Amos 7:17 - Mbeti ti Nzapa - Tënë so amu fini

¹⁷ Ndani laa, tënë so KOTA GBIA atene ayeke so: ‘Fade wali ti mo ayeke sara ye ti ndumba na ya ti gbata ni; a yeke fâ amolenge ti mo ti koli na ti wali. A yeke haka sese ti mo ti kangbi ni na popo ti azo. Ti mo, mo yeke kui na kodro ti amara nde, a yeke gbu azo ti Israel kue kue kue ti gue na ala yongoro na tere ti kodro ti ala.’ ”

Amos 7:17 ပူးပေါင်းရင်းမြစ်များ

2 Agbia 17:6

Na ngu gumbaya ni so Osée ayeke le-gbia, gbia ti Asirii amu gbata ti Samarii. Lo gbu azo ti Israel si lo gue na ala na kodro ti Asirii. Lo zia ambeni na sese ti Hala, ambeni na tere ti ngu ti Habor, na sese ti Gozan si ambeni na ya ti agbata ti Medii.

Abia (Psaumes) 78:55

Lo tumba amara nde na dawa ti ala, lo haka sese ti amara ni si lo kangbi ni na azo ti lo titene aga ti ala, lo sara si amara ti Israel aduti na gbe ti ada ti bongo ti azo ni.

Ésaïe 13:16

A yeke do ya ti amolenge ti ala taa na le ti ala, a yeke nzi aye ti da ti ala, a yeke gbu awali ti ala na ngangu ti lango na ala.

Ésaïe 22:18

si lo yeke tokua mo titene mo rule tongana ndembo na ya ti mbeni kodro so akono. Kâ, mo yeke kui ande, mo na apendere pusu ti mbarata ti mo kue, mo so mo yeke zia kota kamene na le ti makonzi ti mo!”

Jérémie 14:16

Azo so awayanga-Nzapa ni atene tënë ni na ala so, fade bira na nzara ayeke fâ ala; a yeke bi kuâ ti ala kirikiri na ndö ti alege ti Jérusalem, zo oko ti lu kuâ ni ayeke daa pepe, ala na awali ti ala nga na amolenge ti ala ti koli na ti wali. Sioni so azo ni asara so, fade mbi yeke sara si akiri gi na li ti ala wani.

Jérémie 20:6

Ti mo Pashehur, mo na azo ti da ti mo kue, fade a yeke gbu ala ti gue na ala na Babilone. Mo yeke kui kâ si a yeke lu mo kâ, mo na amba ti mo so kue mo mu tënë ti mvene ti tene peko ti yanga ti Nzapa na ala so.’ ”

Jérémie 28:12

Na peko ti so Hanania afâ ya ti zuge so ayeke na ndö ti go ti Jérémie awe, tënë ti KOTA GBIA asi na Jérémie, atene:

Jérémie 28:16

Nilaa, tënë so KOTA GBIA atene ayeke so: ‘Mbi yeke zi mo na ndö ti sese; mo yeke kui gi na ngu so, ngbanga ti so mo pusu azo ti ke KOTA GBIA.’ ”

Jérémie 29:21

“Tënë so KOTA GBIA so ayeke na ndö ti dunia kue, Nzapa ti Israel atene na ndö ti Ahab, molenge ti Kolaya na Sidekia, molenge ti Maaseya ayeke so: ala use kue ayeke awayanga-Nzapa ti mvene, ataa so ala yeke tene peko ti atënë ti yanga ti Nzapa na azo, atene: ‘Mbi yeke zia awayanga-Nzapa ni na maboko ti Nabukodonosor, gbia ti Babilone si lo yeke fâ ala na gbe ti le ti ala, azo ti Jérusalem.

Jérémie 29:25

Tënë so *KOTA GBIA so ayeke na ndö ti dunia kue, Nzapa ti Israel atene ayeke so: Mo su mbeti na iri ti mo, mo tokua na azo so kue ayeke na Jérusalem, na wayango-sandaga Sefania, molenge ti Maaseya nga na tanga ti awayango-sandaga kue. Tënë so mo yeke tene na ya ti mbeti ni ayeke so:

Abia ti demango tere 5:11

Na ya ti gbata ti Sion, a yeke gbu awali na ngangu si ayeke lango na ala; na ya ti agbata ti kodro ti Juda, a yeke buba amaseka-wali.

Ezekiel 4:13

KOTA GBIA akiri atene: “Gi tongaso laa azo ti Israel ayeke te *asioni kobe na popo ti amara nde so mbi yeke tumba ala ti gue daa.”

Osée 9:3

Fade azo ti Efraim ayeke ngba na ya ti kodro ti *KOTA GBIA pepe; ala yeke kiri na sese ti Ezipte si na sese ti Asirii, ala yeke te kobe so ayeke *sioni.

Amos 6:7

Ndani laa, fadeso ala yeke akozo zo so a yeke gbu ala ti gue na ala na kodro wande. Matanga ti ala ahunzi awe, azo ti sopo!

Amos 7:11

Amos atene: ‘Gbia Yeroboam ayeke kui ande kuâ ti bira si a yeke gbu azo ti Israel kue kue kue ti gue na ala yongoro na tere ti kodro ti ala.’ ”

Amos 8:1

Ye so Kota Gbia NZAPA afa na mbi si mbi baa ni ayeke so: mbeni sakpa so abengo le ti keke ayeke na ya ni.

Amos 9:1

Mbi baa Kota Gbia aluti na nduzu na ndö ti gbalaka, lo tene: “Alingbi ala kungbi ali ti akota yongoro gere ti kota da ti Nzapa si agere ti da ni ayingi. Ala fâ li ti da ni si da ni atuku na ndö ti azo kue. Azo so angba na fini, fade mbi yeke sara si ala kui kuâ ti yongoro zeme; zo oko alingbi ti kpe pepe, zo oko alingbi ti soo kuâ pepe.

Amos 9:8

Baa, le ti Kota Gbia NZAPA ayeke na ndö ti kodro-gbia so siokpari asi singo na ya ni. So tënë ti yanga ti KOTA GBIA laa: “Fade mbi yeke zi kodro-gbia ni na ndö ti sese so, me mbi yeke hunzi *ahale ti Jacob kue pepe.

Mishe 1:16

Ala azo ti Jérusalem, ala kio kua ti li ti ala, ala fâ kua ti li ti ala ndali ti amolenge ti ala so ala ye ala mingi so. Ala kio kua ti li ti ala kue titene aga tongana ti *ngoalo so amboko kue so. Biani, fade a yeke gbu amolenge ni ti gue na ala na kodro wande, yongoro na tere ti ala, azo ti Jérusalem.

Zakarii 14:2

Fade KOTA GBIA ayeke bongbi amara kue ti tiri bira na Jérusalem; azo ayeke mu gbata ni, ala yeke nzi aye ti ya ti ada, ala yeke gbu awali na ngangu ti lango na ala; ala yeke gbu ndambo ti azo ti gbata ni ti gue na ala na kodro wande, me tanga ti azo ayeke ngba na ya ti gbata ni.