti Taba ayeke hon ndö ti ala, ngbanga ti so lo yeke Kota Gbia ti akota gbia si lo yeke Gbia ti agbia. Lo na azo so lo iri ala, lo soro ala si ala yeke azo ti lo, ala yeke hon ndö ti agbia baleoko so.”

Aye so Nzapa afa 19:9

*Ange ni atene na mbi: “Su tënë so na mbeti: ‘Ti ala nzoni, azo so a tisa ala ti gue na matanga ti mungo wali ti Molenge ti Taba!’ ” Ange ni akiri atene: “So taa atënë so alondo na Nzapa.”