Amos 9:9 - Mbeti ti Nzapa - Tënë so amu fini

⁹ Ti fadeso, mbi yeke mu yanga titene a yengere azo ti Israel na popo ti azo ti amara nde tongana ti so a yeke yengere ale ti kobe si gi ale ti têne laa angba na ya ti yengere ni.

Amos 9:9 ပူးပေါင်းရင်းမြစ်များ

Ésaïe 27:12

Na lango ni so, *KOTA GBIA ayeke pika ale ti kobe titene ale ni asigigi, ti londo na *bale ti Efrate ngbii asi na ngu ti Ezipte. Ti ala azo ti Israel, lo yeke ro ala oko na oko tongana ti so a yeke ro ale ti kobe.

Ésaïe 28:28

Titene zo asara mapa, lo yeke nika ale ti ble, me lo yeke ngba gi ngbango ti pika ni pepe. Tongana lo mu gere ti pusu na ambarata ti hon na ni na ndö ti ale ti kobe, ayeke nika ale ti kobe ni pepe.

Ésaïe 30:28

Pupu ti yanga ti lo ayeke tongana ngu so ayeke sua, asuku ngbii asi na go ti zo. Pupu ni ayeke ga ti yengere amara nde na mbeni yengere ti fango zo. Lo yeke zia na yanga ti azo ni mbeni kamba ti gue na ala kirikiri.

Jérémie 31:36

So tënë ti yanga ti KOTA GBIA laa: “Mbeni lâ, tongana mbi lingbi ti yeda titene ngangu ti andia ti dunia so amingo, andaa mbi lingbi nga ti yeda titene azo ti Israel kue akiri abongbi mbeni pepe ti ga mara oko!

Jérémie 46:28

Mo Israel, zo ti kua ti mbi, sara mbeto pepe! So tënë ti yanga ti KOTA GBIA laa. Biani, mbi yeke na mo. Amara so kue mbi kangbi mo lani na popo ti ala, mbi yeke fâ ala kue ti hunzi ala; me ti mo, mbi yeke hunzi mara ti mo pepe. Biani, mbi pika mo, me na legeni; mbi lingbi fade ti zia mo senge tongaso pepe!”

Jérémie 49:36

Ti londo na Banga asi na Mbongo, nga na To asi na Do, mbi yeke tokua apupu osio ti ga na mbage ti Elam. “Mbi yeke kangbi azo ti Elam na mbage kue. Azo ti Elam so akpe kodro ti ala ti gue na kodro wande, ala yeke duti na ya ti akodro mobimba.

Ezekiel 20:38

Azo so atomboka na tere ti mbi na azo so ake ti ma yanga ti mbi, fade mbi yeke zi ala na popo ti ala, azo ti Israel. Mbi yeke sara si ala sigigi na ya ti akodro so ala duti daa tongana awande, me ala yeke li na sese ti Israel pepe. Tongaso, fade azo ni ayeke hinga atene, mbi laa mbi yeke KOTA GBIA.

Ezekiel 36:19

Mbi kangbi ala na popo ti amara nde si ala kangbi kirikiri na ya ti akodro wande. Mbi fâ ngbanga na li ti ala alingbi na dutingo ti ala nga na asarango ye ti ala.

Ezekiel 39:28

Tongaso, fade azo ti Israel ayeke hinga nga atene, mbi yeke KOTA GBIA, Nzapa ti ala, ngbanga ti so, na peko ti so mbi sara si a gbu ala, a gue na ala na kodro wande, mbi kiri mbi bongbi ala na ndö ti sese ti ala. Mbi yeke kiri ti zia zo oko ti ngba kâ pepe.

Ezekiel 5:10

Na ya ti gbata ni, fade babâ na mama ayeke te amolenge ti ala, amolenge ayeke te babâ na mama ti ala. Mbi yeke fâ ngbanga na li ti ala; ti tanga ti azo so ayeke ngba na fini, mbi yeke kangbi ala kirikiri na ndo kue.

Ezekiel 5:12

Fade a yeke kangbi ya ti ala ota: kozo kangbi ni ayeke kui ande na sioni kobela ti bubango kodro nga na kota nzara taa na ya ti gbata ni; use kangbi ni ayeke kui kuâ ti yongoro zeme na tere ti gbata ni. Fade mbi yeke kangbi tanga ti azo ni kirikiri na ndo kue si mbi yeke gboto yongoro zeme ti mbi ti tumba peko ti ala.

Awayango-sandaga 26:33

Ti ala, mbi yeke tokua bira na tere ti ala si mbi yeke sara titene ala kangbi na popo ti amara nde. Kodro ti ala ayeke ga ngonda si agbata ti ala ayeke buba kue.

Nzoni Tënë so Luc asu na mbeti 22:31

Jésus atene: “Simon, Simon, Satan ahunda ti yengere ala tongana ti so zo ayeke yengere ale ti kobe.

Ndia ti fani use ni 28:64

Fade KOTA GBIA ayeke kangbi ala na popo ti amara kue, ti londo na mbeni nda ti sese ti si na mbeni nda ni. Kâ, ala yeke voro ambeni nzapa so ala wani ahinga ala pepe, akotara ti ala nga ahinga ala pepe; a sara anzapa ni so na keke wala na têne.