Amos 5:16 - Mbeti ti Nzapa - Tënë so amu fini

¹⁶ Ndani laa, tënë so KOTA GBIA, Nzapa so ayeke na ndö ti dunia kue atene ayeke so: “Na ndo so kue azo ayeke bongbi daa, fade azo ayeke ma abia ti totongo kuâ; na ndö ti alege kue, azo ayeke tene: ‘So ye ti mawa ti nyen! So ye ti mawa ti nyen!’ Fade a yeke iri zo ti fango yaka ti ga ti toto kuâ; a yeke iri nga azo so ahinga lege ti totongo kuâ ti ga ti toto kuâ.

Amos 5:16 ပူးပေါင်းရင်းမြစ်များ

2 Mbai 35:25

Wayanga-Nzapa Jérémie aleke mbeni bia ti totongo na kuâ ti Yosias. Ti londo na ngoi so ngbii asi laso, azo ti hengo bia, akoli kue na awali kue atene tënë ti Yosias na ya ti abia ti ala. Sarango ye tongaso aga mbeni ndia na sese ti Israel. A su abia so na Mbeti ti abia ti totongo kuâ.

Ésaïe 15:8

Na tere ti sese ti Moab kue, azo ayeke dekongo. Abia ti demango tere ti ala ague ngbii asi na Eglaim, ague ngbii asi na du ti ngu ti Elim.

Ésaïe 22:12

Na lango ni so, Kota Gbia, NZAPA so ayeke na ndö ti dunia kue, airi ala ti toto, ti dema tere, ti kio kua ti li ti ala, ti yu bongo ti mua.

Jérémie 30:5

“Tënë so KOTA GBIA atene ayeke so: E ma dekongo ti ye ti mbeto; ye ti kota mbeto laa, me ti siriri pepe.

Jérémie 4:31

Mbi ma mbeni go; go ni akpa ti wali so ya ti lo ayeke so ti du si lo yeke dema tere ti lo. Go ni akpa ti wali so ayeke du kozo molenge ti lo; go ni so ayeke go ti *Sion, pendere gbata: lo wu pupu gbaa si lo yeke dema; lo yoro maboko ti lo na nduzu si lo tene: “Ti mbi awe! Azo ti fango zo afâ mbi awe!”

Jérémie 9:10

KOTA GBIA atene: “Mbi yeke sara titene Jérusalem aga ndo so ye kue abuba daa; ndo so aga ndo ti lango ti *anzagua. Mbi yeke sara si agbata ti Juda aga gi ngonda, ndo so zo ayeke daa mbeni pepe.”

Jérémie 9:16

Tënë so KOTA GBIA so ayeke na ndö ti dunia kue atene laa. “Ala gbu li ti ala si! Ala iri awali ti totongo kuâ ti ga! Ala iri awali so kua ti ala ayeke gi totongo kuâ.

Osée 4:3

Ndani laa fade ndo ayeke hole kue na ya ti kodro ni, azo ti kodro ni kue ayeke nge ngengo, ala, na anyama ti ngonda na andeke ti nduzu; ataa asusu ti kota ngu-ingo ayeke hunzi kue.

Joël 1:11

Azo ti fango yaka, be ti ala awoko kue awe; azo ti fango yaka ti vinye, ala dema tere, ngbanga ti so ble na *orze atia awe, akobe ti yaka abuba awe.

Joël 1:14

Ala mu yanga titene azo azia mbeni lango nde ti ke kobe ti sambela Nzapa; ala iri azo ti bongbi ti voro Nzapa; ala bongbi *akangba na azo ti kodro kue na ya ti da ti *KOTA GBIA, Nzapa ti ala, ala dekongo na lo.

Joël 1:15

Ae! So lango ti nyen? *Lango ti KOTA GBIA aga nduru awe, lango ni ayeke tongana mbeni kota kpale so ayeke buba ndo kue; alondo na lo so ngangu ti lo ahon angangu kue.

Joël 1:8

Ala azo, ala dema tere ti ala tongana maseka-wali so ayu bongo ti mua si lo yeke toto kuâ ti koli ti lo ti maseka.

Amos 3:13

So tënë ti yanga ti Kota Gbia NZAPA laa, lo so lo yeke na ndö ti dunia kue, lo tene: “Ala ma tënë so, ala fa peko ti tënë so lo tene na tere ti *ahale ti Jacob:

Amos 5:27

Ndani laa, mbi yeke sara si a gbu ala ti gue na ala yongoro na peko ti Damas kâ”; tënë so KOTA GBIA atene laa. Iri ti lo ayeke “Nzapa so ayeke na ndö ti dunia kue.”

Amos 8:10

Fade mbi yeke sara si amatanga ti ala aga ngoi ti vundu; abia ti ala ayeke ga abia ti totongo kuâ. Fade mbi yeke sara si azo kue ayeke yu bongo ti mua si ala yeke kio kua ti li ti ala; mbi yeke sara si ala yeke sara mua tongana ti so a yeke sara mua ndali ti oko molenge ti ya ti sewa so akui. Na lango ni so, fade aye so kue ayeke hunzi na ya ti mawa.”

Amos 8:3

Na lango ni so, abia so azo ayeke he na yangbo ti gbia ayeke ga abia ti demango tere. Gba ti akuâ ayeke si singo na ndo kue, a yeke bi akuâ ni na ando kirikiri si ndo ayeke de ngii”; so tënë ti yanga ti Kota Gbia NZAPA laa!

Mishe 1:8

Ndani laa, fade mbi, Mishe, mbi yeke toto si mbi yeke dema tere ti mbi. Mbi yeke tambula gere senge, mbi yeke tambula tere ti mbi senge. Mbi yeke toto tongana *anzagua, mbi yeke he bia ti totongo kuâ tongana ti so *anaamo ayeke toto so.

Mishe 2:4

Na lango ni so, fade azo ayeke he bia na iri ti ala, azo ayeke he bia ti totongo kuâ so, atene: “A mu aye ti e kue kue kue awe! A gbanzi sese ti azo ti e awe! A kangbi ya ti sese ni na popo ti awato ti e. Ngbanga ti nyen si a mu aye ni na maboko ti e so?”

Aye so Nzapa afa 18:10

Mbeto ti pasi so lo yeke baa ayeke sara ala; ala yeke luti yongoro si ala yeke tene: “Mawa-ee! So mawa! Kota gbata-ee, Babilone-ee! Ngangu gbata! Gi na ya ti ngbonga oko, a fâ ngbanga na li ti mo awe!”

Aye so Nzapa afa 18:19

Ala tuku fuku ti sese na ya ti li ti ala, ala toto, ala sara mua, ala dekongo, atene: “Mawa-ee! So mawa! Kota gbata so na lege ti gba ti amosoro ti lo awa ti amangboko aga azo ti mosoro mingi so, gi na ya ti ngbonga oko aye ti lo kue abuba awe!”