Awatokua 14:26 - Mbeti ti Nzapa - Tënë so amu fini

²⁶ Ala londo na ndo so, ala mu mangboko ti kiri na Antioshe, na sese ti Sirii. Na ya ti gbata so laa a zia ala lani na maboko ti Nzapa ti nzoni be titene ala sara kua so ala hunzi ni awe so.

Awatokua 14:26 ပူးပေါင်းရင်းမြစ်များ

Awatokua 11:19

Na peko ti kuâ ti Étienne, a yeke sara ngangu na azo ti Jésus si ala kangbi kirikiri. Ambeni ague na Fenisii, ambeni na Shipre, ambeni na Antioshe; me ala yeke fa tënë gi na azuife.

Awatokua 11:20

Ti ambeni so ayeke azo ti Shipre na ti Sirene, ala gue na Antioshe si ala fa nga na agreke Nzoni Tënë ti *Kota Gbia Jésus.

Awatokua 11:23

So lo si, lo baa lege so Nzapa asara nzoni be na azo ni. Be ti lo asi na ngia si lo mu wango na ala titene ala kue angba ti mu peko ti Kota Gbia lakue.

Awatokua 11:26

So lo wara lo, lo ga na lo na Antioshe. Na ya ti ngu oko kue, ala use asara kua oko na ya ti Eglize ni si ala fa ye na gba ti azo. Kâ na Antioshe laa azo ato nda ti iri adisiple “azo ti Christ”.

Awatokua 11:27

Gi na ngoi ni so, ambeni wayanga-Nzapa alondo na Jérusalem aga na Antioshe.

Awatokua 14:19

Ambeni zuife alondo na Antioshe, na sese ti Pisidii, ambeni alondo na Ikoniom si aga; ala sara si gba ti azo ni aye peko ti tënë ti ala. Tongaso ala bo Paul na têne, ala gboto lo asigigi na lo na ya ti gbata ni, ala baa ti ala atene, lo kui awe.

Awatokua 14:21

Paul na Barnabas afa Nzoni Tënë na gbata ti Derbe si azo mingi aga adisiple. Na pekoni, ala kiri na Listre, Ikoniom nga na Antioshe, na sese ti Pisidii.

Awatokua 14:23

Paul na Barnabas asoro *akangba si azia ala na li ti *a-Eglize ni oko oko kue. Na peko ti so ala ke kobe si ala sambela, ala zia akangba ni na maboko ti *Kota Gbia, lo so ala ma na be na lo.

Awatokua 15:22

Tongaso *awatokua na *akangba, ala na azo ti *Eglize ni kue ama tere ti soro ambeni zo na popo ti ala ti tokua ala na Antioshe, ala na Paul na Barnabas. Ala soro Judas so mbeni iri ti lo Barsabas, lo na Silas. A-ita, azo ti Christ, ane azo use so mingi.

Awatokua 15:30

Azo ti tokua ni azia azo ni si ala gue na Antioshe. Kâ, ala bongbi azo ti Christ kue si amu mbeti ni na ala.

Awatokua 15:40

Paul asoro ti lo Silas. Na peko ti so a-ita, azo ti Christ, asambela Kota Gbia ti sara nzoni be na lo, ala hon.

Awatokua 20:32

“Fadeso, mbi zia ala na maboko ti Nzapa, mbi zia nga ala titene tënë ti nzoni be ti lo abata ala. Nzapa ayeke na ngangu ti kpengba ala, ti mu na ala anzoni ye so kue lo bata ni ndali ti azo ti lo.

Rome 15:19

na lege ti aye ti kpene nga na lege ti aye ti dongo be so Yingo-Vuru asara. Tongaso, ti londo na Jérusalem ngbii asi na sese ti Ilirii, mbi tambula ti fa Nzoni Tënë kue ti Christ na azo.

2 Korente 1:12

Ye so e yeke gonda tere ti e daa ayeke so: be ti e afa na e atene, dutingo ti e na dunia so, e duti na vuru be nga na be so sioni oko ayeke daa pepe. E duti tongaso mbirimbiri na mbage ti ala na lege ti ndara ti azo pepe, me na lege ti nzoni be ti Nzapa.

Galasii 2:11

Me na ndembe so Pierre asi na Antioshe, mbi ke tënë na le ti lo polele, ndali ti so lo sara ye na legeni pepe.

Kolose 1:25

Mbi ga zo ti kua ti Eglize alingbi na kua so Nzapa amu na mbi ti sara ndali ti ala: kua ni ayeke kua ti fango tënë ti Nzapa kue kue kue.

Kolose 1:28

Tënë ti lo laa e yeke fa na azo. E yeke mu wango na azo kue si e yeke fa na ala ye na lege ti ndara kue, tongaso si zo oko oko na lege ti gango so lo ga oko na Christ aga kangba na lege ti Yingo.

Kolose 4:17

Ti hunzi na tënë ti mbi, ala tene na Arshipe: “Sara hange na kua so Kota Gbia amu na mo! Mo sara ni nzoni.”

2 Timothée 4:2

mo fa tënë ti Nzapa na azo, wala ndembe ni laa wala ndembe ni laa pepe, mo ngba gi daa. Mo fa sioni ti azo na le ti ala, mo suku na ala, mo mu wango na ala; be ti mo awoko na lege ni pepe, mo ngba na nzara ti fango ye na ala.